YESAYA 55 - Susula Malalaok Hehelu Palak Ma Hehelu Beuk

Nalolook soaneu tunga nai so'da-molek maneme Manetualain mai

¹ Manetualain nafa'da nae, “Mai leon, basa emi fo, manamaa ma'dak-kala, fo minu oe nanasadiak-ka leona. Mai leon, emi fo doi tak-kala, sipo gandum, te ta bae fa, fo mi'a leona! Angol ma kapaoe-a, nanasadiak, sipon no ta bae fa.

² Sosoak hata, asa hata esa, fo ta tao namahoko emi dalem-ma, ma maue-male'di soaneu hata fo, ta nandaa emi dalem-ma fa? Tunga Au paletang-nga, soona neukose emi mi'a hata fo malole, ma mi'a nana'a mala'da.

³ Mamanene leon, hai leoinak-kala lemin, mai leo Au mai, te neukose Au fe emi so'da matetuk-ka. No susue-lalaik ma lilinekak, fo Au helun neu Dauk-ka, Au pa'a hehelu-balataak, fo manaketu basa taak-ka no emi.

⁴ Te'e-te'e, Au taon da'di mauli-malangan, ma malanga solda'du matuaina sakasii neme Au koasang-nga mai, soaneu leoinak-kala.

⁵ Neukose emi maloo leoina nusa dea-la, fo no lai-laik, ala mai leo emi mai, hu kande Au, fo emi Manetualaim-ma, Israel Manetualaim malalao-malalafun-na, nana Au amatutua-amadedema basa emi so.”

⁶ Fali leo Manetualain mai leona, nai lelek bei bisa hapun; maloo bou-bou neun, nai lelek Ana deka.

⁷ Ela leo been-na, hataholi manatao tatao-nono'i mangalauk-ka, ana tao nahii so'dan-na, ma nasafali dudu'a-aafin. Nemen-na, fo ana fali ma'in leo Manetualain mai, fo ela ana hapu susue-lalain. Ela leo been-na, ana lepos fali leo ita Manetualain-na mai, nana Manetualain fe do'o do ampon no dale manasue-manalaik.

⁸ Manetualain nafa'da nae, “Au dudu'a-aafing, o dudu'a-aafim ta ndia fa, ma Au enong-nga, o enom ta ndia fa.

⁹ Sama leo lalai-a dedeman-na, nai daebafak-ka lain, soona dedemak ndia nde, Au dudu'a-aafing nai emi dudu'a-aafim lain, ma Au enong-nga nai emi enom lain.

¹⁰ Sama leo u'dan-na, ana mai neme lalai mai, fo ana ta fali ne'u fan, tehu ana tao nakadoe daebafak-ka, fo ana taon-na dae-a, nalole, ma nakamomolik bubu'u-palusa, ana fe buna-boak neu manasele-mananggali, ma nana'ak neu hataholi fo, ana nau na'a.

¹¹ Leondiak boe, dede'a-kokolak fo, Au kokolak-ka, ana ta fali ma'in leo Au mai, no palsuma fa, tehu ana hapu tao hata fo, Au ahiik-kana, ma ana hapu basa hata lalaen fo, Au dudu'ak-ka.

¹² Neukose emi la'oela Babel no namahokok, ma nana-no falik no so'da-molek. Letek-kala, ma pupukuk-kala, neukose lamahoko-setelee, ma hika-latadale, ai manai tina-la, totoko liman-nala.

¹³ Neukose ai kaiou-la, ala nggati makatema dila-nggauk, bubu'u-palusa bunga, ala nggati makatema dila-nggauk. Ndia da'di, fo ela Au nanakoa-nanakiok; da'di leo, ta'du-tana manaketu-basa tak, fo neukose ta mopo fan.”