YESAYA 66 - Susula Malalaok Hehelu Palak Ma Hehelu Beuk

Manetualain naketu-nala'di leoinak-kala

¹ Manetualain nafa'da nae, “Lalai-a nde been-na, Au kandela maneng-nga, ma daebafak-ka, Au ei tata'bung-nga. Da'di, uma matak leo beek-ka nde, o sanga mafofo'an soaneu Au, ma mamana matak leo beek-ka nde, o sanga taon da'di Au mamana leleong-nga?

² Lalai-a ma daebafak-ka nde been-na, Au lima tataang, boema basa sila-la nananakadada'dik. Tehu Au dale namahokong-nga nde, hataholi dale taidaek-ka, fo manatukatei-saledale neme sala-singon-nala mai, fo manabii-namata'u, ma tunga neu Au.

³ Tehu leoina ndia, tao tunga sila dale hihii-nanau mesan-na; ala lamahoko, ala maso-kasasi no enok fo nanamaluak. Ba'eneu sila soona, tatao-nono'ik lala'en-na, matak esa fo nde: tunu-hotu sapi mane, ma tunu-hotu hataholi daebafak, tunu-hotu bi'ilopoana, ma helula'di busa lesuha'in-na; tunu-hotu gandum, ma tunu-hotu bafi daan-na, tunu boomenik, ma sene-do'ok neu dodoki-dudulak.

⁴ Hu ndia de, Au boeo, neukose tao tunga Au dale hihii-nanau mesang-nga, de Au fes ala bii-lamata'u neu soe-la, tuni-ndeni nalas. Nana lelek Au aloo, ta hapu manamataa fa; lelek Au kokolak, ta hapu manamamanenek fa. Ala lahiik ka'da lena-la'ban Au, ma ala tao tatao-nono'i mangalauk.”

⁵ Mamanene hata fo, Manetualain nafa'dan, hai emi fo, manabii-mamata'u, ma tunga neun, “Hu kande emi lilineka neu Au boema, nai emi leoinam-ma dalek, hapu nggelok lakamuu-lakadau emi, ma ala ta nau leo-lapalasa lo emi fa. Ala hakinonoli emi, nenik lafa'da lae, ‘Nemen-na fo, Manetualain natu'du matua-mademan, fo ela ami mita, o namahoko-seteleem.’ Tehu sila mesak-kasa nde hapu mamaek-ka.

⁶ Mamanene! Te hapu hala makalupuk nai kota; hapu halak neme Au Umang mai; ndia nde Au halang fo, balas musu-a!

⁷ Au kota malalao-malalafung-nga, sama leo inak esa, ana bongi te ana beita nahoo he'di bobongik fa, fo ana bongi ni'iana touanak, te ana beita name'da he'di bobongik fa.

⁸ See namanene hai, dede'a leondiak-ka so? See nita hai, mana da'dik leondiak-ka so? Tehu leoina Israel-la, nanabongik so, nai lelek Sion mulai name'da he'di bobongik.

⁹ Boso maedaenga, Au o Au anang-ngala, losa fai bobongin-na, ma ta po'ilotak-kasa nanabongik fa.” Manetualain nae leondia.

¹⁰ Mamahoko-setelee sama-sama mo Yerusalem leona, hai basa hataholi fo, manasue-lain-nana. Emi fo manasusak-kala, nanahu ndia, besak ia, bole mamahoko-setelee.

¹¹ Neukose emi mame'da mita tetu-teman, sama leo ni'iana esa, su'u inan.

¹² Nana Manetualain nafa'da nae, “Neukose Au fe emi tetu-temak sama leo lee manafaak-ka; neukose leoinak-kala, leni su'i-beten leo o mai sama leo manalua ponu-ponuk-ka. Emi sama leo ni'iana fo, inan nasu'un ma ana ko'on boema ana kokosen nai ifan lain.

¹³ Neukose Au kokoe-nanasi emi nai Yerusalem, sama leo inak esa, ana kokoe-nanasi anan-na.

¹⁴ Emi mita ndia soona, neukose emi mamahoko-setelee, ma emi da'di balakaik, ma so'da-la'dak sama leo na'u nulak-ka. Boema Au atang-ngala, neukose ala la'ola'di Au koasang-nga ma Au musung-ngala, neukose ala lame'da lita Au nasa-melung.”

¹⁵ Tete'ek-ka, neukose Manetualain mai no ha'i; Neukose Ana sa'e kaletan-na, sama leo ani-sangu, fo ana kalua nasa-melun, ma nasapala napane'e.

¹⁶ Nana Ana hapu-na, basa hataholi-la lasala, de neukose Ana hukus nenik ha'i ma tafaina, ma nanahuku nisak makadotok.

¹⁷ Manetualain nafa'da nae, “Basa hataholi fo manatao lalao-lalafu aoinan-nala, fo leu leo lamatua daebafak-kala osin-nala leu ma sene-do'ok neus-sala, neukose mopok-kasa sama-sama lo hataholi mana'a paa bafi, ma paa lafo, boema nana'a nanamalua fe'ek-kala.

¹⁸ Au bubuluk sila dudu'a-aafin ma tatao-nono'in. Au mai soaneu tao nakabubua basa hataholi-la, leme leoina lala'en-na mai. Nai lelek ala lakabubua, neukose ala lita Au koasang-nga.

¹⁹ Neukose Au pe'da ta'du esa neu sila tala'da heon. Neukose Au soi-tefa-ala sila lumanak, nai sila dalek. Neukose Au adenus leu leo leoina manai nusa dook, fo beita lamanene lita, la'eneu Au, ma lita Au matua-mademang ma Au koasang-nga: leo Spanyol, Libia, ma Lidia no manakou malelan-nala leo Tubal ma Yunani leu. Neukose ala tui-benga Au matua-mademang nai leoina sila-la tala'da.

²⁰ Neme nusak sila-la mai, neukose ala loo falik emi tolano-tolanoom fo, leoina esa, da'di leo bua palsen soaneu Au. Neukose ala lo hataholi sila-la, leo Au pupukung fo malalao-malalafung-nga neu nai Yerusalem no ala sa'e ndala, keledei ma onta, ma no kaleta boema nggalobak, sama leo hataholi Israel-la biasa leni tunu-hotu gandum nai mamana balisi dale, leo Manetualain Uman neu.

²¹ Neukose Au tao sila nggelok, da'di imam ma hataholi Lewi.

²² Sama leo lalai beuk ma daebafa beuk-ka, neukose lakatatakak, nanahu Au koasang-nga, leondiak boe, emi tititi-nonosim, ma emi na'dem-ma nahele.

²³ Tunga-tunga bula beuk, ma tunga-tunga fai Sabat-ta, basa hataholi daebafak lala'en-na, neukose ala mai, soaneu sene-do'ok Au nai Yerusalem.

²⁴ Lelek ala la'o, neukose lita hataholi manalena-la'ban Au-a, popolan-nala. Neukose, ta mate ulek fo mana'a hataholi sila-la, popolan-na fa, ma neukose ta mate ha'i fo, mana'as-sala fa; naniluk esa, neni bibii-namatau matuaina, ba'eneu basa hataholi-la.”