YESAYA 65 - Susula Malalaok Hehelu Palak Ma Hehelu Beuk

Manetualain huku basa malenalanga-masa'basook-kala

¹ Manetualain nafa'da nae, “Au aheheleaong, ataa Au anang-ngala, tehu ala ta hule-haladoi neu Au fa. Au sadia, soaneu ala mai latongo lo Au, tehu ala ta sanga Au fa. Leoina ndia, ta naloo Au fa, leomae Au aheheleaong soaneu Au ataa ae, Au nde ia!

² Au aheheleaong tataas esa, soaneu sipok Au anang-ngala, tehu ala nau lalenalanga-lasa'basoo. Leoina ndia, ana tao hata fo mangalauk, ma ana tunga dale tutu'u mesan-na.

³ Ala tao-la Au, amanasa akandondoo henin, nanahu ala tunu-hotu tutunu-hohotuk fe lamatua daebafak-kala, nai osi-la dalek ma ala tunu boomenik nai mei tunu-hotun-nala lain.

⁴ Nai fai le'odaen-na, leu leo leak-kala ma lates-sala, fo loke nanoli-nafa'dak neme samanek-kala mai. Ala la'a paa bafi, ma linu paaoe nananalulik.

⁵ Lafa'da lae, ‘Madook aoinam-ma meme ia mai, fo boso koila'e ami, nana ami malalao-malalafuk, ma nanata'da fe'ek neme emi mai!’ Au ta akatatakak mete sila ha'da-tataon fa! Au nasa-melung soaneu sila, sama leo ha'i manamate tak-ka.

⁶ Sila huhukun-na, nanasula basak nai Au matang-nga so. Te'e-te'e, neukose Au ta ka'da denge-denge fa. Neukose Au balas sila tatao-nono'in,

⁷ nanahu sila sala-singon, ma sila bei-ba'i kain-nala sala-singon. Ala lakadadaek Au, nenik ala tunu fe lamatua daebafak-kala boomenik, nai mamana sosongo-tatangok-ka nai pupukuk lain. Neukose Au balas sila, nandaa no sila tatao-nono'in, nai tepo lelek maneuk-ka.”

⁸ Manetualain nafa'da nae, “Angol boak fo, bei maoek-ka, ta nanatapa henik fa, tehu nanataok da'di angol oek. Leondiak boe Au leoinang-nga, neukose Au tao amopo-amate la'iesak-kasa, nana nai sila dalek, ta hapu manamakatele neu Au fa.

⁹ Hataholi Israel de'ubee, leme leo Yehuda mai, neukose Au fes baba'e-papalak, ma neukose Au fe sila tititi-nonosin, lanuu Au dae letelepang-nga. Au hataholi heheleng-ngala, neukose ala leo lai naa.

¹⁰ Neukose Au anang-ngala sene-do'ok neu Au; neukose sila bi'ilopon ma sapin-nala, la'a na'u nai Bafak Saron-na, ma nai Bafak Akhor-ra.

¹¹ Tehu hataholi fo, manala'oela Au-a, ma ta manataoafik neu Sion, fo Au pupuku malalao-malalafung-nga, fo manatunu-hotu nana'ak fe Gad ma Meni, fo lamatua daebafak maneni nanalak ma ua-nalek-ka, hataholi sila-la, ua-nalen ta leondiak fa.

¹² Neukose emi basa-basam-mala mate, da'di leo tutunu-hohotu laka-nakasetik. Nana lelek Au aloo, emi ta mataa fa, ma lelek Au kokolak, emi ta mamanene fa. Emi nau ka'da lena-la'ban Au, ma tao hata fo mangalauk.

¹³ Te'e-te'e, hataholi fo manasene-do'ok neu Au-a, neukose na'a, tehu emi mamala'a. Neukose ala linu, tehu emi maa ma'da. Neukose ala lamahoko-setelee, tehu emi hapu mamaek.

¹⁴ Te'e-te'e, neukose ala eeki-latadale, tehu emi kii noi-noi.

¹⁵ Au hataholi heheleng-ngala, neukose ala pake emi na'dem-ma, da'di leo soo-supak lae: ‘Ela leo been-na, Manetualain Fo Mademaina, taonisa emi, sama leo sila!’ Tehu hataholi fo, manatunga neu Au-a, neukose Au fen na'de beuk.

¹⁶ Basa hataholi mananoke baba'e-papalak manai nusak ndia, neukose noke Manetualain fo, manalilinekak-ka, fen baba'e-papalak. Basa hataholi fo, ala nau soo-supa, neukose ala soo-supa lenik Manetualain fo, manalilinekak-ka, na'den-na. Nana makahulun-na doidosok-ka, mopon de nananafandele henik so.”

Nakadada'di beuk

¹⁷ Manetualain nafa'da nae, “Neukose Au tao lalai beuk, ma daebafa beuk. Manada'di makahuluk-kala, neukose nananafandele henik, de ta nafandelen so'on.

¹⁸ Mamahoko-setelee, ma hika-matadale losa dodoon-na, nanahu hata fo, Au akadada'dik-kana. Au akadada'dik Yerusalem beuk, fo henuk no namahoko-seteleek-ka, ma laun-nala, hika-latadale.

¹⁹ Neukose Au mesang-nga amahoko-setelee, nanahu Yerusalem, ma Au amahoko, nanahu laun-na. Ta hapu seluk kikiik nai kota ndia so'on, ma ta hapu mananggasik, fo noke tutulu-fafalik fa.

²⁰ Anan-nala ta mate, nai lelek bei anan-nala, ma neukose, touinak-kala, laso'da losa lamalasi. Hataholi fo, teun natun esa, neukose lafa'da lae, bei muli-soluk, ma manamate makahuluk sila-la, lafa'da lae, Au huhukung-nga la'es.

^21-22 Neukose hataholi nafofo'a uma, fo ana leo mesak-kana; neukose hataholi fe'ek ta leo fan. Neukose, ala sele osi angol, fo linu angol-la oen-na; neukose, hataholi fe'ek ta ninu fan. Neukose Au anang-ngala, teun-nala lamanalu, sama leo ai-a, fo la'a-linu lita, sila ue-le'din buna-boan.

²³ Basa hata fo ala tao-no'in, neukose neni buna-boak, ma sila anan-nala, neukose ta mate no kaiboik fa. Sila ma sila tititi-nonosin, neukose Au fes baba'e-papalak losa dodoon-na.

²⁴ Ala beita dokodoe fa te, Au ataa so; ala beita hule-haladoi basa fa te, Au sipok basa sila huhule-haladoin so.

²⁵ Busa fuik-ka no bibi'ilopo-a, la'a na'u lakabubua; Singa-na na'a ha'deaik sama leo sapi-a, ma menge-a, ta neni soe so'on. Nai basa Au pupuku malalao-malalafung lala'en-na, ta hapu maneni tutu'dak do tao tatao-nono'i mangalauk so'on.”