YESKIAL 35 - Susula Malalaok Hehelu Palak Ma Hehelu Beuk

Manetualain huku Edom

¹ Manetualain nafa'da au nae,

² “Hai hataholi daebafak fo, manasapu-manalalok-konei, soo-supa nusa Edom-ma.

^3-4 Mafa'da laun-nala, hata fo Au, Manetualain Fo Mademaina, nafa'da neus, ‘Emi musum-ma, nde Au ia, hai laun manai Edom letelepan-nala lemin! Neukose Au tao-a, emi daem-ma, ana da'di dae louk, de hataholi ta leo dalek fa, ma o kotam-mala, ala da'di ai batu manatapasasalak. Soona besak-ka emi bubuluk, mae Au nde Manetualain-na

⁵ Mulai neme makahulun eli mai, emi musu moo Israel, ma emi po'ilotak-kasa ala mate, nai lelek soe-a tuni-ndeni nalas, da'di leo huhuku mate'ek-ka, neu sila sala-singon-nala.

⁶ Hu ndia de, no Au Manetualain fo maso'dak-ka, na'den-na, mamates-sa nde been-na, o ua-nalem nde ndia, de neukose o ta mala mamates-sa deak fa. Emi masala so, nana emi tao tatao-nono'ikanisak, hu ndia de, kanisak-ka boeo, neukose ana usi nahele emi.

⁷ O kota-kotam fo manai Edom letelepan-nala, neukose Au taos da'di kota louk, fo neukose Au taoisa, hataholi manala'ok tunga ndia.

⁸ Neukose Au akadofu ketu letek-kala nenik, o hataholi manamatem-mala, ma Au tao ahenu pupukuk ma bafak-kala, nenik hataholi manamatek lai natee-natatik-ka dalek.

⁹ Neukose Au tao nusam-ma, ana da'di moo maloaina, losa dodoon-na, ma hataholi ta leo lai o kotam-mala so'on. Soona besak-ka emi bubuluk, mae Au nde Manetualain-na.

¹⁰ Emi mafa'da, mae nau Yehuda do Israel no daen-na, esa-esak nde been-na, o hak ndia, ma o mae neukose emi manuu dae ndia, leomae Au, fo Manetualain nde been-na, sila Manetualain-na.

¹¹ Hu ndia de, no Au Manetualain fo maso'dak-ka, na'den-na, neukose Au balas nape'da dalek neu o, nanahu emi mamanasa, emi mape'da dalek, ma emi ta hii Au anang-ngala fa. Neukose ala bubuluk, lae Au huku emi, nanahu emi tatao-nono'im soaneu sila.

¹² Soona besak-ka emi bubuluk mae Au, fo Manetualain, amanene basa emi hakinonolim-ma, nai lelek emi mafa'da mae, Israel leten-nala louk so, ma nanafek leo ita mai, fo da'di ita nana'an.

¹³ Hai leoina Edom-mala lemin, emi bafa maloa, ma emi koao-ndaeao neu Au. Au amanene basa sila-la so.

¹⁴ Au Manetualain Fo Mademaina, afa'da ae: Basa daebafak-ka lala'en-na, neukose lamahoko, nai lelek Au tao basa o nusam-ma lala'en-na, da'di moo louk,

¹⁵ sama leo emi boeo mamahoko, nai lelek emi mita Israel da'di dae louk. Seir leten-nala, nakalenak basa dae Edom-ma lala'en-na, neukose ana da'di dae louk. Soona besak-ka basa hataholi-la, neukose ala bubuluk lae Au nde, Manetualain-na.’ ”