YESKIAL 28 - Susula Malalaok Hehelu Palak Ma Hehelu Beuk

Mane Tirus-sa nanahukuk

¹ Manetualain nafa'da au nae,

² “Hai hataholi daebafak fo, manasapu-manalalok-konei, mafa'da mane Tirus-sa, hata fo Au, Manetualain Fo Mademaina nafa'da neun, ‘No koao-ndaeaok, o mafa'da mae o nde been-na lamatua daebafak, fo o mangatuuk nai kandela manek-ka, nai tasi-a tala'da heon. O bole tao o aoinam-ma, da'di leo lamatua daebafak, tehu mafandendelek leona te, o ka'da hataholi daebafak biasa mesak-kana.

³ O maedaenga, o malelam-ma lena heni Danel, nalosa o bubuluk basa dede'a nananafunik lala'en-na.

⁴ O pake o manatee-tenom-ma, ma o malelam-ma, soaneu o hapu hata-heto, lilopilas, ma lilofulak.

⁵ Memak o dangan malelak, de besak ia, o mamasu'i hatu-hatu so, de o su'i-betem ndia, ana tao-na o koao-ndaeao!’ ”

^6-7 Manetualain Fo Mademaina, nafa'da nae, “Hai Tirus, hu kande o tao o aoinam-ma, da'di sama leo Manetualain, de neukose Au adenu solda'du nusa dea fo, ta lalelak susue-lalaik-ka fa, ala mai fo, ala sapu-la o.

⁸ Neukose ala tao lakalulutuk o tetu-temam fo, o hapun neme o manatee-tenom, ma o malelam-ma mai ndia. Neukose ala taolisa o, fo latoi-latono o nai tasi dale.

⁹ Nah, metema faik ndia losa soona, o bei bisa mafa'da mae Manetualain nde o do? Nai o hataholi kanisam-mala matan, ala bubuluk lae o ia, ka'da hataholi daebafak mesan.

¹⁰ Neukose o mate sama leo hataholi matasi'da-matasaek, nanahu hataholi fo ta lalelak Manetualain-na, nde taolisa o. Au, Manetualain Fo Mademaina, nde manakokolak-ka.”

Mane Tirus-sa tutu'dan-na

¹¹ Manetualain nafa'da seluk au nae,

¹² “Hai hataholi daebafak fo, manasapu-manalalok-konei, kii-makaleleu soaneu mane Tirus-sa leona. Manduku-malosak hata fo Au, Manetualain Fo Mademaina, nafa'da neun nae, ‘O da'di hai dulak neme matetu-mandaak-ka mai so; makahulun-na, te'e-te'e o manatee-tenok ma mata-pana makeek!

¹³ O mamana leleom-ma nai Eden, fo Manetualain osin-na. O bua papakem-mala, nanabalias nenik poemata mata-matak-kala fo nde: batu dalima dula pilas, batu poemata dula fula-momo'dok, batu poemata dula kunik, batu poemata dula balau, batu poemata dula momo'dok, batu poemata dula kunik mangadilak, batu poemata dula kunik lilopilas, batu poemata dula balau, batu poemata dula momo'dok ma batu alkali pilas. O bua-lo'a lilopilam-mala boeo makadotok. Bua-lo'as sila-la, nanataok soaneu o, nai faik fo o nananakadada'dik-ka.

¹⁴ Au fe ata nusa so'dak fo, mata-panan nakatata'u, nanea o nai ndia. O leo nai Au lete malalao-malalafung lain, ma o la'ok nai batu poemata mangadilak-kala tala'da.

¹⁵ O ha'da-tataom matetu-mandaak, mulai neme o nananakadada'dik-ka mai, losa o mulai tao tatao-nono'i mangalauk.

¹⁶ O langam-ma dila no ka'da nase'o-banasak-ka, de ndia nde neni o leo naseti-nalakak-ka ma sala-singok-ka neu. Boema, Au usiheni o meme Au lete malalao-malalafung-nga mai, de ata nusa so'dak manamanea o-a, ana usiheni o meme batu poemata mangadilak sila-la, tala'da mai.

¹⁷ O mata makeem-ma, ana tao-na o koao-ndaeao, ma o na'de nanakoa-nanakiom-ma, ana tao-na o, tao tunga o nggoam-ma. Hu ndia de, Au bala o muu dae lain, fo Au taon da'di nasanene'dak ba'eneu mane fe'ek-kala.’ ”

¹⁸ Manetualain nafa'da nae, “Hai Tirus, o tao manggenggeo o mamana huhule-haladoim-mala, nanahu nai lelek o mase'o-banasa, o tao salak ma o ta tao tunga ndoon-na fa. Hu ndia de, Au hotuheni o, nalosa o da'di afu nai dae lain. Basa hataholi manamete o-a, lita ka'da afu-a mesak-kana.

¹⁹ Basa leoina fo manalalelak o-a, ala nggenge-la, nanahu ala bii, boso nalosak sila ua-nalen leondiak boe.”

Dede'a nananafa'da elak la'eneu huhukuk ba'eneu Sidon

²⁰ Manetualain nafa'da au nae,

²¹ “Hai hataholi daebafak fo, manasapu-manalalok-konei, soo-supa kota Sidon-na.

²² Mafa'da laun-nala mae Au, Manetualain Fo Mademaina, nafa'das nae, ‘Hai Sidon, o musum-ma nde Au ia. Neukose hataholi-la, ala koa-kio Au, nanahu Au tatao-nono'ing soaneu o-a. Nai lelek Au huku o laum-mala, neukose ala bubuluk lae Au nde, Manetualain fo malalao-malalafuk-ka.

²³ Neukose Au fe he'di-laus mai, de nemen-na fo, daak-ka faa nai o enom-mala lain. Neukose musu-a, ana sapu-na o neme mamanak lala'en-na mai, fo ala taolisa o laum-mala. Soona besak-ka o bubuluk, mae Au nde Manetualain-na.’ ”

Neukose Israel nanaba'e-palak

²⁴ Manetualain nafa'da nae, “Nusa-nusak manai Israel titia-tatain fo, lakamumulu-lakamamaek hai Israel-la, neukose ala ta da'di dila-nggauk fo ala hina Israel so'on. Soona besak-ka ala bubuluk, lae Au nde Manetualain Fo Mademaina.”

²⁵ Manetualain Fo mademaina, nafa'da nae, “Neukose Au aloo akabubua basa hataholi Israel-la, leme leoina-kala tala'da mai, fo nai bee, Au tao tapasasalas-sala, fo ela basa leoina-kala bubuluk, lae Au malalao-malalafuk. Neukose leoina Israel-la, ala leo seluk lai sila daen dale, dae fo Au fe basan neu Au atang Yakob so.

²⁶ Neukose, ala laso'da no nee-nee-lino-linok lai ndia, fo lafofo'a sila uman-nala, boema ala tao osi angol. Neukose, Au huku basa sila nusa titia-tatain fo, lakamumulu-lakamamaek-kasa, nalosa Israel da'di nee-nee lino-linok. Soona besak-ka ala bubuluk, lae Au nde sila Manetualain-na.”