YESAYA 59 - Susula Malalaok Hehelu Palak Ma Hehelu Beuk

Nabi-a, soo-supa leoina ndia sala-singon

¹ Boso maedaenga Manetualain tapandoes nanseli, soaneu soi-tefa emi, do pakek nanseli, soaneu namanene emi hala naloloom-ma.

² Hu kande emi tatao-nono'i mangalaum-ma, de Ana ta nau namanene emi, nai lelek emi hule-haladoi neun. Emi sala-singom-mala nde ta'da fe'e emi neme Manetualain mai-a.

³ Emi masala, nanahu masapepeko-masandandalik-ka, ma emi tao hata, ta tunga ndoos ma matetuk-ka fa, nanahu emi tao-no'i tatao-nono'i laka-nakasetik, ma kanisak-ka.

⁴ Emi kalaak dede'ak, te ne'ek ta, ma maketu-mala'di no ta ndoos ma matetuk fa. Emi masapepeko-masandandali ma emi matea-mahele neu hata fo, manada'di tak-ka; emi manuu dale tutu'uk, soaneu tao soe hataholi fe'ek, ma tao tatao-nono'i mangalauk.

^5-6 Emi dale tutu'u mangalaum-mala, neni mamates, sama leo menge malasok-ka tolon-na, Metema menge tolo ndia, nataka'di soona, mengen-na leo deak mai. Dale tutu'uk ndia, sosoa-ndandaan ta makandondook ba'eneu emi, sama leo bua papakek fo, nanatenuk neme bolau ape-a mai!

⁷ Emi tutu'u tatao-nono'i mangalauk nakandondoo henin, de emi mahiik taon no lai-laik. Emi ta bii-mamata'u, soaneu taomisa hataholi sala tak-ka. Emi meu su'di leo bee meu soona, emi la'oela nakalulutuk-ka, ma mamate-momopok-ka nai ndia.

⁸ Emi ta sanga enok, soaneu mole-dame-a fa, ma basa emi tatao-nono'i mala, ta tunga ndoos ma matetuk-ka fa. Emi enom-ma dopelele'u, de hataholi manala'ok tunga enok ndia, neukose ta naua-nanale fa.

Leoina ndia manaku sila sala-singon

⁹ Boema, leoina ndia, nafa'da Manetualain nae, “Besak ia, ami bubuluk, tao le'e de, O ta soi-tefa-mala ami neme hataholi fo, manatuni-ndeni ami-a fa. Ami mahani mangale'dok-ka, tehu hapu ka'da makiu-makahatuk-ka.

¹⁰ Ami mafanggonggoe, sama leo hataholi pokek-ka; ami makatunu nai fai le'dohanan-na, sama leo nai fatila'da; ami sama leo, hataholi manamatek, nai hataholi maso'dak-ka tala'da.

¹¹ Ami bii-mamata'u, ma dale he'di; ami sanga ndoos ma matetuk-ka, tehu ta hapu fan; ami mamahena so'da-molek-ka, tehu manada'di tak.

¹² Tete'ek-ka, ami tatao-nono'i mangalaum makadotok, soaneu O so; ami sala-singom, fe salak neu ami. Te'e-te'e, ami mame'da, ami tatao-nono'i mangalaum-ma, ma ami bubuluk, ami sala-singom.

¹³ Ami malelesi, ma lena-la'ban Manetualain, ma ta nau tunga, ami Manetualaim-ma fa. Ami tuni-ndeni basa hataholi fe'ek, ma la'ok sala so; ami dudu'a-aafim natofa-natalak, ma ami hala-kokolam, masapepeko-masandandalik.

¹⁴ Hoholo-lalane ndoos ma matetuk-ka, nanasi'u henik so, ma ndoos ma matetuk-ka, nanataok leo dook-ka neu. Dale ndoos-sa, nanaheheta-aa'ik nai lea matan, ma dale mangale'dok-ka, nanataoafi tak.

¹⁵ Ta hapu hataholi dale ndoos so'on, ma see kande, nadook aoinan-na neme tao-nono'i mangalauk-ka mai soona, ndia nde da'di tatao-nono'i mangalauk-ka, paa nana'an-na.” Manetualain nita basan so, de Ana ta namahoko, nae ta hapu ndoos ma matetuk so'on.

Manetualain nahehele aon soi-tefa anan-nala

¹⁶ Ana dodoo doak-kana, nae ta hapu hataholi tutulumatak fa, ma ta hapu manamasala'e fa. Boema, Ana pake koasa mesan-na, soaneu soi-tefa, ma fes sesengik.

¹⁷ Ana pake ndoos ma matetuk-ka, ma so'da-molek-ka, da'di leo ba'du besik, ma ti'ilanga bai. Dalen-na kisak soaneu Ana tao nabebeu, ma Ana balas hataholi ta manatao ndoos ma matetuk-ka fa.

¹⁸ Ana balas musun-nala, nandaa no sila tatao-nono'in-nala. Nakalenak, leoina manai pulu dook-kala, ta lala huhukun-na deak fa.

¹⁹ Neukose basa hataholi-la, leme dulu losa muli, ala bii-lamata'u neu koasa ma matua-mademan. Neukose, Ana mai sama leo lee, fo oen-na naneni, fo Manetualain ani hahaen-na, nde taon-nan naneni ndia.

²⁰ Manetualain nafa'da anan-nala nae, “Neukose, Au mai leo Yerusalem mai, fo soi-tefa emi basa-basam fo, manatukatei-saledale neme sala-singon-nala mai.

²¹ Au tao hehelu-balataak o emi ae: Au fe emi, Au koasang-nga, ma Au nanoling-nga, losa dodoon-na. Manolin neu emi anam-mala, fo ela sila boeo, hapu lanolin neu sila tititi-nonosin, mulai besak ia, losa dodoon-na.”