YESKIAL 32 - Susula Malalaok Hehelu Palak Ma Hehelu Beuk

Mane Masir-ra nananakasasamak no beis-sa

¹ Nai hataholi Yahudi-la bula ka sanahulu duan-na, fain esa, fo nai lelek ami nai mamana tu'u-tapak, nai teu ka sanahulu duan-na, Manetualain nafa'da au nae,

² “Hai hataholi daebafak fo, manasapu-manalalok-konei, fe nasanene'da mahelek neu Mane Masir-ra. Fo manduku-malosak Au hala hehelung-nga nde ia neun mae, ‘O heo-haam sama leo singa molisoluk-ka nai leoina-la tala'da, tehu o lupam-ma sama leo beis-sa naso'da nai oe dale. O tao kelupua basa lee lala'en-na oen-na nenik o eim-ma.

³ Nai lelek, leoina-kala lakabubua soona, neukose Au dala ala o nenik Au dalang-nga, fo Au po'ilotak leoina-kala, ala loso o leo dae ma'dak lain mai.

⁴ Neukose Au bala o muu dae lain, fo Au adenu basa manupui-la, boema basa bana lala'en-na leme daebafak-ka mai, fo la'a o.

⁵ Boema, Au ho'i-a o isi pulu-kaboom ndia, fo Au nggali tapasasalas leo letek-kala poin-na, ma leo bafak-kala dalek neu.

⁶ Au do'doheni o daam-ma, nalosa basa letek-kala lakadoe, ma basa lee-la, henuk no o daam-ma.

⁷ Nai hatematak fo Au tao amate-amopo o, neukose Au potiketu lalai-a, ma Au fe ko'de ndenuk-ka, poti-na nduuk-kala. Neukose Au afuni le'do nai ko'as-sa selik, ma neukose bulak-ka ta nasalaa fa.

⁸ Tete'ek-ka, neukose Au taoisa basa hata masalaak manai lalai-a lala'en-na, fo ta lasalaa fa, ma neukose Au tao-a daebafak-ka, ana da'di makahatuk. Au, Manetualain Fo Mademaina, nde manakokolak-ka.

⁹ Nai lelek Au po'a-benga halak la'eneu o mamatem-ma, nai nusa-nusak fo, o beita malelak-kasa fa soona, neukose dalen-nala ta tesa-tama fa.

¹⁰ Tete'ek-ka, metema Au leleuk Au tafainang-nga soona, neukose Au sengi o. Mane-manek-kala, ma leoina-kala, neukose lita Au tatao-nono'ing soaneu o ndia. Nai hatematak ndia, neukose ala dele bee-too no bibii-namata'uk-ka, ma ala dele ngge'be-ngge'be, nanahu ala bii sila mate.’ ”

¹¹ Manetualain Fo Mademaina, nafa'da mane Masir-ra nae, “Mane Babel-la, neukose ana leleuk tafainan-na, leo o neu.

¹² Neukose, Au adenu leoina-kala solda'dun fo, ta lalelak susue-lalaik-ka fa, ala fe'a-la sila tafainan-nala, fo ala taolisa basa o laum-mala lala'en-na.

¹³ Neukose Au taoisa o bana-manum nai lee-la su'un-na, fo sila mamana ninu oen-na. Nau hataholi do bana-manu boe, neukose ala ta tao kelupua lee sila-la oen-na so'on.

¹⁴ Soona Au tao amaneu basa lee manai o nusam-ma oen-na, ma Au fes ala faa no malole. Au, Manetualain Fo Mademaina, nde manakokolak-ka.

¹⁵ Metema Au tao Masir da'di moo solokae louk, boema Au tao amate-amopo basa hata fo manaleo manai ndia soona, neukose ala bubuluk, lae Au nde Manetualain-na.

¹⁶ Nasanene'da kahelek ia, neukose ana da'di nakamee, kikii-makaleleuk. Basa inak-kala leme leoina fe'ek-kala mai, fo neukose ala lakamee nakameek ndia, da'di leo ta'du-tana fafaluk ba'eneu Masir, ma basa laun-na lala'en-na. Au, ManetualainFo Mademaina, nde manakokolak-ka.”

Hataholi manamatek-kala mamanan-na

¹⁷ Nai hataholi Yahudi-la, bula ka esan-na, fain sanahulu lima, fo nai lelek ami nai mamana tu'u-tapak, nai teu ka sanahulu duan-na, Manetualain nafa'da seluk au nae,

¹⁸ “Hai hataholi daebafak fo, manasapu-manalalok-konei, kii-makaleleu ba'eneu laun manai Masir-ra. Haituas leo hataholi manamatek-kala mamanan-na leu, sama-sama loo nusa mabe'i-balakaik fe'ek-kala.

¹⁹ Mafa'das mae, ‘Emi maedaenga, emi nde mata-makeek nanseli do? Neukose emi kona leo, hataholi manamatek-kala mamanan-na meu, fo langapepe'uk emi nai hataholi fo ta lalelak Manetualain-na, tala'da.’

²⁰ Neukose leoina Masir-ra, ala mate sama-sama loo hataholi manamatek manai natee-natatik dale-la. Tafaina esa, nanasadia basak, soaneu ana taonisa basa sila lala'en-na.

²¹ Palani tatibatu-la, loo basa hataholi fo, ala latee-latati look Masir-ra, no namahokok, ala sipok hataholi Masir-ra mamain leo, hataholi manamatek-kala mamanan-na leu. Ala eki lae leo ia, ‘Hataholi fo, ta lalelak Manetualain ndia, ala mate nai natee-natatik dale so. Besak ia, ala mai leo ia mai, de latois nde ia!’

^22-23 Asyur maten de latoin nai naa, de solda'dun-nala laten-na, okofefeo-lan. Sila basa-basas, mate lai natee-natatik dale. Sila laten-nala, nai hataholi manamatek-kala mamanan-na, bui mate'en-na. Lelek bei laso'da, leni bibii-namata'uk nai daebafak-ka.

^24-25 Elam maten de latoi nai naa, de solda'dun-nala laten-na okofefeo-lan. Sila basa-basas mate lai natee-natatik-ka dale, tehu nanasunat bei tak-kala, boema ala kona leo hataholi manamatek-kala, mamanan-na leu. Lelek bei laso'da, leni bibii-namata'uk, tehu besak ia, mates so, de muse ala lu'a-lepa mamaek-ka, sama-sama loo hataholi manamatek manai natee-natatik dale-la.

²⁶ Mesekh ma Tubal maten de latois nai naa, de solda'dun-nala loo-laten okokfefeo-lan. Sila basa-basas mate lai natee-natatik-ka dale, tehu nanasunat bei tak-kala. Lelek bei laso'da, leni bibii-namata'uk nai daebafak-ka.

²⁷ Latoi-latonos, ta no ha'da-holomata, sama leo palani tatibatu nai tepo-lelek makahulun eli fa, fo ala kona leo hataholi manamatek-kala mamanan-na leu, no tafa-sisilo manadaik. Palani tatibatu sila-la, nanatoi-natonok, no tafainan-nala nai langan-nala, ma babaa fanan-nala, nai fanan-nala. Lelek bei laso'da, tee-tee sila palani tatibatu fo, lapalani lanseli, nalosa ala tao-la basa hataholi-la, ala bii-lamata'u.

²⁸ Neukose hataholi Masir-ra, nananatoi-natonok leondiak, lai hataholi fo, ta lalelak Manetualain, ma hataholi manamatek nai natee-natatik-ka dalek, tala'da.

²⁹ Edom no basa manen-nala, ma manapaletan-nala maten de latois nai naa. Makahulun-na, hataholi sila-la nde been-na, solda'du mabe'i-balakaik-kala, tehu besak ia, latois nai hataholi manamatek-kala mamanan-na, sama-sama loo hataholi manamate fe'ek fo, ta lalelak Manetualain fa.

³⁰ Basa maneana nusak kii-la, lai naa, leondiak boe, hataholi Sidon-nala. Makahulun-na, sila koasan-na neni bibii-namata'uk, tehu besak ia, no mamaek ma nanasunat tak, ala kona leo hataholi manamatek-kala mamanan-na leu, sama-sama loo hataholi manamatek manai natee-natatik-ka dalek. Ala mate nai naa, ma ala lu'a-lepa sala-singok, sama-sama loo hataholi manakona leo hataholi manamatek-kala mamanan-na leu.

³¹ Metema, mane Masir-ra no solda'dun-nala, ala losa hataholi manamatek-kala mamanan-na, fo lita basa hataholi manamatek manai natee-natatik-ka dalek soona, neukose lamahoko. Au, Manetualain Fo Mademaina, nde manakokolak-ka.

³² Au nde tataong mane Masir-ra, neni bibii-namata'uk fe hataholi maso'dak-kala, tehu neukose mate ndia no solda'dun-nala, fo mate basas sama-sama loo hataholi fo, ta lalelak Manetualain fa, ma hataholi manamatek manai natee-natatik-ka dalek. Au, Manetualain Fo Mademaina, nde manakokolak-ka.”