YESKIAL 20 - Susula Malalaok Hehelu Palak Ma Hehelu Beuk

Manetualain hihii-nanaun, ma hataholi daebafak-ka tatao-nono'i mangalaun-na

¹ Nai hataholi Yahudi-la bula ka lima-na, fain sanahulu, fo nai lelek ami nai mamana tu'u-tapak, teu ka hitun-na, boema mauli-malangan Israel de'ubee, ala mai leo au mai, fo loke natutu'duk neme Manetualain mai. Langatuuk basa lai au matang-nga boema,

² au amanene Manetualain nafa'da au nae,

³ “Hai hataholi daebafak fo, manasapu-manalalok-konei, kokolak moo mauli-malangan sila-la, fo mafa'das mae Au, Manetualain Fo Mademaina, nafa'da nae leo ia, ‘Emi mapalani manseli, moke natutu'duk neme Au mai! No Au, Manetualain fo maso'dak-ka na'den-na, Au ta nau emi moke Au natutu'duk fa! Au, Manetualain Fo Mademaina, nde manakokolak-ka.’

⁴ Hai hataholi daebafak fo, manasapu-manalalok-konei, ade, o sadia basa soaneu maketu-mala'dis so do beik? Nah, taon leona! Fes nasanene'dak neu tatao-nono'i ta kandaak lala'en fo, sila bei-ba'i kain-nala tao-no'in.

⁵ Manduku-malosak hata fo Au afa'dan ia. Au hele basa Israel, de Au soo fes so. Au atu'du Au aoinang-nga neus, neme Masir, de Au afa'da ae, ‘Au nde Manetualain fo emi Manetualain-na.’

⁶ Nai lelek ndia, Au soo ae, neukose Au oos kalua leme Masir mai, fo leu leo Au hele fes nusak-ka leu. Nusak ndia kamasu'ik, ma maoe-maisik, dae fo malole nanseli, nai basa daebafak-ka lala'en-na.

⁷ Au adenus fo, ala tu'u-tapaheni, sila hii lanuu dodoki-dudulak fo nanamaluak sila-la, ma Au kena-ka'is, fo ala boso tao langgenggeo aoinan-nala nenik, ala sene-do'ok neu sosongo-tatangok maneme Masir sila mai, nana Au nde, sila Aman Manetualain-na.

⁸ Tehu, ala la'ban Au, ma ala ta nau lamanene Au fa. Ala ta nau tu'u-tapaheni dodoki-dudulak fo, nanamaluak sila-la fa, ma ala ta nau hahae sene-do'ok neu, sosongo-tatangok Masir sila-la boen. Nai lelek ala bei leme naa, Au sadia basa, fo sanga amanasas so.

⁹ Tehu, Au ta da'di amanasa fa, fo ela leoina manai sila mamanan-na, boso lakamumulu-lakamamaek Au na'deng-nga. Nana Au po'a-benga basa nai leoina sila matan, ae neukose Au o leoina Israel-la, kalua leme Masir mai.

¹⁰ Boema, Au os kalua leme Masir mai, de lakandoo leo moo solokaek-ka leu.

¹¹ Nai naa, Au fes Au paletang-ngala, ma Au anolis, Au hoholo-lalaneng fo, ala muse tungan, nana hataholi manatao tungan-na, neukose naso'da nahele.

¹² Au adenus fo, ala tao lalalao-lalalafu fai Sabat-ta, da'di leo ta'du-tana neu Au hehelu-balataang no sila, soaneu fes nasanene'dak, nae Au Manetualain, tao sila da'di Au ana heheling so.

¹³ Tehu, ala la'ban Au neme moo solokaek-ka boe. Ala la'olena Au paletang-ngala, ma ala ta sipok Au hoholo-lalaneng fo, metema hataholi-a tao tungan soona, naso'da nahele. Ala tao langgenggeo fai Sabat-ta, nanseli. Hu ndia de, bei leme moo solokaek-ka ndia, Au sadia basa, sanga kalua Au nasa-melung soaneus, fo Au tao amate-amopos.

¹⁴ Tehu, Au ta da'di amanasa fa, hu kande Au na'de malalao-malalafung-nga, fo ela leoina fo, lita Au o Israel kalua meme Masir mai-a, ala boso lakamumulu-lakamamaek Au na'deng-nga.

¹⁵ Nai moo solokaek ndia boe, Au fes nasanene'da mahelek, ae neukose Au ta o leoina Israel-la, masok leo Au sadia fes dae-a leu, dae fo kamasu'ik ma maoe-maisik, ma malole nanseli nai basa daebafak-ka lala'en-na.

¹⁶ Au kokolak nasanene'da mahelek ndia, nanahu ala ta taoafik neu Au paletang-ngala fa, ala la'olena Au hoholo-lalaneng, ma ala tao langgenggeo fai Sabat-ta. Ala hii ka'da sene-do'ok neu sila sosongo-tatangon-nala.

¹⁷ Tehu basa boema, Au daleng-nga tu'da kasian neus, nalosa Au ta da'di taoisa fas, leme moo solokaek-ka fa.

¹⁸ Nasafalin-na, Au anoli-afa'da sila ana muli-solun-nala ae leo ia, ‘Boso tunga emi bei-ba'i kaim-mala, tao nakanenetek-kala. Boso na'de dulak neme sila ha'da-tataon-nala mai, ma boso tao manggenggeo emi aoinam-mala nenik, sene-do'ok neu sila sosongo-tatangon-nala boe.

¹⁹ Au nde Manetualain, fo emi Manetualain-na. Tunga Au hoholo-lalaneng, ma Au paletang-ngala.

²⁰ Tao malalao-malalafu fai Sabat-ta, fo ela ana da'di ta'du-tana hehelu-balataak nai Au ma emi, fo ana fe emi nasanene'dak, nae Au nde, emi Amam Manetualain-na.’

²¹ Tehu, bobongi makabuik sila-la boeo, ala la'ban Au. Ala la'olena Au hoholo-lalaneng, ma ala ta taoafik neu Au paletang-ngala fa, fo metema hataholi-a, ana tao tungan soona, naso'da nahele. Ala tao langgenggeo fai Sabat-ta. Hu ndia de, Au sadia basa, sanga kalua Au nasa-melung soaneus nai moo solokaek, fo Au taoisa la'iesak-kasa.

²² Tehu, Au ta da'di amanasa fa, fo ela leoina fo, lita Au o Israel kalua neme Masir mai-a, ala boso lakamumulu-lakamamaek Au na'deng-nga.

²³ Nai moo solokaek ndia boe, Au soo ae neukose, Au tao tapasasalas leo basa daebafak-ka lala'en-na leu,

²⁴ nanahu ala ta taoafik neu Au paletang-ngala, ala la'olena Au hoholo-lalaneng, ala tao langgenggeo fai Sabat-ta, ma ala sene-do'ok lahele neu sila bei-ba'i kain-nala, sene-do'ok neu lamatua daebafak-kala.

²⁵ Basa boema, Au fes hoholo-lalanek ta malole, ma paleta-paleta fo, ta neni fes maso'dak fa.

²⁶ Au po'ilotak-kasa, fo ala tao langgenggeo aoinan-nala nenik, sila tutunu-hohotu mesan-nala, nakalenak bai, ala tao anatou ulun-nala, da'di tutunu-hohotuk. No enok ndia de Au hukus, fo ela ala bubuluk lae Au nde, Manetualain-na.

²⁷ Nah, hai hataholi daebafak fo, manasapu-manalalok-konei, mafa'da hataholi Israel-la hata fo Au, Manetualain Fo Mademaina, afa'das: Hapu buti fe'ek fo natu'du, tao leo beek de, sila bei-ba'i kain-nala lakamumulu-lakamamaek Au, ma ala ta lilineka neu Au fa

²⁸ Au os leo nusak fo, Au helu basa, Au fen leo sila neu so. Lelek fo, ala lita pupuku mademaina-ma, ma ai matuaina-la, doon-nala leloaka, boema leu tunu-hotu tutunu-hohotu nai mamanak sila-la. Ala tao-la Au amanasa, nanahu sila tutunu-hohotu nanatunun-nala, ma tutunu-hohotu angon-nala.

²⁹ Boema Au atanes ae, ‘Mamana mademaina beek kande, emi kae leo lain meu ndia?’ Boema mulai neme ndia mai-a, loke mamanak ndia soona lae, ‘Mamana Mademaina-la.’

³⁰ Da'di, mafa'da hataholi Israel-la, hata fo Au, Manetualain Fo Mademaina, afa'das: ‘Tao le'e de, emi tao sala-singok, sama leo emi bei-ba'i kaim-mala tao no'in-nana? Emi sama leo sila boe, de emi tunga sosongo-tatangok fo nanamaluak sila-la.

³¹ Nakalenak losa besak ia boe, emi tao manggenggeo emi aoinam-mala nenik, emi bei meni tutunu-hohotuk, ma emi tunu-hotu emi anam-mala, da'di leo tutunu-hohotuk neu sosongo-tatangok-kala. Boema, emi bei mapalani, moke natutu'duk neme Au mai? No Au, Manetualain fo maso'dak-ka na'den-na, neukose Au ta fe emi loak, fo moke natutu'duk neme Au mai fa.

³² Emi hii da'di sama leo leoina fe'ek-kala, ma laun nusa fe'ek-kala, fo ala sene-do'ok neu ai batu. Tehu emi hihii-nanaum ndia, neukose manada'di tak.’ ”

Manetualain huku ma Ana fe do'o do ampon

^33-34 “No Au, Manetualain fo maso'dak-ka na'den-na, Au fe emi nasanene'dak, ae hu kande Au nasa-melung, de neukose Au paleta emi no balakaik, nalosa emi hapu mame'da mita Au koasang-nga. Neukose, Au tao akabubua emi, fo Au o falik emi neme nusa-nusak fo nai bee, emi nanatao tapasasalak-ka.

³⁵ Boema, neukose Au o emi leo ‘Leoina-kala Moo solokaen-nala meu’. Nai naa, neukose Au aketu-ala'di emi, matak no matak,

³⁶ sama leo Au tao basan neu emi bei-ba'i kaim-mala neme Letek Sinai-a. Au Manetualain Fo Mademaina, nde manakokolak-ka.

³⁷ Neukose, Au tao emi no balakaik, fo ela emi tunga Au hehelu-balataang.

³⁸ Basa malenalanga-masa'basook-kala ma manatao tatao-nono'i mangalauk-kala, neukose Au usihenis leme emi tala'daheom mai. Neukose, Au os kalua leme, besak ia ala leo lai nusa-nusak-kala mai, ma Au ta fes loak, fo ala fali leo dae Israel-la leu so'on. Soona besak-ka ala bubuluk, lae Au nde Manetualain-na.”

³⁹ Manetualain Fo Mademaina nafa'da nae, “Hai hataholi Israel-la lemin! Besak ia, tunga emi dale hihiim-ma, fo esa-esak neu sene-do'ok neu ndia sosongo-tatangon! Tehu mafandendelek te, basa ndia soona, emi muse tunga Au, ma boso boe tao maggenggeo Au na'de malalao-malalafung-nga, nenik emi meni tutunu-hohotuk fe emi sosongo-tatangom sila-la.

⁴⁰ Nana nai dae Israel-la, fo nai Au lete malalao-malalafung-nga poin-na, emi basa-basam-mala, fo leoina Israel-la, neukose sene-do'ok neu Au. Nai naa, neukose Au amahoko, fo Au sipok emi tutunu-hohotum, emi tunu-hotum malolem-mala, emi fe-fe hehelim-mala.

⁴¹ Metema, Au o basa emi kalua neme nusa-nusak fo, nai bee emi nanatao tapasasalak-ka soona, neukose Au tao akabubua emi, ma Au sipo la'iesak emi tutunu-hohotu nanatunum lala'en-na. Soona besak-ka, basa leoina-kala bubuluk, lae Au ia, Manetualain Fo Malalao-malalafuk nanseli.

⁴² Metema, Au o falik emi leo dae Israel, dae fo Au helu basan neu emi bei-ba'i kaim-mala, soona besak-ka emi bubuluk, mae Au nde Manetualain-na.

⁴³ Nai naa, neukose emi mafandele-ma, basa emi tatao-nono'i nanamaluam fo, manatao nanggenggeo emi aoinam-ma so. Soona neukose, emi malua seluk emi aoinam-ma, nai lelek emi mafandele-ma basa emi tatao-nono'im sila-la.

⁴⁴ Metema, hu kande Au na'de malalao-malalafung-nga, de Au tao emi leondiak, ma ta nandaa no emi ha'da-tataom ta malolem-ma, boema emi tatao-nono'i mangalaum-ma soona, besak-ka emi hataholi Israel-la bubuluk, mae Au nde Manetualain-na. Au, Manetualain Fo Mademaina, nde manakokolak-ka.”

Ha'i-a nai boboak kona

⁴⁵ Manetualain nafa'da au nae leo ia,

⁴⁶ “Hai hataholi daebafak fo, manasapu-manalalok-konei, mete leo boboak kona muu leona! Kena-ka'i dae boboak kona, ma fe nula manai naa-la, nasanene'da mahelek.

⁴⁷ Madenu nula sila-la, fo lamanene hata fo Au, Manetualain Fo Mademaina, nafa'das nae, ‘Mamanene leona! Neukose Au tao apila ha'i-a, fo ana hotuheni basa ai manai o dalek kala, nai ai tuuk do ai mamatak boe. Ta hapu taonisa ha'i manapila lo'a-lo'ak ndia fa. Neukose ha'i ndia, ana pila nasalolo'de neme kona leo kii neu, fo basa hataholi-la lame'da ha'i ndia haan-na

⁴⁸ Neukose ala bubuluk lae Au, Manetualain nde tao napila ha'i ndia, de ta hapu hataholi esa boen, bisa taonisa ha'i ndia fa.’ ”

⁴⁹ Tehu au fo Yeskial, au afa'da au hahapung-nga nae, “Manetualain Fo Mademaina, boso madenu au afa'da dede'ak ndia! Basa hataholi-la, ala haladoi so, nana au nau kokolak nenik dede'a nakandandaak, nalosa ta lalelak sosoa-ndandaan fa.”