YESAYA 6 - Susula Malalaok Hehelu Palak Ma Hehelu Beuk

Manetualain naloo Yesaya soaneu da'di nabi

¹ Nai teuk fo mate Manek Uzia dalek, au ita Manetualain. Nangatuuk nai kandela manen madema ma mandela-masa'an lain. Ba'du manalun-na, poti ketu Manetualain Uman-na lala'en-na.

² Mahahae nusa so'dak-kala, ala pila lo'a-lo'a leo ha'i-a, lapadeik okofeo-lan, esan-na nanuu li'dak nee. Li'dak dua, poti ketu mata-panan, li'dak dua poti ketu aon-na, ma ana pake li'dak dua seluk, soaneu ana laa nenik.

³ Esa naloo bou-bou neu esa nae, “Malalao-malalafuk, Malalao-malalafuk, Malalao-malalafuk. Manetualain Fo Manakoasa, malalao-malalafuk. Daebafak-ka, henuk no mandela-masa'an.”

⁴ Halan-nala taon-na Manetualain Uman-na laten-na dele, ma Manetualain Uman ndia mesak-kana, henuk no ha'imasuk-ka.

⁵ Boema, au kokolak ae, “Soe! Ketu au namahehenang-nga, nana au kokolak dede'a manggenggeok nanahu sala-singok-ka, ma au leo nai leoina-la boeo leondiak boe. Leomae leondiak boe, au ita matang Manek fo nde Manetualain Fo Manakoasa!”

⁶ Basa boema, mahahae sila-la esa laa leo au mai, neni ha'ikaa manafolokakaak fo ana nggata nenin neme mei tunu-hotuk-ka mai.

⁷ Ana fe ha'ikaa manafolokakaak ndia koi la'e au bafang-nga, boema nafa'da nae, “Ha'ikaa manafolokakaak ia, koi la'e o difadoom-ma so. Besak ia, o salam-ma nanalose henik, ma Manetualain fe do'o do ampon neu o sala-singom so.”

⁸ Boema, au amanene Manetualain halan-na, nafa'da nae, “Neukose, Au adenu see? Neukose, see nde da'di ita maneni halan-na?” Boema au ataa ae, “Au nde ia. De madenu au leona!”

⁹ Boema nadenu au la'o, fo au uni hala heheluk ia soaneu hataholi-la nae, “Neukose emi mamanene makandoo, tehu emi ta malelak fa. Neukose emi taoafik makandoo, tehu emi ta bubuluk hata fo ana da'di fa.”

¹⁰ Boema, nafa'da au nae, “Tao mapa'a hataholi sila-la dudu'a-aafin-nala, tao mapake di'idoon-nala, ma tao mapoke matan-nala, fo ela ala boso lita, lamanene do lalelak, soona ala fali ma'is leo Au mai, fo ala lea-hai.”

¹¹ Boema au atane ae, “Manada'dik ia, ana da'di losa faihi'da Manetualain?” Boema nataa nae, “Losa kota-la da'di batu nananaunuk, fo ala da'di kota louk, hataholi ta leo uma-la so'on, ma dae-a da'di louk ma tokotik,

¹² Neukose, Au usi heni kota sila laun-nala leo mamana dook neu, nalosa basa dae lala'en-na, ala da'di dae nee-nee lino-linok.

¹³ Nakalenak, metema nai hataholi sanahulu dalek, bei hapu hataholi esa leo nai nusak ndia soona, neukose ndia boeo nanatao namopo-namatek boe. Tehu sama leo ai keka, metema lo'o henin soona, bei ela huun-na, leondiak boe, neukose bei ela leoina ndia, fo ana da'di hataholi malalao-malalafu makasososak.”