YESAYA 9 - Susula Malalaok Hehelu Palak Ma Hehelu Beuk

¹ Leoina fo naso'da nai makiu-makahatuk-ka dalek, lita mangale'dok-ka; sila fo manaleo manai mamates-sa salaon-na dalek, mangale'dok-ka nasalaa nalas.

² Manetualain, O fes namahoko matuaina, O taom-malas eeki-latadale. Lamahoko-setelee nanahu O dale malolem-ma, sama leo hataholi fo namahoko-setelee nai lelek fai ketu-kolun-na, do nai lelek ala baba'e bua kakalok-kala.

³ O ho'i-ma lelepa mabelan-na so ma lelepak-ka neme alun lain mai. O sengi leoina manatuni-ndenik ndia fo manalumu-ese O anam-mala. Sama-na leo nai tepo-lelek makahulun eli, lelek O sengi solda'du Midian-nala.

⁴ Solda'du-la ta'buein-nala ndu'u-ndu'u ma badun fo ladiu daak-ka, neukose ha'i na'a henis.

⁵ Ni'iana esa, nanabongi basak ba'eneu ita so; ni'iana touanak esa, nanaba'e-batik ba'eneu ita. Neukose ana da'di ita mauli-malangan. Ni'iana ndia nanafoik na'de: “Manamanoli-mafa'da Manatee-tenok”, “Manetualain Makadelek”, “Ama Manaketu basa tak”, “Manek Mole-dame!”.

⁶ Ana paleta da'di leo manek fo Dauk tititi-nonosin, koasan-na matuaina nanseli Nusan-na mole-dame, tetu-temak tataas esa; paletan-na nangatuuk nai hoholo-lalanek, ndoos ma matetuk lain, neme besak ia, ma losa dodoon-na. Tao leo bee-o, Manetualain Fo Manakoasa nakalala'ok-kana.

Neukose Manetualain huku Israel

⁷ Manetualain naketu basa nusa Israel-la, huhukun-na so.

⁸ Leoina Israel-la lala'en-na, ma laun Samaria-la, neukose ala bubuluk lae Manetualain nde manatao-nana. Besak ia, ala koao-ndaeao ma lamatutua-lamadedema dalen-nala. Lafa'da lae,

⁹ “Uma matuaina fo papala nanadamak batu cetak-kala tu'u leu so, tehu neukose, ami tao uma batu beuk neme batu-a mai. Ai kaak-kala nanalo'o basak so, tehu neukose ami nggatis nenik ai kaiou Libanon neulauk.”

¹⁰ Manetualain hoka basa sila musun-na fo ala la'ban-nasa so.

¹¹ Leoina Siria nai dulu, ma leoina Filistin-na nai muli, de ala kalo Israel. Tehu Manetualain bei namanasa, de Ana huku nahele.

¹² Leoina Israel-la beita sale-dale boen, leomae Manetualain Fo Manakoasa, Ana hukus so; ala beita tukatei-saledale neun boen.

¹³ Hu ndia de, ka'da nai faik esa dalen-na mesan, Manetualain huku Israel mauli-malangan ma laun-nala. Ana te'te heni langan-na ma ikon-na de Ana tapa henis.

¹⁴ Langan-na nde hataholi-lasik-kala, ma hataholi nanafe ha'da-holomatak-ka, ikon-na nde basa nabi fo lanoli nanoli matofa-matalak.

¹⁵ Nusak ndia mauli-malangan-nala, ala tao latofa-latalak ma tao tasi'bu laun-na.

¹⁶ Leoina ndia, ana kalua neme agama dalek mai, ma nalutu ha'da-tataon, ma hala-kokolan-nala mangalauk. Hu ndia de, Manetualain ta po'ilotak ta'eanan-nala, esa naladeak boen. Ana ta sue-lai basa faluina-anamaak-kala fa. Tehu Manetualainbei namanasa, de Ana huku nahele.

¹⁷ Leoina ndia, tatao-nono'i mangalaun-na nana'a, sama leo ha'i na'a nisa makatema dila-nggauk-ka. Ana pila sama leo ha'i na'a nula, fo ha'i masuk-ka masu-masu.

¹⁸ Manetualain Fo Manakoasa, namanasa nanseli, ma huhukun-na sama leo ha'i manapila lo'a-lo'ak, de leoina ndia da'di neu mina dae de ha'i nana'a henin. Ta hapu hataholi esa boen sue-lai tolanoon-na fa

¹⁹ Nai nusak ndia lala'en-na, hataholi-la laseti-lalaka nana'a-nininuk, ma la'a su'di beek fo bisa la'an, tehu ta lakabete fa. Nakalenak, la'a seluk nonoon-nala!

²⁰ Hataholi Manasye-la ma hataholi Efraim-mala, esa sapu-na esa, boema ala sama-sama la'ban Yehuda. Tehu Manetualain bei namanasa, de Ana huku nahele.