YESAYA 56 - Susula Malalaok Hehelu Palak Ma Hehelu Beuk

Basa leoinak-kala neukose nanalekek nai Manetualain anan-nala dalek

¹ Manetualain nafa'da anan-nala nae, “Tao hata fo ndoos, ma matetuk ma nandaa no Au hoholo-lalaneng. Nana, ba'ihanak seluk bai te, Au mai soi-tefa emi ma Au ndo matetung nananafa'dak.

² Au be'e-pala hataholi fo, ana tao natetu fai Sabat-ta, ma ana ta tao nanggenggeo faik ndia fa. Hataholi fo, ana ta tao tatao-nono'i mangalauk fa, neukose Au taon no malole.”

³ Hataholi nusa dea, fo ala da'di esa lo Manetualainanan-nala, ta bole lafa'da lae, “Manetualain ta fe au loak, fo sene-do'ok neun, sama-sama o anan-nala fa.” Hataholi fo, mamae loun-na nanakee henik soona, ana ta bole dudu'a-dodoo nae, “Au ta hapu da'di Manetualain anan fa, nana au ta bisa hapu tititi-nonosik fa.”

⁴ Manetualain nafa'das nae, “Metema, emi taoafik neu fai Sabat-ta, metema emi lilineka neu Au hala-hehelung-nga, ma tao hata fo, nandaa no Au daleng-nga,

⁵ soona neukose, o na'dem-ma, nananafandendelek nai Au Umang dale, ma nai Au leoinang dale. Ndia malole lena neme, o manuu ana touk ma anainak. Au fe emi na'dek fo, manaketu basa taak-ka, fo neukose, ta nananafandele henik fa.”

⁶ Manetualain nafa'da, hataholi nusa de fo nanalekek nai anan-nala dalek, ma manasue-lai Manetualain, ma nakatele neun, fo manataoafik neu fai Sabat-ta, ma lilineka neu hehelu-balataan-na, nae,

⁷ “Neukose Au o emi leo Sion, leo Au pupukung fo, malalao-malalafuk-ka neu, ma Au fe namahoko-seteleek, nai Au uma mamasong-nga Tutunu-hohotuk fo, emi tunu-hotun nai Au mei tunu-hotung lain-na, neukose Au sipok-kana. Neukose loke Au Umang-nga soona lae, uma huhule-haladoik soaneu leoina lala'en-na.”

⁸ Manetualain Fo Mademaina, fo no falik hataholi Israel-la, neme mamana ookak-ka mai, nafa'da nae leoia, “Neukose Au o hataholi fe'ek-kala mai, fo ala da'di esa lo sila fo, nanatao nakabubua basak-kala so.”

Basa mauli-malangan Israel-la, nanahukuk

⁹ Manetualain nadenu leoina nusa dea-la, ala mai sama leo bana makaa-makisuk-ka, fo ana kaa-na, anan-nala.

¹⁰ Manetualain nae, “Au leoinang-nga, mauli-malangan-nala nde been-na, hataholi pokek-kala! Ala ta bubuluk hata esa boen. Sila sama leo busa hala tak-ka, fo ta nakaa fa, tehu ka'da ana sungu, fo nalame'i. Ala sungu soona, lamahoko lanseli!

¹¹ Sila sama leo busa maa fula, fo ta nakabete nita fa. Mauli-malangan sila-la nggoak-kala. Esa-esak tao tunga dale hihii-nanau mesan-na, ma ana sanga ndia nanalan-na, mesak-kana.

¹² Manamafuk sila-la, lafa'da lae, ‘Mai fo, ata tinu angol, ma tinu losa takabete! Neukose, balahaa te, malole lena neme faik ia mai!’ ”