YESAYA 8 - Susula Malalaok Hehelu Palak Ma Hehelu Beuk

Yesaya anan-na da'di leo ta'du-tana soaneu leoina ndia

¹ Manetualain nafa'da au nae, “Ho'i-ma batu lei matua esa, fo sulak susula de'ek-kala no mangale'dok, neu lain nae: ‘Naseti-nalakak fo Lai-laik,’ Namanako no Lai-laik.

² Maloo-ma hataholi namahehelek dua fo ala da'di sakasii, fo nde Imam Uria, ma Zakharia, fo Yeberekhya anan-na.”

³ Neu fai makabuin boema, au saong-nga nailu. Lelek bongi ami anam-ma boema, Manetualain nafa'da au nae, “Foi ni'iana ndia, na'de ‘Naseti-nalaka no Lai-laik, Namanako no Lai-laik.’

⁴ Nana ni'iana ndia beita kokolak nalelak ‘Ama’ ma Ina fa, te basa Damsyik su'i-beten lala'ena, ma basa bua kakalok Samaria-la, neukose nanaso'uk leo mane Asyur-ra neu.”

Manek Asyur-ra ana mai

⁵ Manetualain nafa'da seluk au

⁶ nae, “Leoina ia, ta nau sipok Leeanak Syiloah oen fo mananee-nee lino-lino ndia fa, ma dalen-na nahiik no Mane Rezin ma Mane Pekah.

⁷ Hu ndia de, Au fo Manetualain, neukose adenu mane Asyur-ra mai no solda'dun-nala lala'ena, fo ala sapu-la Yehuda. Neukose ala tutulumatak sama leo Lee Efrat fo oen-na lua ponu-ponu fo ana faa leo felak-kala neu.

⁸ Neukose ala sa'e-la Yehuda, sama leo faa fo dedeman-na losa botolik, de ana lifu-na basa hata lala'ena.” Manetualain no ita! Nakapepela li'dan-na, fo nasulu-nahapa ita nusan-na.

⁹ Hai basa leoina-la lemin, Makabubua no nggenggengek leona! Mamanene leon, hai daebafak-ka pe'dan-nala lemin! Maheheleaom leona, fo matee-mata'ti, tehu no dalek fo manadele ngge'be-ngge'bek! Hei, maheheleaom leona, tehu no dalek fo, manadele ngge'be-ngge'bek!

¹⁰ Tutu'u enok leona, tehu basa-basan neukose manada'di tak. Ho'i nakeketuk leona, tehu sosoa-ndandaan ta, nana Manetualain no ami.

Manetualain fe Yesaya nasanene'dak

¹¹ Manetualain koasa-na au, de Ana fe au nasanene'dak, fo ela au boso tunga enok fo leoina ndia tungak-ka. Nafa'da nae,

¹² “Boso mafa'da mae, nakabua makahatuk beek fo sila lafa'da lae, nakabua makahatuk, ma boso bii-mamata'u neu hata fo sila bii-lamata'u neun.

¹³ Mafandendelek leona, te Au, Manetualain Fo Manakoasa nde been-na, malalao-malalafuk. O muse bii-mamata'u ka'da neu Au mesang-nga.

¹⁴ Hu kande, Au malalao-malalafuk nanseli, Au da'di batu nakatunuk ba'eneu laun Yehuda ma Israel, ma hihi'ik fo nala laun Yerusalem-mala.

¹⁵ Neukose hataholi makadotok lakatunu, de ala tu'u leu, fo lakahina. Neukose ala kosik leo hihi'ik dale leu.”

Kekena-kaka'ik soaneu moke natutu'duk neme hataholi malelak mai

¹⁶ Au ana sakolang emi, de emi muse pe'da ma makaboboi hala heheluk fo Manetualain fen neu au-a.

¹⁷ Manetualain nafuni aoinan-na neme Yakob tititi-nonosin, fo anan-nala mai so, tehu au amahele ma amahena neun.

¹⁸ Au ma Manetualain fe au anak-kala nde ia. Manetualain Fo Manakoasa, paleta nai Pupuku Sion-na, nadenu au da'di ta'du-tana soaneu hataholi Israel-la.

¹⁹ Tehu neukose hataholi-la ladenu emi meu moke natutu'duk neme hataholi malelak fo lamakukutuk ma bafan-nala bekoti. Neukose hataholi sila-la lafa'da lae, “Ade ta nandaa, ita toke natutu'duk neme hataholi manamatek-kala samanen-nala mai, soaneu hataholi maso'dak-ka paluun-na fa do?”

²⁰ Soona mataa mae leo ia, “Mamanene Manetualain nanolin-na! Hataholi fo ana kokolak ta nandaa no nanolik ndia fa soona, ta nanuu namahehenak fa.”

Tepo lelek fo henuk no to'a-taak-ka

²¹ Hataholi fo ua-nalen ta malole ma kamala'ak-ka, neukose lada'bak lai nusak ndia. Hu kande la'a-ndoes-sa, de ala tao nasa-nasak mesan, nalosa ala soo-supa sila manen-na ma sila Manetualain-na. Ala mete su'di leo bee neu, leo lain

²² do leo dae neu, neukose ta lita hata esa boen, te ka'da to'a-taak-ka, makahatuk-ka, boema makahatuk fo neni bibii-namata'u matuaina. Neukose sila nanatu'u-tapak leo mamana makahatuk ndia neu.

²³ Tehu ta losa dodoon-na, nusak ndia name'da nita makase'ek ndia fa. Manetualain mete nakadadaek hai, nusak fo leo Zebulon ma leo Naftali-a leo hain so. Tehu nai tepo lelek manamaik-ka, neukose Ana fe ha'da-holomata neu basa nusak maneme Tasi Tala'dak leo dulu neu, fo losa Lee Yarden-na selik, nakalenak losa Galilea, fo hataholi nusa dea-la leo lai ndia.