YESKIAL 23 - Susula Malalaok Hehelu Palak Ma Hehelu Beuk

Hataholi dua ka'a-fa'dik-kala, lasala-lasingo

¹ Manetualain kokolak no au nae,

² “Hai hataholi daebafak fo, manasapu-manalalok-konei, hapu inak dua, ka'a-fa'dik.

³ Nai lelek bei muli-solun-nala, ala leo leme Masir. Mopo na'de anafe'oanan-nala neme Masir, de ala da'di ina manasosoa-piaok.

⁴ Ka'ak-ka na'de, Ohola; fo nde Samaria. Fa'dik-ka na'de, Oholiba; fo nde Yerusalem. Au sao-a duas, de Au hapu anak neme duas mai.

⁵ Leomae Ohola ana da'di Au saoinang so, tehu ana bei sosoa-piao nahele, de ana manggate nanseli, nalalau-naoono tou susue-lalain-nala leme Asyur mai.

⁶ Hataholi Asyur sila-la nde been-na, solda'du manapake bua papake pila balanggeok-kala, manefetoana-la, manapaleta matua-madema-la; basa-basas malanga solda'du matuaina, nai solda'du manasa'e ndala-la, ma mata-pana makeek mesa-mesan.

⁷ Ohola sosoa-piao no manapaleta matua-madema sila-la. Bai te, hu kande nasa sosoa-piaon nasuu nanseli, de ana tao nanggenggeo aoinan-na, nenik ana sene-do'ok neu hataholi sila sosongo-tatangon-nala.

⁸ Ana sosoa-piao nakandoo, sama leo makahulun-na, ana sosoa-piao neme Masir, nai lelek mopo na'de anafe'oanan-na. Nai lelek bei anan-na, hataholi sungu non so, de ala taon da'di leo ina manasosoa-piaok.

⁹ Hu ndia de, Au fen leo tou susue-lalain-nala neu, fo nde hataholi Asyur fo, nahiik-kasa nanseli ndia.

¹⁰ Ala o'du lakaholak-kana no nakasetik, boema ala taolisan nenik tafaina, de ala loso-la anan-nala. Inak-kala kokolak na'den-na, nai basa mamanak lala'en-na.

¹¹ Fa'din Oholiba, nita manada'dik ndia, tehu ndia nasa sosoa-piaon-na nasuu lenaheni Ohola.

¹² Oholiba boeo, nahiik nanseli no hataholi Asyur sila-la, fo nde ta'eana mata makeek-kala leme solda'du manasa'e ndala-la mai, basa manefetoana-la, manapaleta matua-madema-la, boema solda'du manapake bua papake pila balanggeok sila-la.

¹³ Au ita Oholiba ndia, ana tao nanggenggeo aoinan-na, sama leo ka'an-na boe.

^14-15 Nakalenak, ana boetai sosoa-piao seluk; nahiik nanseli neu dula-dulak fo manadokik manai papala-la, boema ala cet dulak sila-la, nenik cet pilas sama leo daak-ka. Dulak sila-la, nde malanga solda'du matuaina Babel-la, loo kalikee mana'ahiik, ma fefeo langak mafifikok-kala.

¹⁶ Lelek Oholiba nita dulak sila-la boema, nasa sosoa-piaon fo'a, de ana ka'i malanga solda'du matuaina manai Babel sila-la,

¹⁷ Boema ala mai de, ala sungu loon. Ala tao langgenggeo na'den-na nenik sosoa-piaon ndia, nalosa neu mate'en-na, ana malua seluk-kasa.

¹⁸ Basa ndia boema, ana sosoa-piao no le'do-le'dok, ma natu'du aoinan-na nai lea matan. Au meten soona, Au malua, sama leo Au malua ka'an-na.

¹⁹ Ana boetai sosoa-piao, sama leo bei muli-solun-na, fo nai lelek ana sosoa-piao neme Masir-ra.

²⁰ Nasa sosoa-piaon-na, nasuu nanseli neu touk-kala, sama leo ndala mane manasanga ndala ina. (

²¹ Hai Oholiba, o mahiik tao seluk o tatao-nono'i mangalaum fo, o tao-no'in nai lelek o bei muli-solum-ma, ma nai lelek hataholi Masir-ra, ala de'i o.)”

Manetualain naketu-nala'di Oholiba

²² Manetualain Fo Mademaina, nafa'da nae, “Hai hataholi daebafak fo, manasapu-manalalok-konei, o pela-malua o tou susue-lalaim-mala so, tehu neukose Au dudungu-papaus, fo ela lamanasa o fo lakahapi-la o.

²³ Neukose, Au aloo akabubua basa o tou susue-lalaim-mala, fo Au os leo o mai. O tou susue-lalaim fo leme Babel, Pekod, Soa, Koa, Asyur, boema hataholi Kaldea-la. Au o ta'eana mata-makeek fo, ala hapu nangatutuu madema, manefetoana-la, manapaleta mademaina-la, ma malanga solda'du matuaina fo manasa'e ndala-la, leo o mai.

²⁴ Neukose loo solda'du makadotok, kaleta musu-la, ma kaleta manafua tua-lepa-la, fo ala sapu-la o neme kii mai. Ala pake babaa fanak, ma ti'ilanga bai, fo lakahapi-la o. Neukose, Au po'ilotak-kasa laketu-lala'di o, tunga sila hoholo-lalanen.

²⁵ Hu kande Au amanasa o, de Au po'ilotak-kasa, ala tao o no ta pake dale susue-lalaik fa. Neukose, ala kee heni o panam-ma, ma o di'idoom-ma, boema ala ho'u-la o anam-mala fo ala tu'us leo ha'i lai neu, fo ha'i-a hotu nisas.

²⁶ Neukose, ala o'du lakaholak o, ma ala loso-la o lilo-henum.

²⁷ Neukose, Au tao ate'e o nasa sasao-anam manafo'am-ma, ma basa sosoa-piaok lalaen fo, o taon nai lelek o bei meme Masir-ra. Neukose o ta mamahena neu sosongo-tatangok matak leo beek-ka, do mafandele Masir so'on.”

²⁸ Manetualain Fo Mademaina nafa'da nae, “Neukose Au fe o leo hataholi nanamaluak fo o tamahiik-kasa fa.

²⁹ Nanahu hataholi sila-la ta lahiik loo o fa, de neukose ala loso-la basa o tutunga-sasangam lala'en-na. Neukose ala la'oela o da'di leo ina manasosoa-piao makaholak, fo o da'di bua nanananiluk nai lea matan. O nasa sasaoana manafo'am-ma, ma o manasosoa-piaom-ma nde

³⁰ neni fe o ua-nale mangalauk ia. O da'di ina manasosoa-piaok ba'eneu leoina-kala, ma o tao manggenggeo o aoinam-ma nenik leoina sila-la sosongo-tatangon-nala.

³¹ O tunga o ka'am ei tata'bun-na, hu ndia de, neukose Au huku o nenik huhukuk fo sama no o ka'am huhukun-na.”

³² Manetualain Fo Mademaina nafa'da nae, “O muse minu o ka'am mangoteen-na, isin-na Mangotee ndia, matua ma madema. Isin-na henuk no hakinonolik ma nakamumulu-nakamamaek-ka, fo o muse lu'a-lepan neme basa hataholi lala'en-na mai.

^33-34 O ka'am Samaria mangoteen-na, isin-na bibii-namata'uk ma nakalulutuk-ka. O minu basa isin-na lala'en-na soona, neukose o mafuk ma o doi-doso. Ma neukose o sisii-lulu'i o fanam-ma, nenik mangotee ndia bibian-nala Au, Manetualain Fo Mademaina, kokolak basa so.”

³⁵ Manetualain Fo Mademaina, nafa'da nae, “Hu kande o mafandeleheni Au, ma o masadea Au so, de neukose o doi-doso hu kande o nasa sasao-aanam manafo'am-ma, ma o manasosoa-pioam-ma.”

Manetualain huku hataholi ka duak fo ka'a-fa'dik sila-la

³⁶ Manetualain nafa'da au nae, “Hai hataholi daebafak fo, manasapu-manalalok-konei, o maheheleaom basa soaneu maketu-mala'di Ohola ma Oholiba so do? Kena-ka'is la'eneu tatao-nono'i ta kandaak fo, ala tao-no'i basan ndia so.

³⁷ Ala tao-no'i tatao-nono'i hohonge ma kanisak; ala hohonge basa loo sosongo-tatangok-kala, ma ala taolisa, ala bongi fe Au ni'iana-la. Ala tunu-hotu fe ni'iana sila-la, neu sila sosongo-tatangon-nala so.

³⁸ Ma ta ka'da ndia fa. Sila boe, ala tao langgenggeo Au Umang-nga ma fai Sabat fo, Au aketu basan ndia so.

³⁹ Nai faik fo, ala taolisa Au anang-ngala, ma ala tunu-hotu fes neu sosongo-tatangok-kala, hataholi ka'a-fa'di ka duak sila-la, ala mai leo Au Umang-nga mai, de ala tao langgenggeon!

⁴⁰ Nakalenak bai, ala laloo ta'eanak-kala leme nusa dook-kala mai, de ta'eanak sila-la, ala tao latetu sila hala naloloon ndia. Soaneu sipok fui sila-la, de hataholi ka'a-fa'di ka duak sila-la, ladiu oe, ala lose badaa nggeok neu mata loun-nala, ma ala pake sila lilo-henun-nala.

⁴¹ Beoma langatuuk leu pepe'u manahiik lain. Nai matan-nala, hapu mei esa, henuk no nana'a-nininuk, boema Au fes boomenik ma mina setun-na, lai mei ndia lain boe.

⁴² Lamanene hataholi makadotok lakalupu lai deak, nanahu lamahoko lanseli. Laloo hataholi sila-la, leme moo solokaek-ka mai. Hataholi sila-la, ala o'du suek neu hataholi ka'a-fa'di ka duak sila-la liman-nala, ma ala tao bulamoli mana'ahiik-kala neu langan-nala.

⁴³ Boema, Au dodoo ae, ‘Ade, hataholi sila-la, ala bei nau lakaminak susue ina-anafe'ok loo manasosoa-piaok fo, ala male hu kande manahohongen-nala ndia do?’

⁴⁴ Hataholi-la, ala mai langganggatiaok, leo Ohola ma Oholiba, manasosoa-piaok fo na'de manggenggeok sila-la.

⁴⁵ Tehu neukose, hataholi ndoos-sala laketu-lala'di hataholi ka'a-fa'di ka duak sila-la, nenik enok hohonge, ma kanisak-ka, nana memak sila lasala so.”

⁴⁶ Manetualain Fo Mademaina, nafa'da nae, “Maloo-ma, hataholi malenalanga-masa'basook bubuak esa, fo ala fepa-li'u ma lamanako hataholi ka'a-fa'di ka duak sila-la.

⁴⁷ Nemen-na fo, ala tapas lenik batu, ma ala sapu-lalas lenik tafaina. Nemen-na fo, ala do'dolisa anan-nala, ma ala hotuheni duas uman-na.

⁴⁸ Neukose, Au tao amopo basa tatao-nono'i mangalauk leondiak-ka, nai basa nusak-ka lala'en-na. Au tataong ndia, neukose ana da'di nasanene'dak ba'eneu inak lala'en-na, fo ela ala boso hohonge, sama leo hataholi ka'a-fa'di ka duak sila-la.

⁴⁹ Hai Ohola ma Oholiba, neukose Au huku emi, nanahu emi hohonge, ma emi sene-do'ok neu sosongo-tatangok-kala. Soona besak-ka emi bubuluk, mae Au nde Manetualain Fo Mademaina.”