YESKIAL 10 - Susula Malalaok Hehelu Palak Ma Hehelu Beuk

Manetualain la'oela Uman-na

¹ Boema, au anganalo leo dano nanataok neme titino mangadilak manai mahahaek sila-la lain neu, de au ita hata esa, sama leo kandela manek-ka, nanataok neme batu poemata dula balau-a mai.

² Basa boema, Manetualain nafa'da hataholi manapake tema abalutu ndia nae, “Muu leo mahahaek sila-la dae, fo masok leo ban-nala tala'da, fo ho'i-ma ha'ikaak nafanggetek esa. Soona nggali ha'ikaa sila-la leo kota lain neu.” Boema ana tunga, ma au mete ahelek.

³ Lelek ana leo dalek neu te, mahahaek sila-la bei lapadeik lai Manetualain Uman-na boboan kona. Uma so'dan manai dalek-ka, ma Manetualain Uman-na lala'en-na, henuk no ko'as bubuak esa.

⁴ Manetualain mandela-masa'san, nandela neme mahahaek sila-la mai, fo ana da'di ta'du-tana la'eneu Manetualain mamain-na, ana lali leo lelesu masok leo Manetualain Uman-na neu, nalosa uma so'dan-na mangale'dok.

⁵ Mahahaek sila-la, lakalalapa li'dan-nala, de lamanenen losa uma so'dan manai deak-ka, sama leo Manetualain Fo Manakoasa, halan-na.

⁶ Manetualain nadenu hataholi manapake tema abalutu fo neu leo mahahaek sila-la dae neu, fo neu ho'i ha'ikaak bubuak esa neme ban sila-la tala'da mai-a, hataholi ndia neu leo dalek neu, de napadeik neu ban esa boboan-na.

⁷ Boema mahahaek sila-la, esa tao liman-na leo ha'i manai sila tala'daheon-na dalek neu, de ana ho'i-na ha'ikaak de'ubee, boema ana fen leo hataholi manapake tema abalutu ndia neu. Hataholi ndia sipo-nan boema, ana la'o leona.

⁸ Au ita, mahahaek sila-la, nai esa-esak li'dan-na dae, hapu hatak esa, lupan-na leo hataholi daebafak-ka, liman-na.

^9-10 Boeo, au ita ban esa nai mahahaek sila-la, esa-esak boboan-na. Ban ka haak sila-la matak esa, ma mangadilak sama leo poemata mana'ahiik-ka. Esa-esak nanuu ban fe'ek esa, natabaa nai tala'daheon.

¹¹ No enok ndia, mahahaek sila-la, ala hapu la'ok leo bu'u-bu'uk lala'en-na leu. Sila lahiik leu leo bee leu soona, ala bisa leu, tehu ala ta bisa po'de falik aon-nala fa.

¹² Nai basa aon-nala lala'en-na, muliha'in-nala, liman-nala, li'dan-nala, ma ban-nala boeo, henuk no matak-ka.

¹³ Au amanene lae loke ban sila-la soona, “ani-sangu.”

¹⁴ Mahahaek sila-la, esa soona, mata-panan haa, tehu ta matak esa fa. Mata-panan makasososak-ka, nde banteng-nga, mata-panan, ka dua, hataholi daebafak-ka, mata-panan, ka telu-a, singa, mata-panan, ka haa, manupui kaka'ka, mata-panan.

^15-17 Mahahaek sila-la nde, makahulun-na au itas leme Lee Kebar-ra su'un-na. Lelek mahahaek sila-la lakababale, do lakalalapa li'dan-nala fo ala kae leo lalai leu, ma ala laa leo uluk leu, do late'e soona, ban sila-la tunga tataas esa, nanahu mahahaek sila-la koasa ban-nala.

¹⁸ Boema Manetualain mandela-masa'an, fo ana da'di ta'du-tana esa neu Manetualain mamain-na, ana la'oela lelesu masok leo Manetualain Uman-na neu, de ana lali leo mahahaek sila-la lain neu.

¹⁹ Au ita mahahaek sila-la, lakalalapa li'dan-nala, de ala laa leme dae lain mai, boema ala la'o, de ban-nala tunga. Boema late'e lai deka no Manetualain Uman-na lelesuinan manai boboak dulu, tehu Manetualain mandela-masa'an, nahele neme mahahaek sila-la lain.

²⁰ Au afandele, ae mahahaek sila-la nde, makahulun-na au ita Israel Manetualain-na, noos leme Lee Kebar-ra su'un-na.

²¹ Mahahaek sila-la, esa-esak nanuu mata-panak haa, li'dak haa, ma hatak esa, sama leo hataholi daebafak-ka liman-na, nai li'dan sila-la dae boe.

²² Sila mata-panan lupan-na, sama leo au ita mahahaek manai Lee Kebar-ra su'un-na, mata panan boe. Esa-esak, la'ok ndoos leo uluk neu.