YESAYA 63 - Susula Malalaok Hehelu Palak Ma Hehelu Beuk

Manetualain sengi leoinak-kala Manamanea

¹ “See hataholi ndia, fo manamaik neme Bozra nai Edom-ma? ba'dun-na pilas, bua papaken-na nahaa; ana la'ok no be'i-balakaik matuaina.” “Au nde Manetualain fo, nanuu be'i-balakaik, soaneu soi-tefa, ma Au mai, uni hala sesengik.”

Manetualain Manamanea

² “Tao le'e de, o bua papakem-ma, pilas leondiak, sama leo manapo'de angol-la ba'dun-na?”

Manetualain

³ “Au mesang-nga, masok leo mamana popo'de angol-la u, nai Au anang-ngala dalek, ta hapu manatulu-fali Au fa. Au heheta-aa'i leoinak-kala, nai Au nasa-melung dale, sama leo heheta-aa'i angol boak-ka Daan-nala lasapula mai de, nakadoe Au ba'dung-nga, ana tao nanggenggeo, Au ba'dung-nga lala'en-na.

⁴ Au tutu'u basa, fai babalak-ka, ma Au anang-ngala fai sosoi-po'in-na so.

⁵ Au sanga, tehu ta hapu manatulu-fali fa, Au dodoo doak-kana, ae ta hapu manafali fa. Boema, Au be'i-balakaing mesak-kana, nde tulu-fali Au-a, Au nasa-melung tulu-fali Au.

⁶ Nai Au nasa-melung manalua ponu-ponung-nga dalek, Au heheta-aa'i leoinak-kala; Au tao amopo-amates, de Au po'a heni daan-nala leo dae lain neu.”

Manetualain dale malolen-na soaneu Israel

⁷ Au sanga tui-benga, Manetualain susue-lalain ma koa-kion, nanahu basa tatao-nono'in lala'en-na. Ana fe anan-nala, baba'e-papala manasasi kao-kaok-ka, nanahu nanuu dale susue-lalaik, ma dalek-kasian-na ta basa fan.

⁸ Manetualain nafa'da nae, “Te'e-te'e, sila nde been-na, Au anang, anak fo, ala ta tao-la Au daleng-nga ba'ihana fa.” Boema, Ana da'di sila Manasoi-manatefan,

⁹ Ndia mesak-kana, nde lu'a-lepa sila toto'a-tataan-na. Manetualain ta haitua hataholi nadedenuk, do lima boboa konan-na fa; Ndia mesak-kana, nde soi-po'is-sala, nanahu susue-lalain, ma dalek-kasian-na. Ana nakabobois tataas esa, neme makahulun eli mai.

¹⁰ Tehu ala lena-la'ban, de ala tao lakahehe'dik, Manetualain dalen-na. Boema, Ana nasafali da'di sila musun, de Ndia mesak-kana, natee-natati la'ban-nasa.

¹¹ Boema ala nafandele-la, tepo lelek makahulun-na, Musa, fo Manetualain atan-na, tepo lelen-na. Ala latane lae, “Manetualain fo, manahela-nole anan-nala mauli-malangan-nala, tunga tasi dale-a, nai bee? Manetualain fo, manafe koasan-na neus-sala, nai bee?

¹² Manetualain fo, manasama-sama no Musa, fo no lima mabe'i-balakain-na, de Ana fa'a ba'e oe-a nai sila matan, fo ela na'den-na nanakoa-nanakiok losa dodoon-na, nai bee?

¹³ Manetualain fo, manahela-nole sila fo la'ok tunga oe madema dale, nai bee? Sama leo ndala la'ok tunga moo solokaek-ka, ala ta lakatunu lita fa.”

¹⁴ Manetualain nos leo, mamana hahaeaok-ka neu, sama leo foo bana-manu, fo leu la'a na'u nai mook-ka. Leondiak, Ana hela-nole anan-nala, fo ela na'den-na, nana namatutua-namadedemak.

Huhule-haladoik soaneu dokodoe dalek-kasian ma tutulu-fafalik

¹⁵ Ou Manetualain, mete neme nusa so'dak-ka mai, neme O mamana leleom fo, malalao-malalafuk ma mandela-masa'ak-ka mai. O susue-lalaim, ma O be'i-balakaim, nai bee? O dale manasue-laim-ma, ma O dalek-kasiam-ma, nai bee? Boso makataka mahele basa sila-la, neme ami mai.

¹⁶ Ade, O ta nde ami Amam fa do? Abraham ma Yakob, ta lalelak ami fa. Tehu O, ou Manetualain, O nde been-na, ami Amam, ami Manasoi-manatefam, neme makahulun eli mai.

¹⁷ Ou Manetualain, tao le'e de, O po'ilotak ami, matofa-matalak? Tao le'e de, O tao matea ami dalem-ma, nalosa ami ta bii-mamata'u neu O fa? Hu kande, O atam-mala, ma hu kande O anam fo, O pusakam-ma, fali ma'im-ma leona.

¹⁸ Tao le'e de, O po'ilotak, musu-a heheta-aa'i, O Umam-ma, ma hataholi-la tao langgenggeo, O pupuku malalao-malalafum-ma?

¹⁹ O tao ami nono'kabai, O beita koasa hai ami fa; nono'kabai, ami beita da'di hai, O anam fa.