YESAYA 62 - Susula Malalaok Hehelu Palak Ma Hehelu Beuk

¹ Hu kande Yerusalem, de neukose au kokolak, hu kande Sion, de neukose au ka'da denge-denge, losa nanasoi-tefak ma sesengin-na, nangale'do sama leo obol, nai fai le'odaen-na.

² Hai Yerusalem, leoinak-kala, lita o sesengim-ma, mane-manek-kala mete o matua-mademam. Neukose loke o, nenik na'de beuk, fo Manetualain nde fe na'dek ndia.

³ O da'di sama leo ti'ilanga manek mana'ahiik nai o Manetualain-na liman-na.

⁴ O na'dem-ma, ta nde ‘Fo Nanala'oelak so'on’, o nusam-ma, ta na'de ‘Fo Mananee-nee lino-linok so'on’. Neukose loke o lae, ‘Fo Manetualain sue-lain’, ma o nusam-ma, nanafoik na'de, ‘Fo Ka'bing basa so’, nana Manetualain dalen-na nandaa no o, Ndia sama leo, o nusam-ma, saotoun-na.

⁵ Sama leo touana muli-soluk esa, ana ka'bing no, anafe'oana matatema esa, Leondiak boe, o Manamakadada'dim-ma, neukose Ana ka'bing no o. Sama leo manaka'bing touk esa namahoko nita saoinan-na, leondiak neukose Manetualain dalen-na, nandaa no o.

⁶ Au pe'da manamanea nai Yerusalem papala nanadaman-na; Lele'do le'odaen, ala ta bole denge-denge fa, tehu muse ala fe nasanene'dak nakandoo, neu Manetualain, soaneu hehelu-balataak, fo Ana tao basan so.

⁷ Sila ta bole po'ilotak Manetualain, ka'da denge-denge fa, metema, Ana beita nafofo'a falik Yerusalem fa, ma Ana taon da'di nananita-nalelak nai basa daebafak-ka lala'en-na.

⁸ Manetualain helu basa pake soo-supak so, de neukose, Ana tao natetun nenik koasan-na: “Neukose, Au ta fe seluk o gandum-ma, leo musu-a neu so'on; hataholi nusa dea-la, neukose ta linu seluk o angol fo, emi ketu-seun no sosota-mamanguk fa.

⁹ Tehu emi fo, manaketu-koluk-kala, neukose emi mi'a buna-boan, ma koa-kio Manetualain; ma emi fo manaseu angol-la boan-na, neukose emi minu oe angol nai Au Umang-nga so'dan-na.”

¹⁰ Laun Yerusalem-ma, ala kalua tunga lelesuina, fo sadia enok, ba'eneu hataholi manafalik-kala. Tao okofoo, fo soliheni batun-nala, falak dedeo-la leu, soaneu leoinak-kala.

¹¹ Manetualain fe hala heheluk-ka nde ia, neu basa daebafak-ka bu'u-bu'un lala'en-na nae, “Mafa'da Sion laun-nala mae, ‘Mete Manetualain fo Manasoi-manatefak-ka, Ana mai! Hataholi fo, Ana soi-po'i basak-kala, ala tungan.’

¹² Neukose, sila nanafoik na'de: ‘Hataholi malalao-malalafuk’; Hataholi fo, ‘Manetualain soi-tefa-nalas’. Neukose, loke Yerusalem lae, ‘Kota fo Manetualain dalen-na, tu'da neun’, ‘Kota fo Manetualain ta la'oelan so'on’.”