YESKIAL 16 - Susula Malalaok Hehelu Palak Ma Hehelu Beuk

Yerusalem ta lilineka fa

¹ Manetualain kokolak seluk no au nae,

² “Hai hataholi daebafak fo, manasapu-manalalok-konei, matu'du Yerusalem, tatao-nono'i ta kandaak fo, ana tao-no'in-na.”

³ Manetualain Fo Mademaina, nadenu au fo, anduku-alosak hala heheluk ia neu Yerusalem nae, “Hai Yerusalem, bongi o neme dae Kanaan-na. O amam, hataholi Amori, ma o inam, hataholi Het.

⁴ Lelek bongi o, ta hapu hataholi kee o usem-ma, do nadiu o oe, ma ta lose masik, neu o usem-ma, do nalu'e o nenik sidi fa.

⁵ Ta hapu hataholi esa boen, dalen-na tu'da kasian neu o, fo ana nau mete-nakanae o. Lelek bongi o, ta hapu hataholi sue-lai o fa, nalosa ala tapaheni o leo tina neu.

⁶ Basa boema, Au la'ok tunga ndia, de Au ita o daam-ma lifu, de o mafoki meme dalek, tehu Au ta nau mate o fa.

^7-9 Au ho'i oe, de au safeheni daak manai o aom-ma. Au ahutu o mina, nenik mina setun. Au akaboboi o, losa o mamatua, sama leo bubu'u-palusa, fo ana moli no malole. O mamatua, ma o ta mamahe'di-mapalau fa, boema o da'di anafe'oanak. O su'um-ma, mulai lamatua, ma o langadoom-ma namanalu, tehu o makahola-la. Lelek Au la'ok tunga ndia seluk te, Au ita o faim-ma losa, soaneu o leo-la'ok moo tou-ta'eanak so. Au alu'e Au ba'du manalung-nga neu o ao makaholam-ma, ma Au aheluk, Au fe Au susue-lalai ina-anafe'ong-nga neu o. Au tao hehelu-balataak o o, fo no enok ndia, o da'di Au nuung. Au, Manetualain Fo Mademaina, nde manakokolak-ka.

¹⁰ Basa boema, Au fe o pake ba'du madulak, ta'bueis kapa louk, temak fefeo langak abalutu, ma ba'du manalu abalutu.

¹¹ Au balias o nenik poemata, lilo-henu ma suek.

¹² Au fe o ndeli, lolo'ek, ma bulamolik mana'ahiik.

¹³ No enok ndia, o nanabalias nenik lilopilas ma lilofulak; o papake-ngganggaom, taon neme tema abalutu ma tema abalutu madulak. O bole mu'a loti fo, taon neme ha'desopu malole, fo nanasese'dok nenik faioe ma mina setun. O mata makeek nanseli, de o mandaa da'di ina manek.

¹⁴ Basa leoina lala'en-na, ala koa-kio o mata makeem fo matetu-mandaak ndia, nana Au nde tao o, da'di mata makeek. Au, Manetualain Fo Mademaina, nde manakokolak-ka.

¹⁵ Tehu o pake sala, o mata makeem-ma, boema o na'de kaboomenim-ma. Su'di touk see la'ok tunga ndia soona, o sungu moon.

¹⁶ O ho'i-ma, o bua papakem nggelok fo, o balias neu o mamana sosongo-tatangom-mala. O da'di ina manasosoa-piaok, ma o mase'o o aopaam-ma, neu touk lala'en-na.

¹⁷ O ho'i-ma, Au fe o lilopilas, lilofulak-kala, de o tao dodoki-dudula touk, fo o tao tatao-nono'i mangalauk moo dodoki-dudulak sila.

¹⁸ O ho'i-ma, Au fe o bua papake madulak-kala, fo o pakes neu dodoki-dudulak sila. O sipo-ma, Au fe o mina setun ma boomenik-ka boema, o tunu-hotu fen neu dodoki-dudulak sila.

¹⁹ Au fe o nana'ak neme ha'desopo malole, fanioe ma mina setun fo isi ndoos. Tehu, o tunu-hotu fe basa sila-la, neu sosongo-tatangok sila-la, fo ta matetu-mandaa dalen-nala. Au, Manetualain Fo Mademaina, nde manakokolak-ka.

²⁰ Basa boema, o tunu-hotu ita anan-nala, ina touk da'di tutunu-hohotuk soaneu sosongo-tatangok. O ta lilineka neu Au-a, beita dai fa do?

²¹ Ade, o muse ho'i-ma Au anang-ngala boe, fo o tunu-hotu fes neu sosongo-tatangok do?

²² Nai o maso'dam da'di leo manasosoa-piaok, fo nanamaluak ndia dalek, o mafandele heni tepo-lelek o bei ana-ma, lelek o makahola-la, ma o mafoki meme o daam manalifum dale.”

Yerusalem maso'dan-na da'di leo manasosoa-piaok

²³ Manetualain Fo Mademaina, nafa'da nae, “Soe ba'eneu o! Soe te'e-te'e! O tao basa tatao-nono'i mangalauk lala'en-na so.

²⁴ Bai te, o tao mamana sosongo-tatangok ma mamana sosoa-piaok nai masadokek-kala, ma nai enok-kala su'un-na.

²⁵ O tao manggenggeo, o mata makeem-ma. O mase'o o aopaam-ma, neu su'di touk see fo ana la'ok tunga ndia, ma o hohonge makandondoo henin.

²⁶ O sosoa-piao moo hataholi Masir, fo o nusa titia-tataim, fo nasa sao-anan ba'una seli ndia. O sosoa-piao, fo sue kande Au amanasa.

²⁷ Besak ia, Au ho'i nakeketuk soaneu huku o, fo Au ho'i falik Au fe o baba'e-papalak-kala. Au fe o leo hataholi Filistin fo, ta lahiik loo o fa, ma ala malua mete o ha'da-tatao manggenggeom ndia.

²⁸ Tehu o tatao-nono'im sila-la, beita dai fa; o usi mahele hataholi Asyur-ra. Fo o sosoa-piao moos, tehu ala beita tao lamahoko o dalem-ma boen.

²⁹ Boema, o da'di manasosoa-piaok neu hataholi Babel fo, hataholi manadangan sila. Tehu sila boeo, ala beita tao lamahoko o dalem-ma boen.”

³⁰ Manetualain Fo Mademaina, nafa'da nae, “O tao basa sila-la, sama leo manasosoa-piaok fo, bibii-mamaen ta.

³¹ O tao mamana sosongo-tatangok, ma mamana sosoa-piaok nai masadokek manai kota dale, ma nai enok-kala su'un-na. Tehu, o ta sama leo manasosoa-piao biasa fa, fo ana paluu doik.

³² O sama leo saoinak fo, nalelesi saotun-na, fo ana po'de no tou fe'ek.

³³ Ina manasosoa-piaok esa, muse ana hapu sese'ba-babaek, tehu nasafalin-na, o nde fe o tou susue-lalaim-mala, bua palsen, nakalenak bai, o fufu'dis menik doik, fo ela ala mai leme basa mamanak lala'en-na mai, fo ala sungu loo o.

³⁴ O, ina manasosoa-piaok, fo fe'ek neme manasosoa-piao fe'ek-kala mai. Hataholi ta laka-nakaseti o, fo da'di manasosoa-piaok fa. O nanasese'ba-bae tak, te o nde se'ba-bae. Memak, o ina manasosoa-piaok esa, fe'ek neme manasosoa-piao fe'e-fe'ek-kala mai.”

Manetualain huku Yerusalem

^35-36 Hai Yerusalem, fo manasosoa-piaok-ka, mamanene hata fo, Manetualain Fo Mademaina, nafa'dan nae, “O o'duheni o ba'dum-ma so, de da'di leo ina manasosoa-piaok, o fe o aopaa-ma neu o tou susue-lalaim-mala, ma neu o sosongo-tatangom fo nana maluak sila-la. O taomisa o anam-mala, de o tunu-hotu fes neu sosongo-tatangok sila-la.

³⁷ Hu ndia de, neukose Au aloo akabubua basa o tou susue-lalai palam-mala, nau touk fo, o mahiik-kana, do touk fo, o ta mahiik-kana fa boe. Neukose, lapadeik okofefeo-la o, fo ala o'du lakaholak o, nalosa o hapu mita, o aopaa makaholam-ma.

³⁸ Neukose Au huku o, nanahu hohonge-a, ma o tao kanisak sila-la. Neukose Au hukuisa o, nai Au nasa-melung-nga dalek.

³⁹ Neukose, Au fe o leo, o tou susue-lalaim sila-la, fo ala tao latu'u o mamana sosoa-piaom-mala, ma o mamana sosongo-tatangom-mala. Neukose, ala loso-la, basa o bua papakem, ma o lilo-henum lala'en-na, nalosa o makahola-la.

⁴⁰ Neukose, ladenu hataholi makadotok tapa o, nenik batu, ma ala kekee o aopaam-ma nenik tafaina.

⁴¹ Neukose, ala hotuheni o umam-mala, ma ladenu basa inak-kala, mete o huhukum-ma. Neukose, Au tao ate'e o sosoa-piaom, nenik enok ndia. Neukose, o ta baba'e fe o tou susue-lalaim-mala, bua palsen so'on.

⁴² Basa ndia soona, besak-ka Au nasa-melung, ana tenak, fo Au daleng-nga tesa-tama falik. Neukose, Au ta amanasa do ape'da dalek so'on.

⁴³ Au huku o nanahu, o ta mafandele, tao leo beek de, Au puli-amo'do o, nai lelek o bei muli-solum-ma. O taom-ma Au amanasa nenik, o tatao-nono'i mangalaum sila-la. Tao le'e de, o bei popo-tama seluk o ha'da-tataom nanamaluak sila-la, nenik sosoa-piaok-ka bai? Au, Manetualain Fo Mademaina, nde manakokolak-ka.”

Anafe'on-na boeo sama leo inan

⁴⁴ Manetualain nafa'da nae, “Hai Yerusalem, neukose hataholi-la pake dede'a lasik ia la'eneu o: ‘Anafe'on-na, sama leo inan boe.’

⁴⁵ Memak, o nde been-na, o inam anafe'on-na. Ana nape'da dale nasak neun saotoun-na, ma ana bongin-nala. O tatao-nono'im sanga nae, sama leo o tolanoo inam-mala, fo ta lahiik loo saotoun-nala, ma ana bongin-nala boen. O ma o tolanoom-mala, fo nde: kota-kota manai o titia-tataim-mala, fo inan-nala, hataholi Het, ma aman-nala, hataholi Amori.

⁴⁶ O ka'am nde Samaria, nai kii, no basa nggolon-nala. Ma o fa'dim-ma, nde Sodom, nai kona, no basa nggolon-nala.

⁴⁷ Ade, o dalem-ma tesa-tama, tunga sila ei tata'bun-na, ma o na'da sila tatao-nono'in nanamaluak ndia de, dai so do? Beik! Ta dook-ka so'on te, nalutu o lena heni sila bai.

⁴⁸ No Au, Manetualain fo maso'dak-ka, nafa'da nae, o tolanoom Sodom no nggolo-nggolon-nala, beita la'i esa fo, ala tao mangalauk sama leo o moo o nggolo-nggolom-mala fa.

⁴⁹ Sodom no nggolo-nggolon-nala koao-ndaeao, nanahu mamana pepe'da nana'an makadotok, ma laso'da no nee-nee lino-linok ma mole-dame. Tehu, ala ta taoafik neu hataholi nuu taa-hata taak-ka, ma hataholi matasi'da-matasaek-ka fa.

⁵⁰ Ala koao-ndaeao, ma lalanga batu, ma ala tao tatao-nono'ik fo, Au ta ahiik-kana fa. Hu ndia de, Au tao akalulutuk-kasa, sama leo o mitak-ka so.

^51-52 Memak, Samaria mangalauk-ka, tehu sala-singon, ta ba'e duak o sala-singom boen. O ha'da-tataom, mangalaun-na lena seluk bai. O tolanoo inam-mala, nono'kabai, ta lasala fa, metema nakasasamak-kasa loo o. O muse mame'da bibii-mamaek ma matasi'da-matasaek-ka!”

Sodom ma Samaria, neukose nananafofo'a falik

⁵³ Manetualain nafa'da Yerusalem nae, “Neukose, Au tao asafali Sodom ma Samaria, boema nggolo-nggolon-nala, fo ala da'di tetu-temak seluk. Basa ndia soona, besak-ka, Au tao asafali o, fo o da'di tetu-temak boe.

⁵⁴ No enok ndia, neukose o mae seluk o aoinam-ma, ma o matasi'da-matasaem-ma, neukose natu'du o tolanoom-mala nae, sila ua-nalen malole nanseli.

⁵⁵ Neukose sila ma sila nggolon-nala, da'di tetu-temak seluk, boema o ma o nggolom-mala da'di tetu-temak boe.

⁵⁶ Ade, o beita hika-hume hai Sodom, nai lelek o bei koao-ndaeao,

⁵⁷ ma nai lelek, o tatao-nono'i mangalaum-ma, beita nanabubuluk fa hetu? Besak ia, o sama leo ndia so boe; o da'di bua nanahika-humek neme hataholi Edom, hataholi Filistin ma uma titia-tataim fe'ek fo, ala ta lahiik loo o fa.

⁵⁸ O muse doi-doso, fo da'di leo babalak esa neme o tatao-nono'i manggenggeok, ma nanamaluak ndia mai. Au, fo Manetualain, nde manakokolak-ka.”

Hehelu-balataak fo, nanapakek losa dodoon-na

⁵⁹ Manetualain Fo Mademaina, nafa'da nae, “Neukose Au tao o, nandaa no o tatao-nono'im, nana o malelesi o soo-supam, boema o la'olena, Au hehelu-balataang no o.

⁶⁰ Tehu, neukose Au afandele hehelu-balataak fo, Au taon no o, nai lelek o bei muli-solum-ma, ma Au tao hehelu-balataak no o, fo paken losa dodoon-na.

⁶¹ Neukose, o mafandele neu o tatao-nono'im-mala, fo o mame'da mamaek, nai lelek Au fe falik o tolanoom-mala leo o neu, de o taos da'di o anam, leomae dede'ak ndia, ta hapun nai Au hehelu-balataang no o-a, dalek fa.

⁶² Neukose, Au tao hehelu-balataa beuk no o. Soona besak-ka o bubuluk, mae Au nde Manetualain-na.

⁶³ Neukose, Au fe ampon neu o salam lala'en-na, tehu neukose o ta hapu mafandele heni fan, ma neukose o mame'da mamaek, soaneu mafa'da su'di beek-ka. Au, Manetualain Fo Mademaina, nde manakokolak-ka.”