YESKIAL 36 - Susula Malalaok Hehelu Palak Ma Hehelu Beuk

Manetualain baba'e-papalan ba'eneu Israel

¹ Manetualain nafa'da nae, “Hai hataholi daebafak fo, manasapu-manalalok-konei, mafa'da lete-letek Israel-la, ma madenus fo, lamanene Manetualain Fo Mademaina, paletan-na nae,

^2-6 ‘Lelek leoina titia-tataik-kala, sapu-la emi, ma lamanako emi hata-hetom-mala, ala lakamumulu-lakamamaek basa Israel lala'en-na so. Ala kokolak no namahokok, lae pupukuk makahuluk sila-la, besak ia, da'di sila nuun so. Hu ndia de, hai letek-kala ma pupukuk-kala, lee anak-kala ma bafak-kala, hai kota-kota fo manada'di ai batu manatapasasalak-kala, ma kota fo hataholin-nala la'oelan so, boema leoina titia-tatain-nala, lamanako ma ala hakinonolin-na, mamanene hata fo, Manetualain Fo Mademaina nafa'dan neu emi nae: Nai Au nasa-melung fo manalua ponu-ponung-nga dalek, neukose Au fe nasanene'da mahelek neu leoina fo, manai emi titia-tataim-mala, lena-lenak neu Edom, nanahu no namahokok, sila lakamumulu-lakamamaek, ala loso-la Au daeng-nga, ma ala loso-la moo mana'un-nala. Besak ia, Au amanasa anseli, nanahu leoina sila-la, lakamumulu-lakamamaek, boema lakadadaek emi.

⁷ Au, Manetualain Fo Mademaina, soo ae leoina manai emi titia-tataim-mala, neukose nananakamumulu-nakamamaek boe.

⁸ Tehu Au afa'da o, hai lete-letek Israel-la lemin, neukose o ai-mala ladoo beu, fo laboa seluk fe Au anang Israel.

⁹ Hai Israel, Au ok o, de tao leo bee-o, o daem-ma nanafoi-falak seluk, fo sele-nggali bini-ngges neu.

¹⁰ Neukose Au anang Israel, boetai lamade'u. Neukose, ala leo lai kota-kota-la dalek, fo lafofo'a falik kota sila-la.

¹¹ Neukose o laum-ma, ma o bana-manum, boetai lamade'uka, fo de'u lena makasososan-na, boema ala bongi fo, upu-anan-nala makadotok nanseli. Neukose laso'da sama leo makasososan-na nai naa, ma Au fes laso'da no tetu-temak, fo emi beita hapu maso'dak leondiak-ka fa. Soona besak-ka, emi bubuluk mae Au nde, Manetualain-na

¹² Neukose Au o falik Au anang Israel, fo ala leo seluk sila nusan-na. Neukose dae ndia, ana da'di sila nuu mesan, fo dae ndia ana fes buna-boak tataas esa, nalosa ta mate anan-nala no la'as-sa so'on.’

¹³ Au, Manetualain Fo Mademaina, afa'da ae, ‘Memak tete'ek-ka, hataholi-la foi dae ndia na'de, dae mana'a hataholi, ma dae manaloso ni'iana – leoina manaleo manai dae ndia dalek-ka.

¹⁴ Tehu besak ia, neukose dae ndia ta na'a hataholi, do ana loso-na sila anan-nala so'on. Au, Manetualain Fo Mademaina, nde manakokolak-ka.

¹⁵ Ta paluu dae ia namanene seluk hakinonolik neme leoina fe'ek-kala mai, do ana lu'a-lepa hataholi nakamumulu-nakamamaen so'on. Neukose dae ia, ta tao nakalulutuk leoina fo manaleo nai dalek-ka so'on. Au, Manetualain Fo Mademaina, nde manakokolak-ka.’ ”

Israel nanatao nabebeuk

¹⁶ Manetualain nafa'da au nae,

¹⁷ “Hai hataholi daebafak fo, manasapu-manalalok-konei, lelek hataholi Israel-la, ala leo leme sila nusan-na dalek-ka, ala tao langgenggeon nenik sila tatao-nono'in-nala so. Sila ha'da-tataon ndia manggenggeok sama leo inak fo ana hapu he'di bulak.

¹⁸ Au amanasas, nanahu ala tao tatao-nono'ikanisak makadotok nai nusak ndia, ma ala tao langgenggeon nenik sila sosongo-tatangon-nala.

¹⁹ Au hukus nandaa no sila ha'da-tataon, boema Au tao tapasasalas leo nusa dea-la leu.

²⁰ Ala lai su'di mamanak bee boe, ala tao langgenggeo Au na'de malalao-malalafung-nga tataas esa. Nana hataholi-la lafa'da lae leo ia, ‘Leoina ia nde been-na, Manetualain anan, tehu ala muse la'oela dae fo, Manetualain fen neu sila.’

²¹ Au ame'da Au daleng-nga he'dis-sa, nanahu Au na'de malalao-malalafung-nga, hataholi Israel fo, mada'baoek sila-la, ala tao langgenggeon so.

²² Hu ndia de, manduku-malosak hata fo Au, Manetualain Fo Mademaina, nafa'da neu leoina Israel nae, ‘Hata fo, neukose Au taon nai fai makabuin, ta hu kande emi fa, hai hataholi Israel-la lemin, te hu kande emi meu su'di leo mamanak bee meu soona, emi tao manggenggeo Au na'de malalao-malalafung-nga.

²³ Neukose Au atu'du Au na'de malalao-malalafung matuainang ndia, na'dek fo emi tao manggenggeon nai leoina-kala tala'da, soona besak-ka ala bubuluk, Au nde Manetualain-na. Au, Manetualain Fo Mademaina, nde manakokolak-ka. Neukose Au pake emi, fo emi matu'du leoina-kala, mae Au ia, malalao-malalafuk, Manetualain Fo Malalao-malalafuk nanseli.

²⁴ Neukose Au tao akabubua emi, neme basa leoina ma nusak-kala mai, fo Au o falik emi leo emi dae-ma meu.

²⁵ Basa ndia soona, neukose Au pisi oe neuk neu emi, fo ela emi malalaok neme basa emi sosongo-tatangom lala'en-na mai, ma neme basa hata lala'en fo, manatao nanggenggeo emi.

²⁶ Boema Au fe emi dale beuk, ma dudu'a-aafi beuk. Neukose Au nggati o dale mateam, fo sama leo batu ndia, nenik dale manatunga paleta.

²⁷ Neukose Au akona, Au Duladaleng-nga leo emi dalem dale neu, ma Au anea emi, fo ela emi maso'da tunga Au hoholo-lalaneng, boema emi tunga basa Au paletang-ngala.

²⁸ Boema neukose, emi leo nusak fo, Au fen neu emi bei-ba'ikaim-mala. Neukose emi da'di Au anang, ma Au boeo, neukose da'di emi Manetualaim-ma.

²⁹ Neukose Au soi-po'i emi, neme emi manggenggeom lala'en-na mai. Neukose Au paleta gandum-mala, fo ala moli no malole, nalosa emi ta mamala'a-mamandoe so'on.

³⁰ Neukose Au fe emi aim-mala, ma emi tinam-mala labuna-laboa no malole, nalosa emi ta hapu la'ola'di fai la'a-ndoes fo ana tao nanggenggeo emi na'dem-ma, nai leoina-kala tala'da so'on.

³¹ Neukose emi mafandele-ma, emi ha'da-tatao mangalaum-ma, ma emi tatao-nono'im fo ta kandaak ndia fa, boema emi da'di malua seluk emi aoinam-ma, nanahu emi sala-singom-mala, ma emi tatao-nono'i ta kandaam ndia.

³² Hai leoina Israel-la lemin, mafandendelek leona, te Au tao basa sila-la, ta hu kande emi fa. Emi muse mame'da bibii-mamaek, ma nananakadadaek, hu kande emi ha'da-tataom-ma. Au, Manetualain Fo Mademaina, nde manakokolak-ka.’ ”

³³ Manetualain Fo mademaina, nafa'da nae, “Au tao balisi basa emi, neme emi sala-singom-mala mai soona, neukose Au fe emi loak, fo emi leo nai emi kotam-mala, ma emi mafofo'a falik kota sila-la, neme ai batu manatapasasalan-nala mai.

³⁴ Makahulun-na, hataholi-la, ala la'ok tunga emi moom-mala soona, lita dae ndia, tokotiik nanseli, tehu neukose, Au fe emi foi-fala seluk dae ndia.

³⁵ Soona neukose, basa hataholi-la ala nggenge, nanahu dae fo na'kasa dae tokotiik ndia, besak ia, nasafali da'di osi Eden-na so, ma kota-kota fo na'kasa, nee-nee lino-linok, ma lakalulutuk de ala da'di ai batu manatapasalak sila-la, besak ia, ala da'di kota musu matea-mahelek, ma laun-nala boeo, makadotok nanseli so.

³⁶ Soona leoina titia-tataik fo, bei elak-kala, neukose ala bubuluk lae Au, Manetualain nde nafofo'a falik kota-kota fo, lakalulutuk sila, ma foi-fala seluk, tina tokotik-kala. Au fo Manetualain, nde manakokolak-ka, de tao leo bee-o, neukose nanatao natetuk.”

³⁷ Manetualain Fo Mademaina, nafa'da nae, “Hai leoina Israel-la lemin, Au fe emi loak seluk, fo moke tutulu-fafalik neme Au mai; neukose Au fe mamade'u, sama leo bi'ilopo bubuak-kala.

³⁸ Kota-kota fo besak ia lakalulutuk-ka, neu makabuin-na te, henuk no laun-na, sama leo makahulun-na, fo nai fai-fai malole soona, Yerusalem henun no bi'ilopo nanatunu-hotuk-kala. Soona besak-ka emi bubuluk, mae Au nde Manetualain-na.”