YESKIAL 13 - Susula Malalaok Hehelu Palak Ma Hehelu Beuk

Hala nafa'da elak, la'eneu nabi masapepekok-kala

¹ Manetualain nafa'da au nae,

² “Hai hataholi daebafak fo, manasapu-manalalok-konei, fe nasanene'da mahelek neu nabi-nabi Israel fo, manakokolak dede'a nafa'da elak fo sila tao aon-na. Madenus fo, lamanene Au dede'a-kokolang.”

³ Manetualain Fo Mademaina nafa'da nae, “Soe ba'eneu nabi-nabi nggoak sila-la! Ala tunga sila dale nakababalen-na, te ala ta lita ninitak esa boen.

⁴ Hai Israel, o nabim-mala, sosoa-ndandaan ta, sama leo busa fuik-kala laso'da nai ai-batu malefu-le'ak-kala tala'da heon, nai kota dale.

⁵ Ala ta lanea mamanak fo, nai bee sila papala nanadaman-nala lakalulutuk, ma ala ta tao lahii papala nanadamak sila-la boen. Da'di, Israel ta bisa napadeik nahele fa, metema natee-natatik-ka, ana da'di nai Au fo, Manetualain fai mamaing-nga.

⁶ Sila ninitan-nala, ta la'e fan, ma sila dede'a nafa'da elan-nala, pepekok. Ala manaku lae, sila leni Manetualain hala hehelun-na, te se'kona Au beita adenu ita sila fa. Da'di tao leo beek fo, sila lamahena sila dede'a nafa'da elan sila-la, ala da'di?

^7-8 Au, Manetualain Fo Mademaina, afa'das ae, ‘Emi ninitam sila-la, ta la'e fas, ma emi dede'a nafa'da elam sila-la, pepekok. Emi mafa'da mae basa sila-la nde been-na, Au hala hehelung, te se'kona Au beita kokolak ita o emi fa! Hu ndia de, neukose emi da'di Au musu noong.

⁹ Neukose Au huku emi, hai nabi-nabi fo, manakokolak dede'a-nafa'da elak pepekok-kala, ma malame'i hapu ninitak-kala! Emi ta bole masok leo Au anang-ngala nakabubuan-nala dalek meu, fo fe nakeketuk so'on. Emi na'dem-mala, nanakokahenik nai Israel susula ba'in-na dalek so, ma neukose, emi ta fali leo emi dae-oem meu so'on. Soona besak-ka, emi bubuluk mae Au nde, Manetualain Fo Mademaina.

¹⁰ Hai nabi masapepekok-kala lemin! Emi taom-ma Au anang-ngala latofa-latalak, nenik emi mafa'da mae basa hata lala'en-na, nee-nee lino-lino. Te se'kona ta leondiak fa! Au anang-ngala, ala tao papala nanadamak nenik batu bata, de basa boema emi mai de, emi lose ha'o neu papala nanadamak sila-la.

¹¹ Hai nabi masapepekok-kala lemin, emi papala nanadamam-mala, neukose lakalulutuk. Neukose, Au fe u'dan matuaina, ana mai. Neukose ani sangu-a la'e papala nanadamak sila-la, ma u'da eis-sa, tuni nalas,

¹² nalosa ala tu'u leu, de basa hataholi-la, neukose latane lae, sosoak hata, ala lose papala nanadamak sila-la, nenik ha'o.’ ”

¹³ Manetualain Fo Mademaina, nafa'da nae, “Nai Au nasa-melung dalek, neukose Au fe ani sangu-a, u'da matuaina, ma u'da eis-sa ana mai, fo ana tao nakalulutuk papala nanadamak sila-la.

¹⁴ Au tutu'u basa, soaneu tao atu'u papala nanadamak fo, emi losen nenik ha'o ndia, fo Au tao akalulutuk-kana neu dae lain, nalosa ela ka'da laten-na. Neukose papala nanadamak ndia tuni-na emi, fo mate la'iesak emi. Soona besak-ka, emi bubuluk mae Au nde, Manetualain-na.

¹⁵ Papala nanadamak ndia, ma emi fo manalose papala nanadamak ndia nenik ha'o-a, neukose mame'da mita Au nasa-melung be'i-balakain. Basa soona, neukose Au afa'da emi, ae papala nanadamak ndia mopok-kana, sama-na leo emi fo, manalose ha'o neu papala nanadamak ndia,

¹⁶ hai nabi masapepekok-kala lemin! Emi malame'i mae Yerusalem nee-nee lino-lino, te se'kona ta leondiak fa!” Manetualain Fo Mademaina, nafa'da nae leondia.

Hala nafa'da elak la'eneu nabi inak fo masapepekok-kala

¹⁷ Manetualain nafa'da nae, “Besak ia, hai hataholi daebafak fo, manasapu-manalalok-konei, taoafik neu basa inak fo, ala tao nono'kabai de, sila nabi nai emi leoina tala'da. Fes nasanene'da mahelek,

¹⁸ ma mafa'das hata fo Au, Manetualain Fo Mademaina, afa'da neus: ‘Soe ba'eneu emi! Emi tao aidook neu suek-kala, fo emi fe basa hataholi-la pake suek sila-la, ma emi fes ala pake tema popoti langak fo, nanuu be'i-balakai matuaina, fo ela hataholi manapakek-ka, ana hapu koasa hataholi fe'ek maso'dan-na. Emi mahiik koasa-ma Au anang-ngala masodan ma mamaten-nala, ma emi pake koasa ndia, fo neni fe emi nanalak.

¹⁹ Emi makamumulu-makamamaek basa Au, nai Au anang-ngala matan so, ka'da soaneu emi hapu jelei nafanggetek de'ubee, ma loti biak de'ubee. Emi taomisa hataholi sala tak-kala, tehu hataholi fo nandaa hukunisan, emi po'ilotak-kana naso'da. Boema, emi masapepeko-masandandali Au anang-ngala, de lamahele emi.’ ”

²⁰ Manetualain Fo Mademaina, nafa'da basa inak fo, ala tao nono'kabai, sila nabi, ndia nae, “Au ta hii mete, emi pake suek nanatao aidook ndia, fo ela emi hapu koasa Au anang-ngala maso'dan do mamaten-na. Neukose, Au loso-a suek sila-la, leme emi lima lesum-ma mai, ma Au soi-po'i, emi koasa-ma hataholi-la.

²¹ Neukose, Au siiba'e emi tema popoti langam fo, nanuu koasa ndia, ma neukose Au soi-po'i Au anang-ngala leme emi fufu'di-oo'dom mangalaum ndia, losa dodoon-na. Soona besak-ka emi bubuluk, mae Au nde Manetualain-na.

²² Hataholi malole fo, ala ta nau Au taos le'e esa boen-na, emi taom-ma, dalen-nala ba'ihana, nenik emi masapepeko-masandandalim-ma. Emi tao mamatua hataholi mangalauk-kala dalen-na, fo ela lasala-lasingo lahele, ma boso soi-tefas.

²³ Besak ia, emi ninitam fo nanapake taa-mala, ma emi mafa'da ela dede'a masapepekok-kala, nate'e so. Au soi-tefa-ala, Au anang-ngala leme emi fufu'di-oodo mangalaum-ma mai. Soona besak-ka, emi bubuluk mae Au nde, Manetualain-na.”