YESAYA 60 - Susula Malalaok Hehelu Palak Ma Hehelu Beuk

Neukose Yerusalem nandela-nasa'a

¹ Hai Yerusalem, fo'a fo da'di mangale'dok leona, nana o maso'da mangale'dom-ma, ana mai so; Manetualain nangale'do-na o, nenik mandela-masa'an.

² Makiu-makahatuk-ka, potin-na daebafak-ka, Makiu-makahatuk-ka, potin-na leoinak-kala; tehu Manetualain mangale'don-na, ana tii nai o lain, mandela-masa'an, nananitak nai o lain.

³ Leoina-kala, ala faa beosu, mai leo o mangale'dom-ma mai, masa'ak fo ana tii nai o lain-na, ana taon-na manek-kala, dalen-nala lahiik-kana

⁴ Mitak hata fo, ana da'di nai o boboa-kaisum; laun-na lakabubua, fo ala fali leo o mai. O anatoum-mala, ala mai leme dook-ka mai, o anainam-mala, nanako'ok-kala.

⁵ O mete-mita ndia boema, o dodoo doak-kana ma o mata-panam napena; o nggenge ma o dalem-ma namatua. Leoina-kala, leni hata-heton leo o mai, o hapu su'i-betes manasasi kao-kaok-ka, neme tasi selik mai.

⁶ Onta makadotok lakamomotu-la, o nusam-ma, ala mai leme Midian ma Efa mai. Hataholi-la leni lilopilas ma boomenik neme Syeba mai, boema ala koa-kio Manetualain tatao-nono'in.

⁷ Leni fe o, bi'ihii bi'ilopo Kedar, bi'ilopo mane-a, nanasadiak neme Nebayot mai, soaneu o makaluku-makatelem. Tutunu-hohotuk sila-la, landaa no Manetualain dalen-na, Ana tao makalupu-makaseek, de Uman-na henuk no mandela-masa'ak.

⁸ Beek manalaak ndia, de sama leo ko'as-sa, ma sama leo manupui kalua, ana laa fali ma'in?

⁹ Ndia nde, ofa-ofak fo ala mai see, fo loo falik Manetualain anan-nala, leme nusa dook mai. Leni lilofulak, ma lilopilas, boema koa-kio emi Manetualaim-ma; ba'eneu Israel Manetualain Fo Malalao-malalafuk, fo manataon-na anan-nala, nanafe ha'da-holomata.

¹⁰ Manetualain nafa'da Yerusalem nae, “Hataholi nusa dea-la, neukose lafofo'a falik o papala nanadamam-ma, ma mane-manek-kala, neukose lalalau-laoono o. Makahulun-na, Au huku o, nai Au nasa-melung dale, tehu besak ia, Au nau sue-lai o

¹¹ Neukose, o lelesuina-ma, nanasoik lele'do-le'odaen, fo ela leoinak-kala leni su'i-beten leo o mai, no sila manen-nala, da'di leo hataholi nanafook.

¹² Leoina, ma nusak fo ala ta nau lakatele neu o fa, neukose mate-mopos, fo mopok-kasa.

¹³ Nula Libanon fo nandela-nasa'a, neukose lenin leo o mai, no ai berangan ai kaiou, ma ai eru, soaneu taon-na Au Umang-nga, da'di namahoko-seteleek, ma Au mamana napadeing-nga da'di mana'ahiik.

¹⁴ Ni'iana manatuni-ndeni o-a, ala mai sene-do'ok, ma manamakadadaek hai o-a, neukose lakatele, neukose loke o lae, ‘Manetualain Kotan-na’, ‘Sion, fo Israel Manetualain Malalao-malalafun-na, Kotan-na’.

¹⁵ Neukose, o ta nanala'oelak, ma ta nananakamuu-nakadauk fa, ma ta nanapo'ilotak da'di nee-nee lino-linok fa. Au tao o da'di dalen-namatutuak fo manaketu basa tak, mamana namahoko-setelek losa dodoon-na.

¹⁶ Neukose leoinak-kala, ma mane-manek-kala, lakaboboi o, sama leo inak esa, nakaboboi anan-na. Soona besak-ka o bubuluk, mae Au Manetualain, fo o manasoi-manatefam-ma, ma o bubuluk mae Israel Manetualain, fo o Manasoi-po'im-ma, mabe'i-balakaik.

¹⁷ Au uni lilopilas, fo nggati liti, ma lilofulak, fo nggati besi. Au fe liti, fo nggati ai, ma besi, fo nggati batu. Neukose Au tao-a, o nusam-ma nee-nee lino-linok, ma mole-dame, ma nanapaletak no ndoos ma matetuk.

¹⁸ Neukose ta hapu seluk halak, la'eneu naseti-nalakak nai o nusam-ma fa, la'eneu nakalulutuk, ma manandefak nai o dae baba'em-ma fa, Neukose Au asulu-ahapa o, sama leo papala nanadamak-ka, fo neukose, o koa-kio Au, da'di leo o manasoi-manatefam.

¹⁹ Ta paluu le'do mahaak-ka, la'e o nai fai lele'don-na fa, ma ta paluu bulak-ka, nasalaa la'e o, nai fai le'odaen-na. Nana Au fo Manetualain nde da'di mangale'do manaketu basa tak, ba'eneu o, Au asala ala o, nenik Au matua-mademang.

²⁰ Neukose hapu le'do fo, ana ta tenak nita, ba'eneu o, ma bulak fo, ana ta tenak nita fa. Nana Au fo Manetualain nde da'di mangale'do manaketu basa tak, ba'eneu o neukose o fai fafalum-ma nate'e.

²¹ O laum-ma lala'en-na nde been-na, hataholi ndoos neukose lanuu nusak-ka, losa dodoon-na. Sila sama leo, ai ndana fe'ek-ka, nananakadiditak neu ai fe'ek, fo Au nde selen-nana, soaneu nafa'da Au matua-mademang.

²² Nakalenak teidalek fo, anak nanseli, ma nuu taa-hata taak-ka, neukose ana da'di leoina matuaina, ma mabe'i-balakaik. Au fo Manetualain neukose no lai-laik, tao hata esa nandaa no fain-na.”