YESKIAL 1 - Susula Malalaok Hehelu Palak Ma Hehelu Beuk

YESKIAL HAPU NINITA MAKASOSOSAK-KA LA'ENEU MANETUALAIN 1:1–7:27 Manetualain kandela manen-na

^1-3 Nai hataholi Yahudi-la bula ka haan-na fain lima, nai teu ka teluhulun-na dalek, fo ndia te Manek Yoyakhin-na, nanafook leo mamana tu'u-tapak neu, de ana leo teuk lima dalen-na nai ndia so, boema au, Imam Yeskial, fo Busi anan-na, sama-sama o hataholi Yahudi fe'ek nanafook-kala nai Lee Kebar-ra su'un-na. Boema no kaiboik, lalai-a natahuka, de au hapu ninitak la'eneu Manetualain. Au amanene Manetualain kokolak no au, de koasan-na poti-na au.

⁴ Au anganalo leo lain neu, de au ita ani-sangu matuaina neme kii mai. Ndela-ta'tas latutu'tiao leme ko'as bubua matuaina esa dalek mai, ma lalai manai boboa-kaisun mangale'dok. Au ita hatak esa mangadilak, sama leo liti-a, nai ndelas manatuti-natok sila-la dalek.

⁵ Nai ko'as ndia tala'da heon, au ita mahahae nusa so'dak (kerub) fo lupan-na leo hataholi daebafak-ka,

⁶ tehu esan-na, nanuu mata-panak haa, ma li'dak haa.

⁷ Ein-nala ndoos ma mangadilak, sama leo liti nanalosek-ka. Eifangan-nala, sama leo singa eifangan-nala.

⁸ Fe'ek neme mata-pana ka haan-nala, ma li'da ka 4-n sila-la mai, lanuu limak sama leo hataholi daebafak-ka liman-na, nai li'dan-nala dae.

⁹ Mahahae ka haak sila-la, li'da pe'dan-nala, esa koila'e esa, nalosa metes soona, nono'kabai balakak. Metema lakababale soona, lakababale ndoos leo uluk leu, tehu ala ta hapu po'de falik aon-nala leo dea mai fa.

¹⁰ Mahahaek sila-la esa soona, mata-panan haa, tehu ta matak esa fa; mata-pana hataholi daebafan-na nai uluk, mata-pana singan-na nai boboa konan-na, mata-pana banteng-nga, nai boboa kiin-na, mata-pana manupui kaka'kan-na, nai boboak dea.

¹¹ Mahahaek sila-la, li'dan dua lakapepela leo lain neu, nalosa li'da pe'dan-na, koila'e mahahaek manai boboan-na, li'da pe'dan-na, ma ana diku li'dan dua fo nalu'e-na aon-na.

¹² Mahahae ka haak sila-la, esa-esak lasale leo bu'uk haa leu laiesa, nalosa ala ta hapu po'de falik aon-nala, fo ala la'ok su'di leo bee leu, tunga sila dale hihiin-na fa.

¹³ Nai mahahaek sila-la tala'da, hapu hatak esa, meten soona, sama leo ha'ikaak-ka, do obol manapilak-ka, fo ala ta hahae nakababalek-ka fa. Ha'i ndia, ana pila nasalolo'de sama leo ndelas-sa tuti-nato.

¹⁴ Mahahaek sila-la, lakababale no lai-laianak nanseli, sama leo ndelas-sa.

¹⁵ Au bei taoafik neu basa sila-la, te au ita ban haa lai dae lain, fo ban esa soona, nai mahahaek esa boboan-na.

¹⁶ Ban ka haak sila-la matak esa, ma mangadilak sama leo batu poemata, ma ban sila-la esa soona, nanuu ban esa natabaa nai ban-na, tala'daheon.

¹⁷ No enok ndia, de ban sila-la hapu la'ok leo bu'uk haa leu.

¹⁸ Ban sila-la leleken-nala, henuk no matak-ka.

^19-21 Mahahaek sila-la leu su'di leo bee leu, tunga sila dale hihiin-na, fo ban sila-la ka'da tunga, nanahu mahahaek sila-la, koasa ban sila. Metema, mahahaek sila-la, lakababale leo lain leu, do late'e soona, ban sila-la boeo lakababale, ma late'e.

²² Nai mahahaek sila-la langan lain, hapu hatak esa sama leo dano esa nanataok neme titino mangadilak-ka mai.

²³ Nai dano ndia dae, mahahaek sila-la, lakapepela li'dan dua leo mahahaek manai bobooan-na neu, ma nalu'e li'dan dua neu aon-na.

²⁴ Metema ala laa fo lakalalapa li'dan-nala soona, au amanene; liin-na sama leo oe manalili'dok-ka liin-na, ma sama leo solda'du bubua matuaina esa, ei ndu'un-nala, sama leo Manetualain Fo Manakoasa halan-na. Metema ala laa late'e soona, ala diku li'dan-nala,

²⁵ tehu halak-ka, bei hapu nananamanenek neme dano manai mahahaek sila-la, langan lain mai.

²⁶ Hapu hata esa nai dano ndia lain, lupan-na leo kandela manek fo nanataok neme batu poemata mai, ma hata esa lupan-na, sama leo hataholi daebafak-ka, nangatuuk nai lain.

²⁷ Nai langan-na boboan lai, meten soona nangale'do, sama leo hotu liti-a nai ha'i dale, fo ana pila. Boboan dae, nangale'do ma nandela-nasa'a,

²⁸ ma dula-na mata-matak, sama leo elus-sa. Mandela-masa'ak ndia, nde natu'du Manetualain mamain-na. Au ita manada'dik ndia boema, au tu'u atotonokala u dae lain. Boema au amanene halak-ka nafa'da nae,