YESKIAL 34 - Susula Malalaok Hehelu Palak Ma Hehelu Beuk

Israel manafoon-nala

¹ Manetualain nafa'da au nae,

² “Hai hataholi daebafak fo, manasapu-manalalok-konei, fe mane-manek Israel-la, nasanene'da mahelek, ma manduku-malosak hata fo Au, Manetualain Fo Mademaina, nafa'das nae, ‘Soe ba'eneu emi, hai manafoo Israel-la lemin. Emi dudu'a-dodoo ka'da emi aoinam-ma mesak-kana, te emi ta dudu'a-dodoo, emi b'ilopom-mala fa.

³ Emi minu su'uoen-nala, emi tao bulun-nala da'di bua papakek, ma emi do'do bi'ilopo maao-la, fo emi mi'a. Tehu emi ta taoafik neu emi bi'ilopom-mala fa.

⁴ Emi ta mafaduli bi'ilopo tapandoes-sala fa, emi ta puli-mamo'do kamahe'dis-sala fa, emi ta sanga manamopok-kala, ma emi ta foo falik manamatofa-matalak-kala fa. Tehu emi taos no balakaik, ma ta pake susue-lalaik fa.

⁵ Hu kande bi'ilopo sila-la, manafoon ta, boema ala tapasasala, de bana fuik-kala la'ahenis.

⁶ Hu ndia de, Au bi'ilopong-ngala laleu-lalaak lai pupukuk-kala ma letek-kala poin-na. Ala tapasasala leo basa daebafak-ka lala'en-na leu, te ta hapu hataholi esa boen, fo ana nau taoafik do ana sanga fas.

⁷ Nah, hai manafoo-la lemin, mamanene hata fo Manetualain Fo Mademaina nafa'dan neu emi:

⁸ No Au, Manetualain fo maso'dak-ka na'den-na, taoafik leona! Bana fuik-kala, ala kaa-la Au bi'ilopong-ngala, de la'ahenis so, nanahu ta hapu hataholi foo fas. Au manafoong-ngala nde emi, tehu emi ta taoafik neu bi'ilopo sila-la fa. Emi dodoo ka'da emi aoinam-ma mesak-kana, te emi ta mete-makanae emi bi'ilopom-mala fa.

⁹ Da'di, mamanene leon, hai manafoo-la lemin,

¹⁰ Au Manetualain Fo Mademaina, afa'da emi, ae emi musum-ma nde Au ia. Neukose Au ho'i falik Au bi'ilopong-ngala leme emi mai, fo Au ta fe falik-kasa leo emi neu so'on; Au ta fe emi loak, soaneu emi dodoo-dudu'a emi paluu mesam-ma so'on. Neukose, Au soi-po'i Au bi'ilopong-ngala leme emi mai, fo ela emi boso boe do'do fo emi bai.’ ”

Manafoo malole

¹¹ Manetualain Fo Mademaina nafa'da nae, “Neukose Au sanga Au bi'ilopong-ngala, fo Au akabobois,

¹² sama leo manafoo esa, ana sanga bi'ilopon-nala, fo ana foo nakabubua manatapasasalak-kala, boema nakabobois. Neukose Au foo falik-kasa leme mamanak fo, nai bee ala tapasasala, nai faik fo nasakoko'a ma makahatuk ndia.

¹³ Neukose, Au kaluahenis leme leoina-kala tala'da, ma leme nusa dea-la mai, boema Au foo akabubuas fo Au foo falik-kasa leo, sila nusan-na neu. Neukose Au foos lai Israel letelepan-nala lain, ma nai bafak-kala dalek, ma Au hela-noles leo mook fo na'un-na momo'dok leu.

¹⁴ Tete'ek-ka, neukose Au sadia fes mook mana'u momo'dok-kala lai dae Israel-la letelepan-nala, ma lai bafak-kala. Neukose ala lu'u lai naa, ma la'a na'u no nee-nee lino-linok.

¹⁵ Neukose, Au nde da'di Au bi'ilopong-ngala manafoon-na, ma Au sadia fes mamana hahaeaok; Au Manetualain Fo Mademaina, nde manakokolak-ka.

¹⁶ Neukose Au sanga manamopok-kala, neukose Au foo falik manasalak-kala, neukose Au poti-palu manamakahinak-kala, neukose Au puli-amo'do kamahe'dis-sala; tehu neukose Au tao amate-amopo maao-la, ma mabe'i-balakaik-kala, nana Au manafoo fo, tao hata fo malole.

¹⁷ Mamanene leon, hai Au manafoong-ngala lemin! Au Manetualain Fo Mademaina, afa'da emi, ae neukose Au aketu-ala'di emi esa-esak, ma Au ta'da fe'ek malole-a neme mangalauk-ka mai, bi'ilopo-la neme bi'ihiik-kala mai.

¹⁸ Nai emi dalek hapu nggelok, metema la'a ka'da na'u malole-a soona, beita dai fa, de ala muse heheta-aa'i nalutu na'u fo, ta la'a fan-na! Sila linu oe neuk, boema ala tao kelupua oe fo, sila ta linu fan-na!

¹⁹ Au bi'ilopo fe'eng-ngala, muse la'a na'u fo, nanaheheta-aa'ik-ka so, ma linu oe fo, nanatao kelupuak-ka so.

²⁰ Hu ndia de Au, Manetualain Fo Mademaina, afa'da emi hai bi'ilopo maao-la lemin, neukose Au mai da'di leo manakee-manafula nai bi'ilopo mabe'i-balakaik-ka no bi'ilopo tapandoes-sa tala'da.

²¹ Emi seseti, ma emi puka bi'ilopo kamahe'dis-sala, nalosa lalai la'oela nonoon-nala,

²² Tehu neukose Au nde, soi-tefa Au bi'ilopong-ngala, fo ela ala boso boe hapu makata'ak bai. Neukose Au aketu-ala'di Au bi'ilopong-ngala esa esa, fo Au ta'da fe'e malole-a neme mangalauk-ka mai.

²³ Neukose Au so'u manek esa, fo sama-na leo Au atang Dauk, soaneu ana da'di sila manafoo kisan-na, fo nakabobois.

²⁴ Au, Manetualain, neukose da'di sila Manetualain, ma manek fo, sama-na leo Au atang Dauk ndia, neukose ana da'di sila manakoasan-na. Au, Manetualain nde manakokolak-ka.

²⁵ Naukose, Au tao hehelu-balataak o sila, ma Au anea sila so'dan-na. Neukose, Au usiheni basa bana makaak-kala leme nusak-ka lala'en-na mai, nalosa Au bi'ilopong-ngala hapu leo no nee-nee lino-linok lai mook-kala, ma lai nula-la dalek.

²⁶ Neukose Au fes baba'e-papalak, ma Au fes loak, fo ala leo lai Au pupuku malalao-malalafung-nga, boboa-kaisun. Metema ala paluu u'dan soona, neukose Au fes.

²⁷ Neukose ai-la laboa, tina-osi fe buna-boa malole, ma basa hataholi-la, neukose ala leo no nee-nee lino-linok nai sila daen dale. Metema, Au tao ketu namosina fo, manapa'a Au anang-ngala, ma Au soi-tefa alas leme hataholi fo, manataos da'di ata mai soona, besak-ka ala bubuluk, lae Au nde Manetualain-na.

²⁸ Neukose leoina fo, ta lalelak Au fa, ta lamanako hata-heton-nala so'on, do bana makaak-kala, kaa fas. Neukose laso'da no tetu-temak, ma ta hapu hataholi nakabibiik-kasa so'on.

²⁹ Neukose Au fe tinan-nala, labuna-laboa no malole, nalosa ta lamala'a-lamandoe lai nusak ndia so'on. Neukose leoina fe'ek-kala, ta lakamumulu-lakamamaek-kasa so'on.

³⁰ Soona besak-ka, basa hataholi-la ala bubuluk, lae Israel nde been-na, Au anang, ma lae Au asulu-ahapas. Au, Manetualain Fo Mademaina, nde manakokolak-ka.

³¹ Tete'ek-ka, Au bi'ilopong-ngala nde emi, de Au fe emi mi'a. Emi nde been-na Au anang, ma emi Manetualaim nde Au. Au, Manetualain Fo Mademaina, nde manakokolak-ka.”