YESKIAL 24 - Susula Malalaok Hehelu Palak Ma Hehelu Beuk

Ulek fo malulutuk-ka

¹ Nai hataholi Yahudi-la, bula ka sanahulun-na, fain sanahulu, fo nai lelek ami nai mamana tu'u-tapak, teu ka sion-na, Manetualain nafa'da au nae,

² “Hai hataholi daebafak fo, manasapu-manalalok-konei, sulak-ma, bula ka fain, faik ia, nanahu faik ia, manek Babel-la, ana mulai nakahapi-na Yerusalem.

³ Au, Manetualain, anuu nakandandaak esa ia, soaneu manduku-malosak-kana neu Au anang fo, ala hii ka'da lena-la'ban sila: Di'a oe leo ulek dale neu, soona so'un leo la'o lain neu.

⁴ Tao paa neulauk mesa-mesan, leo dalek neu: fo paa isi neulauk; fo nde ei buik ei aluk isin-na, boema duik fo, dodolen ba'uk-ka.

⁵ Pake bi'ilopo maao paan-na, boema boso pake bi'ilopo lasik paan-na. Tu'tuk ai ha'i ba'uk-ka neu, fo paa nakadoto pesi-pesi. Nasu paa ndia no duin-nala.”

⁶ Manetualain Fo Mademaina, nafa'da nae, “Soe ba'eneu kota fo henuk no kanisak-ka! Kota ndia, sama leo ulek-ka nalulutu, fo beita lose nita fan. So'deheni paa manai ulek ndia dalek-ka, biak esa-esa, fo boso ela biak esa boen.

⁷ Kanisak-ka, ana da'di nai kota ndia, tehu daan-na, ana ta faa leo dae lain neu fa, te ana faa leo batu mateaina lain neu, nalosa ta bisa nakadofu ketu fan.

⁸ Au po'ilotak daak ndia neme ndia, nalosa hapu nananitak, fo noke babalak.”

⁹ Manetualain Fo Mademaina, nafa'da nae, “Soe ba'eneu kota fo henuk no kanisak-ka! Au mesang-nga nde, neukose akaduduluk ai fo hotuheni kota ndia.

¹⁰ Tama seluk ai ha'i-na! Nggengge'u mahele ha'i-na! Nasu paan-na leona! Po'aheni paa oen-na. Hotuheni duin-nala!

¹¹ Besak ia, fua ule liti louk ndia leo ha'i lain neu, fo nemen-na, losa ana pila lo'a-lo'a. Metema, ha'i-a na'aheni basa lulutun-na soona, neukose ulek ndia balisi seluk, tunga agama nakaneneten-nala.

¹² Tehu, ha'i-a ta na'aheni la'iesak lulutun-na fa.

¹³ Hai Yerusalem, o tatao-nono'i ha'da hataholi taa-ma, tao nanggenggeo o aoinam-ma. Au so'ba, tao balisi o, tehu sosoa-ndandaan ta, nana o manggenggeok mahele. Neukose, o ta balisi seluk so'on, losa Au kalua Au nasa-melung neu o.

¹⁴ Au, Manetualain Fo Mademaina, kokolak basa so. Fain-na losa so, ba'eneu Au mulai tao hata esa. Neukose, Au ta afandele heni o sala-singom fa, ma Au ta fe do'o do ampon neu o, do Au sue-lai o fa. Neukose o nanahukuk, nandaa no o tatao-nono'im lala'en-na. Au Manetualain Fo Mademaina, nde manakokolak-ka.”

Nabi saoinan-na mamaten-na

¹⁵ Manetualain nafa'da au nae,

¹⁶ “Hai hataholi daebafak fo, manasapu-manalalok-konei, neukose no kaiboianak, Au ho'i-a hataholi fo, o sue-lai man, ba'un-na seli. Tehu, o ta bole makaleleu do kii fa, do o luu oem-ma, ana ti'ti boe.

¹⁷ Boso nalosa o kii masakeke'du fo, hataholi namanene. Pake o fefeo langam-ma, ma pake o ta'bu eim-ma, boso poti ketu o mata-panam, ma boso mu'a loti fafaluk-ka.”

¹⁸ Au kokolak o leoina ndia, nai fai fafain-na, de le'odae boema mate au saong-nga. Balahaa boema, au tao tunga hata fo Manetualain paletan neu au.

¹⁹ Boema laun-nala latane lae, “Tao le'e de, Ama tao leondiak? Sosoa-ndandaan le'obeek ba'eneu ami?”

²⁰ Boema au ataas ae, “Manetualain nadenu au

²¹ anduku-alosak hala heheluk-ka nde ia neu emi: Emi dalem-ma namatua neu Manetualain Uman-na be'i-balakain. Emi hii meten fo emi meu donge-daman, tehu neukose Manetualain tao nanggenggeo Uman-na. Ma o teidalem fo bei muli-solum fo manaleo manai Yerusalem-ma, neukose nanataonisak nai natee-natatik dale.

²² Boema neukose, emi tao sama leo au taon besak ia boe. Neukose emi ta poti ketu emi mata-panam, do mi'a loti fafaluk-ka fa.

²³ Neukose emi la'ok no ta pake fefeo langak, do pake ta'bueis, do makaleleu, do kii fa. Neukose emi makalulutuk, hu kande emi sala-singom-mala; neukose emi esa haladoi neu esa.

²⁴ Soona au, Yeskial da'di natutu'duk ba'eneu emi; neukose emi tao sama leo hata fo au taon besak ia boe. Manetualain nafa'da nae metema, dede'ak ndia ana da'di soona, neukose emi bubuluk mae Ndia nde, Manetualain Fo Mademaina.”

²⁵ Manetualain nafa'da au nae, “Nah, hataholi daebafak fo, manasapu-manalalok-konei, Au Umang fo matea-mahelek ndia, fo ana tao-na sila dalen-nala lamatua ma lamahoko, ma ala meten fo leu donge-daman no dale namahokok-ka, neukose Au ho'i-an neme sila mai. Boema, neukose Au ho'i-a sila anan-nala boe.

²⁶ Nai faik fo, Au tao dede'ak ndia soona, neukose hataholi esa naso'da neme mamate-momopok ndia mai, de ana mai fo nanduku-nalosak halak ndia neu o.

²⁷ Nai faik ndia boe, neukose o ta da'di hala tak so'on, te o bisa kokolak seluk so. Boema, neukose o kokolak moo hataholi ndia. No enok ndia, neukose o da'di ta'du-tana ba'eneu hataholi sila; soona besak-ka ala bubuluk, lae Au nde Manetualain-na.”