YESAYA 61 - Susula Malalaok Hehelu Palak Ma Hehelu Beuk

Hala namahokok la'eneu soi-po'ik-ka

¹ Manetualain Fo Mademaina, koasan-na nai au dalek; Ana hele au, de nadenu au soaneu au uni hala malole-a, neu hataholi nuu taa-hata taak-ka, ma tao alea-ahai hataholi fo, dalen-na nakalulutuk; soaneu po'a-benga neu hataholi nanahukuk-kala ae sila nanasoi-po'ik no lai-laik, ma neu hataholi manai bui dale-la ae neukose sila nanasoi-po'ik.

² Ana nadenu au, fo au tui-benga ae Manetualain fai soi-tefan-na, ana deka so; soaneu kokoe-nanasi basa manadale he'dik-kala, ma balas sila musun-nala;

³ soaneu fe hika-natadalek ma namahokok neu hataholi manadale he'dik, ma manasusak-ka; soaneu tao asafali sila dale he'din-na, da'di nakamee kokoa-kikiok. Neukose sila sama leo ai fo Manetualain sele matan. Neukose ala tao hata fo malole ma ndoos, nalosa Manetualain nananamatutua-namadedemak.

⁴ Neukose ala lafofo'a kota-kota fo, lakalulutuk dook-ka so ma lapadedeik mamanak fo nee-nee lino-linok dook-ka so.

⁵ Hai, au leoinang-ngala lemin, neukose hataholi nusa dea-la, lalalau-laoono emi; neukose ala foo emi bana-manum ma laue-lale'di, emi tinam-ma, ma emi osi angol-la.

⁶ Neukose loke emi soona lae, Manetualain atan-na ma nanafoik na'de ita Manetualain atan-na. Neukose emi mame'da mita, leoinak-kala su'i-beten, ma emi dalem-ma namatua nanahu sila hata-heton.

⁷ Nanahu, emi hapu basa mamaek, diku la'i dua so, ma na'de manggenggeok-ka, boema nananakadadaek-ka, ana da'di emi baba'em so, hu ndia de, emi hapu pusaka didikuk la'i dua, nai emi nusam-ma ma emi manuu namahoko manaketu basa taak-ka.

⁸ Manetualain nafa'da nae, “Au sue-lai ndoos ma matetuk-ka, ma akamuu-akadau tuni-ndenik, boema tatao-nono'i magalauk-ka. Neukose Au bae o ngga'dim-ma, no lilinekak, ma tao hehelu-balataa manaketu basa taak-ka o emi.

⁹ Emi tititi-nonosim, nananita-nalelak nai basa mamanak lala'en-na, nanakoa-nanakiok, nai basa leoina lala'en-na tala'da. Boema basa hataholi fo nitan, neukose ala manaku, lae Au ba'e-pala leoina ia.”

¹⁰ Yerusalem nafa'da nae, “Au amahoko-setelee nanahu Manetualain, au daleng-nga namahoko, nanahu Manetualain. Sama leo manaka'bing touk-ka no inak-ka, ala pake lilo-henu mana'ahiik mesa-mesan, leondiak boe Manetualain fe au pake ba'du so'da-molek, ma ba'du sesengik-ka.

¹¹ Sama leo bini-ngges fo, nanasele-nggalik-ka, neukose ana moli, fo ana da'di bubu'u-palusa, leondiak boe Manetualain nakamomolik so'da-molek-ka, de basa leoinak-kala, neukose koa-kion.”