YESKIAL 30 - Susula Malalaok Hehelu Palak Ma Hehelu Beuk

Neukose Manetualain huku Masir

¹ Manetualain kokolak seluk nae,

^2-3 “Hai hataholi daebafak fo, manasapu-manalalok-konei, mafa'da leoina Masir-ra, hata fo Au Manetualain Mademaina nafa'da neus. Maloo bou-bou, ma kii-makaleleu mae leo ia: Awii! Manetualain fain-na deka so! Neukose Ana naketu-nala'di no lai-laik. Faik ndia, makahatuk nasakoko'a, Lelek leoina-la, ala sipo sila huhukun-na.

⁴ Neukose Sudan hapu soe matuaina. Neukose natee-natatik-ka, ana da'di nai Masir. Hataholi mates-sala, neukose beseleka neuk-ka; Nakodaa-la, lamanako nai nusak-ka lala'en-na, ma ala tao lakalulutuk nusak-ka.

⁵ Nai natee-natatik ndia dalek, ala taolisa solda'du nanase'ba-baek-kala leme Sudan, Lidia, Libia, Arab, Kub ma nakalenak, neme Au leoinang-ngala mai boe.”

⁶ Manetualain Fo Mademaina, nafa'da nae, “Neme Migdol, fo nai kii, losa Aswan, fo nai kona, ma basa hataholi manalook Masir-ra, neukose mates lai natee-natatik dale. Ma solda'du Masir fo, manakoa-ndaeaok sila-la, neukose lakalulutuk. Au Manetualain Fo Mademaina, nde manakokolak-ka.

⁷ Neukose nusak ndia, ana da'di nusa louk, nai nusa louk fe'ek-kala tala'da, ma kotan-nala, neukose ala da'di ai-batu manatapasasalak.

⁸ Metema Au hotuheni Masir, ma Au taoisa la'iesak hataholi manalook-kana soona, besak-ka ala bubuluk, lae Au nde Manetualain-na.

⁹ Metema faik ndia, ana losa, ma Masir nakalulutuk soona, neukose Au adenu hataholi-la loo ofak-kala leu, fo ala tao langgengek hataholi Sudan-nala, soona neukose ala bii-lamata'u. Tete'ek-ka, neukose faik ndia, ana mai!”

¹⁰ Manetualain Fo Mademaina, nafa'da nae, “Neukose Au pake Mane Nebukadnezar-ra neme Babel mai, fo ana tao nakalulutuk basa Masir su'i-beten lala'en-na.

¹¹ Nebukadnezar no basa solda'dun fo, ta lalelak susue-lalaik ndia fa, neukose ala mai, fo ala tao lakalulutuk dae ndia. Neukose ala sapu-la Masir nenik tafaina, soaneu ala ta'tilisa hataholi-la, fo lalefule'ak nai nusak ndia.

¹² Neukose Au tao ama'da Lee Nil-la, ma Au fe Masir lala'en-na, leo hataholi mangalauk-kala neu. Neukose Au adenu hataholi nusa dea-la, fo ala tao lakalulutuk nusak ndia lala'en-na. Au fo Manetualain, nde manakokolak-ka.”

¹³ Manetualain Fo Mademaina, nafa'da nae, “Neukose, Au tao akalulutuk sosongo-tatangok, ma lamatua daebafak fo, manai Memfis-sala. Neukose ta hapu seluk manek, nai Masir fa. Neukose, Au tao-a basa laun-nala lala'en-na, ala bii-lamata'u.

¹⁴ Neukose Au tao Masir kona, da'di nusa louk, ma neukose Au hotuheni kota Soan-na, fo nai kii. Neukose Au hotuheni Tebe, fo kotaina ndia,

¹⁵ ma Au tao akalulutuk su'i-beten-nala. Neukose Au kalua Au nasa-melung neu kota Pelusium, fo ana da'di Masir kota musun-na,

¹⁶ de neukose kota ndia, ana doi-doso nanseli, tete'ek-ka, neukose Au hotuheni Masir. Neukose ndefaheni kota Tebe, papala nanadaman-nala, ma neukose faa la'e kota ndia.

¹⁷ Kota Heliopolis ma kota Bubastis-sa, toana muli-solun-nala, neukose mates lai natee-natatik dale, ma inak-kala, neukose nanafoo nenik.

¹⁸ Nai faik fo, Au tao ate'e Masir paletan-na, ma Au ho'i-a koasan-na soona, neukose makahatuk-ka poti-na kota Tahpanhes-sa, ma inan-nala, neukose nanafoo nenik

¹⁹ Neukose Au huku Masir leondiak, soona besak-ka ala bubuluk, lae Au nde Manetualain-na.”

Masir paletan-na nate'e

²⁰ Nai hataholi Yahudi-la bula-ka ka esan-na, fain hitu, fo nai lelek ami nai mamana tu'u-tapak, nai teu ka sanahulu esan-na, Manetualain nafa'da au nae,

²¹ “Hai hataholi daebafak fo, manasapu-manalalok-konei, Au helula'di mane Masir-ra alun-na so, de ta hapu manapuli-namo'do do manatusi alun ndia, fo ela ana lea-hai, fo ana bisa ho'u nabe'i tafaina seluk.

²² Au Manetualain Fo Mademaina, afa'da ae, Mane Masir-ra, musun-na nde Au ia, de neukose Au helula'di alun duas, nau bei neulauk-ka, do la'di basak-ka so. Soona neukose tu'daheni tafaina ndia, neme liman dale mai.

²³ Neukose, Au tao tapasasala hataholi Masir-ra, leo basa daebafak-ka lalaena neu.

²⁴ Boema, neukose Au tao atea-ahele manek Babel-la alun-na, fo Au pe'da Au tafainang-nga neu liman dale. Tehu, neukose Au helula'di mane Masir-ra alun-na, nalosa ana nakadii-nakaau, de maten nai musu noon fo manek Babel-la, matan.

²⁵ Tete'ek-ka, neukose Au tao-a mane Masir-ra, ana male, tehu Au tao atea-ahele manek Babel-la. Metema Au fen Au tafainang-nga, fo ana leleuk-kana nasale leo Masir neu soona, neukose ala bubuluk, lae Au nde Manetualain-na.

²⁶ Neukose, Au fe hataholi Masir-ra, ala tapasasala leo basa daebafak-ka lala'en-na neu. Soona besak-ka ala bubuluk, lae Au nde Manetualain-na.”