YESKIAL 17 - Susula Malalaok Hehelu Palak Ma Hehelu Beuk

Nakandandaak la'eneu ai angol-la ma manupui kaka'ka-la

¹ Manetualain nafa'da au nae,

² “Hai hataholi daebafak fo, manasapu-manalalok-konei, tui fe hataholi Israel-la, nakandandaak esa ia.

³ Mafa'das mae, Manetualain Fo Mademaina, nafa'da emi nae leo ia: Manupui kaka'ka matuaina esa, bulun-na mana'ahiik, ma li'dan-na maloaina, ma balakain-na seli. Ana laa leo Letek Libanon-na poin-na neu, de ana helu la'di kaiou pe'duk, ndanak esa,

⁴ boema nenin leo nusak esa neu, de ana pe'dan neu kota manadangan esa.

⁵ Basa boema, ana ho'i-na ai ndana pe'duk esa neme dae Israel-la mai, de ana selen neu tina esa dalek, fo tina ndia oen-na ta ma'da fan.

⁶ Ai ndia ana moli, de ana da'di ai angol manaleloakak ma kaba'oanak, tehu ndanan-nala lakapepela leo manupui kaka'ka ndia neu, ma okan-nala ala tola deman-na seli leo dae dale neu. Ai angol ndia, doon-na makadotok nanseli.

⁷ Nai lelek ndia, bei hapu seluk manupui kaka'ka fe'ek esa; li'dan-na maloaina, ma bulun-na, katen-na seli. Boema ai angol ndia, ana fe okan-nala ma ndanan-nala lasale leo manupui kaka'ka beuk ndia neu, no namahehenak, fo ela manupui ndia, ana fen oe ba'uk-ka, lena heni oe manai tina ndia dalek-ka.

⁸ Te se'kona, ai angol ndia, nanaselek nai dae maoe-maisik, ma oen-na makadotok, nalosa doon-na makadotok nanseli, ma boan-na inu-inu, de ana da'di ai angol malole.

⁹ Boema Au, Manetualain Fo Mademaina, atane: Ade, ai angol ndia naso'da fo namade'u do ta? Ade, manupui kaka'ka makasososak-ka, ana ta fe'ahenin no okan-nala, fo ana loso-na boan-nala, ana tao nala'di ndanan-nala, fo ana po'ilotak-kana, ana male fa do? Ta paluu be'i-balakaik ba'uk-ka, do hataholi makadotok soaneu fe'aheni ai ndia no okan-nala fa.

¹⁰ Memak, okan-nala latea so, tehu ana bisa moli nakandoo, boema namade'u do ta? Metema ani timu-a fuu la'en soona, neukose ana male do ta? Neukose namatuu neme mamana seselen-na do ta?”

Nakandandaak ndia sosoa-ndandaan

¹¹ Manetualain nafa'da au nae,

¹² “Matane malenalanga-masa'basook sila-la, ade sila lalelak nakandandaak ndia, sosoa-ndandaan do ta Mafa'das mae manek Babel-la nai Yerusalem so, de ana foo neni mane Yehuda no basa kota ndia hataholi matua-mademan-nala, leo Babel leu.

¹³ Boema, ana hele-na mane Yehuda ndia teidalen esa, fo ana tao hehelu-balataak no ndia, ma nadenun fo, ana soo nae, ana lilineka neu ndia. Mane Babel ndia, ana kena nahele mane Yehuda, hataholi matua-mademan-nala,

¹⁴ fo ela nusak Yehuda ta fo'a falik, ma ala boso lalenalanga-lasa'basoo seluk, boeo fo ela ala ho'u lahele hehelu-balataak ndia, fo hehelu-balataak ndia nahele.

¹⁵ Tehu mane Yehuda lena-la'ban, boema nadenu hataholi neu leo Masir neu, fo mane Masir-ra fen ndala ma solda'du makadotok. Tehu, ade ana hapu buna-boan do ta? Ade, nadenu hataholi-la, laso'da do ta? Hataholi manamalelesi hehelu-balataak-ka, muse hukun!

¹⁶ No Manetualain fo maso'dak-ka na'den-na, Manetualain Fo Mademaina, neukose mate mane Yehuda nai Babel, nanahu nalelesi ndia soo-supan, ma ana la'olena ndia hehelu-balataan no mane Babel fo, manafen nangatuuk neu kandela manek lain so.

¹⁷ Nakalenak, solda'du Masir fo palani sila-la, ta lapalani tulu-falin, nai lelek hataholi Babel-la, ala mai sapu-lalas, fo ladodou dae-a da'di pupukuk, ma ala kali oelolok, soaneu ala taolisa hataholi makadotok.

¹⁸ Hu kande, ana la'olena soo-supan, ma hehelu-balataan, de neukose, ana ta hapu naladeak so'on.

¹⁹ No Au, Manetualain fo maso'dak-ka na'den-na, Manetualain Fo Mademaina, neukose Au huku mane Yehuda, nanahu ana la'olena hehelu-balataan no manek Babel-la so, te se'kona ana soo nenik Au na'deng-nga, soaneu ana tao natetun.

²⁰ Neukose, Au pilu Au dalang-nga neu, fo Au ho'u-an. Neukose, Au on leo Babel neu, fo Au hukun nai naa, nanahu ana ta lilineka neu Au fa.

²¹ Neukose, mate solda'du neulaun-nala nai natee-natatik dale, tehu maso'dak-kala, neukose nanatao tapasasalak leo basa bu'u-bu'uk lala'en-na neu. Soona besak-ka Au anang-ngala bubuluk lae Au, nde Manetualain, nde manakokolak-ka.”

Manetualain helu nae, bei hapu namahehenak

²² Manetualain Fo Mademaina, nafa'da dede'ak-kala nde ia nae. “Neukose, Au ketu-a pe'duk esa, neme ai kaiou mademaina mai, boema Au helu-a, ndana nulan esa; Au sele ai ndanak ndia neu letek fo, namadema leo ko'as-sa neu.

²³ Au falak-kana, nai lete mademaina manai Israel-la. Neukose, nanupu nai naa, fo nabuna-naboa, boema, ana da'di ai kaiou nanakoa-nanakiok. Basa manupui mata-matak lala'en-na, neukose landunu nai lain, ma lafuni aoinan-nala, nai sa'on dale.

²⁴ Basa ai manai nusak-ka, neukose ala bubuluk, lae Au nde, Manetualain-na. Au lo'oheni ai mademaina-la, Au fe ai kaba'ok-kala lamadema. Ai maso'dak-ka, Au fen namatuu ma ai tuuk-ka, Au fen nanupu fo nakapela. Au fo Manetualain, kokolak basa so, de basa Au hala-kokolang lala'en-na, neukose nanatao natetuk.”