YESKIAL 38 - Susula Malalaok Hehelu Palak Ma Hehelu Beuk

Manetualain dede'a-kokolan la'eneu Gog nai dae Magog-ka

¹ Manetualain nafa'da au nae,

² “Hai hataholi daebafak fo, manasapu-manalalok-konei, soo-supa Gog fo, mane matuaina neme nusa Mesekh ma Tubal-la mai nai dae Magog-ka.

³ Mafa'dan mae Au, Manetualain Fo Mademaina nde been-na, ndia musun-na.

⁴ Neukose, Au tao kakaik neu timin-na, fo Au hela falik-kana, fo Au on kalua sama-sama no basa solda'dun-nala lala'en-na. Solda'dun manasa'e ndalan-nala makadotok nanseli, ala pake bua papakek matak esa. Basa solda'dun-nala, leni babaa fanak ma tafaina.

⁵ Solda'du-la leme Persia, Sudan ma Libia mai, ala tunga manek-ka, de basa-basas leni tafaina ma topi bai.

⁶ Basa palani tatibatu-la leme nusak Gomer ma Bet-Togarma nai kii, ala mai sama-sama loon, ma leoina fe'ek makadotok, ala tunga boe.

⁷ Madenun fo naheheleaon, ma fe paleta neu basa solda'du fo, manatunga loon-na, fo ela laheheleaon tunga paletan-na.

⁸ Bei teuk de'ubee seluk bai soona, neukose Au paletan fo, neu sapu-na nusak esa no laun fo, nanatao nakabubua falik leme leoina makadotok tala'da mai, fo basa boema, ala leo lai nusak ndia, no nee-nee lino-linok. Neukose Gog nangatuu-na Israel leten-nala, fo nee-nee lino-linok dook-ka so, ma henuk no ai batu manatapasasalak-kala, tehu besak ia, laun fo bei maso'dak-kala, ala leon no nee-nee lino-linok.

⁹ Ndia ma solda'dun-nala, boema leoina fo manatungan-na, neukose ala mai fo sapu-lan, sama leo ani sangu, ma ala poti-la nusak-ka lala'en-na, sama leo ko'as-sa.”

¹⁰ Manetualain Fo Mademaina, nafa'da Gog nae, “Nai hatematak ndia, neukose o tutu'u tao eno mangalauk.

¹¹ O ho'i nakeketuk, fo o muu sapu-ma nusak fo, kota musun ta ndia, fo nai bee, laun-nala laso'da no nee-nee lino-linok lai kota-kota fo, papala nanadaman ta, ma tafa-sisilon-nala ta ndia.

¹² Neukose o mamanako, ma o kalo meni laun manaleo nai kota fo, makahulun-na ana da'di ai batu manatapasasalak ndia, hata-heton-nala. Laun fo, nanatao nakabubuak leme leoina mata-matak-kala mai, besak ia hata-heton ma bana-manun-nala makadotok, boema ala leo lai daebafak-ka polon-na.

¹³ Syeba ma Dedan laun-nala, boema basa manadangan manai nusa Spanyol-la kotan-nala, neukose latane o lae leo ia, ‘Ade o mai mo basa o solda'dum-mala mai, ka'da soaneu ala kalo ma lamanako lilopilas, lilofulak, bana-manu ma hata-heto, boema soaneu kalo meni basa sila-la do?’ ”

¹⁴ Hu ndia de Manetualain Fo Mademaina, nadenu au mai, soaneu anduku-alosak hala heheluk ia neu Gog nae, “Nai lelek Au anang Israel, naso'da no nee-nee lino-linok ma tetu-temak-ka, o mai sapu malas.

¹⁵ O la'o meme o mamana leleom-ma nai kii, fo doon-na seli, ma solda'du palani makadotok ala tunga o. Solda'du sila-la, solda'du manasa'e ndala mesa-mesan leme leoina mata-matak-kala mai.

¹⁶ Boema, o sapu-ma Au anang Israel, sama leo ani-sangu-a sa'e-na daebafak-ka. Metema fain-na losa soona, neukose Au adenu o, fo muu mangatuu-ma Au daeng-nga. Hai Gog, no Au tatao-nono'ing tunga o, de neukose leoina-kala bubuluk, see Au, fo nde Manetualain, fo malalao-malalafuk-ka.

¹⁷ Ade makahulun-na, Au kokolak tunga Au atang-ngala, ma nabi Israel-la, ta la'eneu o nde ndia fa do? Ala lafa'da, lae nai tepo lelek manamaik-ka, neukose Au adenu hataholi esa, neu sapu-na Israel. Au Manetualain Fo Mademaina, nde manakokolak-ka.”

Manetualain huku Gog

¹⁸ Manetualain Fo Mademaina, nafa'da nae, “Tehu Gog sapu basa Israel soona, neukose no lai-laik Au amanasa anseli.

¹⁹ Ma no nasa manalua ponu-ponuk-ka, neukose Au fe nasanene'da mahelek, ae nai faik ia, neukose hapu dae manggengo matuaina, nai nusa Israel-la.

²⁰ Basa I'ak ma manupui-la, basa bana ana-matua, ma basa hataholi manai daebafak-ka, neukose ala dele bengge'be no bibii-namata'uk, lasasalematak loo Au. Neukose letek-kala ndefa, felak-kala, ala fela, ma basa papala nanadamak-kala, balahenis.

²¹ Boema, neukose Au tao anggengek Gog nenik soe mata-matak lala'en-na. Au, Manetualain Fo Mademaina, nde manakokolak-ka. Neukose Au anang-ngala, esa sapu-na esa nenik sila tafainan-na.

²² Neukose, Au hukun nenik he'di-laus, ma nado'do-napauk-ka. Neukose Au fe u'daina, ma u'da eis, ha'i ma belerang-nga tu'da la'en no solda'dun-nala, ma la'e leoina makadotok fo, manalook-kana.

²³ No enok ndia, neukose Au atu'du neu basa leoina lala'en-na, ae Au ia matua-madema, ma malalao-malalafuk. Soona besak-ka ala bubuluk, lae Au nde Manetualain-na.”