YESAYA 7 - Susula Malalaok Hehelu Palak Ma Hehelu Beuk

Hala heheluk esa soaneu Manek Ahas-sa

¹ Manek Ahas-sa nde been-na, Yotam anamanen-na, fo Uzia upun-na. Lelek ana paleta Yehuda, natee-natatik-ka da'di. Boema Rezin, fo manek Siria, ma Remalya fo manek Israel-la anamanen Pekah, ala mai sapu-la Yerusalem. Tehu ala ta hapu loso-la kota ndia fa.

² Lelek manek Yehuda namanene lae solda'du Siria-la masok nusa Israel-la, da'di leo tia-laik boema, ndia no leoinan-na bii-lamata'u lanseli, nalosa ala dele bengge'be, sama leo anin-na fafaek ai-la.

³ Boema, Manetualain nafa'da Yesaya nae, “Moo o anam Syear Yasyub fo meu matongo mo Manek Ahas-sa. Neukose o matongo mon nai lifu manai lain-na, oelolon-na pe'dan-na, fo babu-la mamana safe-san.

⁴ Mafa'da manek-ka, mae ana muse naheheleaon, tehu dalem-ma boso ba'ihana. Ana ta bole bii-namata'u do napangamak fa. Manek Pekah ma Manek Rezin-na loo solda'dun-nala, fo hataholi Siria sila-la, nasa-melun-nala ta lenak neme ha'ilute makamamasuk dua mai fa.

⁵ Siria tao nakabua makahatuk basa no Israel no manen-na so.

⁶ Ala sanga sapu-la Yehuda, ma lakabibiik laun-na, fo ela look sila, boema ala so'u Tabeel anamanen-na, da'di manek.

⁷ Tehu Au, fo Manetualain afa'da ae neukose dede'ak ndia ta da'di fa,

⁸ nanahu Siria balakain-na, ta lena neme Damsyik fo Aram nusan-na polon-na, ma Damsyik balakain-na, ta lena neme Manek Rezin-na mai fa. Te se'kona nai teuk neehulu lima dalen-na, neukose Israel heaba'en, nalosa ana ta hapu nakatatakak da'di leo leoina so'on.

⁹ Israel balakain-na, ta lena neme Samaria, fo Efraim nusan-na polon-na, ma Samaria balakain-na, ta lena neme Manek Pekah mai fa. Metema emi ta mamahele te'e-te'e neu Au fa soona, tao leo bee-o, emi ta bisa makatatakak fa.”

Imanuel ta'du-tanan

¹⁰ Manetualain nanduku-nalosak hala hehelu fe'ek neu Ahas nae:

¹¹ “Moke leona, fo ela Manetualain fo o Manetualaim-ma, fe o ta'du-tana esa, fafa'kama neme hataholi manamatek-kala daebafan-na mai fo nai dae, do neme lalai mai fo nai lain.”

¹² Ahas nataa nae, “Au ta nau oke ta'du-tana fa. Au ta nau so'ba Manetualain fa.”

¹³ Boema Nabi Yesaya nafa'da nae, “Metema leondiak soona, mamanene leon, hei Manek Dauk-ka tititi-nonosin-na nei! Ade, emi fola hataholi daebafak-ka hahae nalun-na, de beita dai fa, nalosa emi fola au Manetualaing-nga hahae nalun-na boe do?

¹⁴ Besak ia, neukose Manetualain nde fe o ta'du-tana. Anafe'oana kailus esa, neukose ana bongi-na ni'iana touanak esa, fo ana foin na'de Imanuel.

¹⁵ Nai lelek namatua, fo ana bisa ho'i aon nakeketuk soona, neukose nusak ndia tetu-temak.

¹⁶ Nana faik ndia beita losa fa, te o bii-mamata'u neu mane-manek fo manapaleta nusa ka duak-kala, neukose nanala'o elak da'di nusa louk.

¹⁷ Neukose Manetualain fe mane Asyur-ra mai, fo o ma basa o teidalem-mala, boema o laum-mala, neukose lame'da lita fai-faik fo henuk no hahae makase'ek fo lena henin, neme hata fo emi mame'da hain, ndek lelek heaba'e nusa Israel-la ma nusa Yehuda.

^18-19 Nai tepo-lelek ndia, neukose Manetualain naloo hataholi Masir ma hataholi Asyur-ra, boema leoina ka duak sila-la ala mai, sama leo pena ma fani bubuak-ka, fo lakamomotu-la bafak mademaina-la, ma batupiak-kala lelan-nala. Neukose ala poti-la basa makatema dila-nggauk, ma basa mamana mana'uk-kala.

²⁰ Neukose Manetualain se'ba mane Asyur-ra fo ana tao Israel sama leo tuka nggeu langak, fo ana nggeu heni langadoon-na, ma basa buluk manai aon-na.

²¹ Nai tepo-lelek ndia, metema hataholi esa nakaboboi sapi tenak esa, ma bi'ihiik ka'da dua soona,

²² bana sila-la su'uoen-nala dai ma lena, soaneu bei ela hataholi manai nusak ndia. Tete'ek-ka, neukose linu kapaoe ma fanioe.

²³ Nai tepo-lelek ndia, osi angol fo esan-na sele angol huuk lifun esa neu, ma belin-na doi fulak lifun esa, neukose makatema dila-nggauk-ka, moli lai dalek.

²⁴ Hataholi manaleu leo naa leu-a, muse leni kokouk ma kokouisik, nana nusak ndia lala'en-na, henuk no makatema dila-nggauk.

²⁵ Ma dae letelepan fo, biasan-na nanafoi-falak ma nanasele-tanik-ka, henuk no makatema dila-nggauk-ka, nalosa hataholi ta napalani neu leo naa neu fa. Dae ndia sosoa-ndandaan ka'da da'di leo sapi ma bi'ilopo-la mamana na'an.”