YESKIAL 39 - Susula Malalaok Hehelu Palak Ma Hehelu Beuk

Gog kala

¹ Manetualain Fo Mademaina, nafa'da nae, “Hai hataholi daebafak fo, manasapu-manalalok-konei, fe nasanene'da mahelek neu Gog, fo mane matuaina neme nusa Mesekh ma Tubal mai, ma mafa'dan mae Au ia, ndia musun-na.

² Neukose Au hela falik-kana, fo Au on kalua neme nusak-ka, doon-na seli nai kii, fo Au on leo Israel leten-nala neu.

³ Nai ndia, neukose Au fepa kokoun-na, losa tu'dahenin neme lima kiin-na mai, ma Au tao atu'daheni kokou isin-nala neme lima konan-na mai.

⁴ Gog no basa solda'dun-nala, ma basa leoina fo manalook-kana, neukose mate la'iesak-kasa lai Israel leten-nala lain, fo Au fe popolan-nala neu manupui-la, ma bana makaak-kala, fo la'ahenis.

⁵ Neukose solda'du sila-la ala tu'da, fo mates lai tina-la dalek. Au, Manetualain Fo Mademaina, nde manakokolak-ka.

⁶ Neukose Au fe ha'i-a na'a nai dae Magog-ka, ma nai tasi su'uk-kala, fo nai bee, laun-na laso'da no tetu-temak. Soona besak-ka ala bubuluk, lae Au nde Manetualain-na.

⁷ Tehu neukose, Au afa'da Au na'de malalao-malalafung-nga nai hataholi Israel-la tala'da heon, ma Au na'deng ndia, neukose ta nanatao nanggenggeok so'on. Soona besak-ka leoina-kala, ala bubuluk lae Au nde Amak, Manetualain fo malalao-malalafuk neme Israel mai.”

⁸ Manetualain Fo Mademaina, nafa'da nae, “Tete'ek-ka, faik fo Au seseik-kana ndia, neukose ana mai.

⁹ Laun manai Israel kotan-nala, neukose beenongo fo ala mai hehele lakabubua, ala la'oela tafa-sisilo-la, fo nde babaa fanak ma tafaina, kokouk ma kokouisin-nala, boema ai kalapu'ak. Ala tao basa sila-la, da'di ai ha'i nai teuk hitu dalen-na.

¹⁰ Da'di ta paluu leu hila ai ha'i, do leu lo'o ai nai nula dale so'on, nana ala la'oela tafa-sisilo sila-la, dai ala pakes da'di ai ha'i. Neukose lamanako, ma ala kalo hataholi fo lamanako, ma ala kalo leni sila hata-heton-nala. Au, Manetualain Fo Mademaina, nde manakokolak-ka.”

Gog nananatoi-natonok

¹¹ Manetualain nafa'da nae, “Metema basa sila-la, ala da'di soona, neukose Au fe Gog dae loo-latek nai Israel, fo nai Bafak Lelenak-ka, nai Tasi Mates-sa boboan dulu. Nai mamanak ndia nde, Gog no basa solda'dun-nala lala'en-na, neukose nananatoi-natonok, fo loke bafak ndia soona lae, ‘Gog Solda'dun-nala Doken-na’.

¹² Hataholi Israel-la, latoi-latono hataholi manamatek sila-la, bulak hitu dalen-na, fo ela dae ndia, boso nanggenggeo seluk bai.

¹³ Basa laun manai nusak-ka lala'en-na, latoi-latono hataholi manamatek sila-la, de no sila tatao-nono'in ndia de, neukose ala hapu kokoa-kikiok, nai faik fo, Au atu'du Au mandela-masa'ang-nga. Au, Manetualain Fo Mademaina, nde manakokolak-ka.

¹⁴ Lelek bula ka hituk sila-la seli boema, hataholi de'ubee hapu bela-ba'uk la'ok okofefeok nusak ndia, fo ala sanga hataholi manamatek fo nananatoi beitak-kala, de metema bei hapu soona, latoi-latonon, fo ala tao lalalao nusak ndia neme manggenggeok-ka mai.

¹⁵ Nai hataholi sila-la lala'on-na dalek, metema ala hapu hataholi dui soona, ala tao ta'du neu boboan-na, fo ela tuka matoi mamates-sala litan soona, ala ho'i-lan fo, latoi-latonon neu Gog Solda'dun-nala Doken dale.

¹⁶ Fo no enok ndia, dae ndia nanatao nalalaok neme manggenggeok-ka mai. (Nai fai makabuin, neukose hapu kota nai bafak ndia, na'den-na sama leo Gog Solda'dun-nala na'den-na.)”

¹⁷ Manetualain Fo Mademaina, nafa'da au nae, “hai hataholi daebafak fo, manasapu-manalalok-konei, maloo basa manupui-la, ma bana fe'ek-kala, fo ala mai leme mamanak lala'en-na mai, soaneu la'a tutunu-hohotuk fo, Au sadia basan ba'eneu sila so. Neukose Au tao feta matuaina nai Israel leten-nala lain, de ala hapu la'a paa, ma linu daak nai naa.

¹⁸ Ala hapu la'a palani tatibatu-la popolan-nala, ma linu basa manakoasa daebafak-kala daan-na. Basa palani tatibatu sila-la, ma manakoasa sila-la, neukose nanataonisak sama leo bi'ihii mane do bi'ihii ana-la, do banteng maao-la.

¹⁹ Au taoisa basa hataholi sila-la sama leo tutunu-hohotuk soona, manupui-la, bana fe'ek-kala, neukose la'a la'iesak minan-nala, losa ala malua, ma linu daan-nala, losa ala mafuk.

²⁰ Ala hapu lakabete nai Au meing lain, nenik nana'ak fo nde: ndala-la loo hataholi manasa'ek-kala, ma nenik basa palani tatibatu-la aoisin-nala. Au, Manetualain Fo Mademaina, nde manakokolak-ka.”

Israel nanatao nabebeuk

²¹ Manetualain nafa'da nae, “Neukose, Au atu'du Au mandela-masa'ang neu leoina-kala. Neukose basa-basas lita, tao leo beek fo, Au pake Au koasang-nga, soaneu Au akalala'ok nakeketuk-kala no ndoos ma matetuk.

²² Mulai neme hatematak ndia mai, neukose hataholi Israel-la, ala bubuluk, lae Au nde, sila Aman Manetualain-na.

²³ Ma basa leoina-kala, neukose ala bubuluk, lae hataholi Israel-la, nanafook leo mamana tu'u-tapak neu, nanahu sila sala-singon neu Au-a. Au la'oelas so, ma Au po'ilotak musu-a sengis, de musu-a taonisas lai natee-natatik dale.

²⁴ Au taos nandaa no sila manggenggeon-na, ma tatao-nono'i mangalaun-nala, boema Au la'oelas.”

²⁵ Manetualain Fo Mademaina, nafa'da nae, “Tehu besak ia, neukose Au sue-lai hataholi Israel fo, Yakob tititi-nonosin-nala, boema Au fes laso'da no tetu-temak seluk. No enok ndia, Au anea Au na'deng-nga, fo ela nanafe ha'da-holomata nahele.

²⁶ Metema ala leo seluk no nee-nee lino-linok nai sila nusan-na, fo ta hapu hataholi nakabibiik-kasa fa, soona neukose lafandele heni, tao leo beek de ala hapu mamaek, hu kande lalelesi Au.

²⁷ Neukose Au o falik-kasa leme sila musun-na, nusan-nala mai, fo neukose basa leoina-kala lita Au malalao-malalafung, hu kande Au tatao-nono'ing ndia.

²⁸ Soona besak-ka, Au anang-ngala bubuluk, lae Au nde sila Aman Manetualain. Nana Au nde haitua sila leo mamana tu'u-tapak neu, tehu Au boeo, nde o falik-kasa leo sila nusan-na neu, no ta la'oela sila hataholin esa boen, nai mamana tu'u-tapak fa.

²⁹ Neukose, Au akona Au Duladaleng-nga neu leoina Israel-la, ma neukose Au ta la'oelas so'on. Au, Manetualain Fo mademaina, nde manakokolak-ka.”