YESAYA 54 - Susula Malalaok Hehelu Palak Ma Hehelu Beuk

Manetualain susue-lalain soaneu Israel

¹ Yerusalem, makahulun-na, o sama leo ina ta manabongik, fo ta bisa bongi fa. Tehu besak ia, hika-matadale leona, ma makamee no namahoko-seteleek! Nana o anam-mala, makadotok nanseli, lena heni, ina maela saok-ka, anan-nala.

² Tao mamaloa, o lalaa temam fo o leok-ka; tuti manalu talin-nala, ma tutu mahele ai papakun-nala!

³ Neukose o boetai mamaloa leo kona, ma leo kii muu, neukose o laum-ma, langatuu-la, leoinak-kala daen-na, ma ala leo kota-kota fo besak ia, nee-nee lino-linok-kala.

⁴ Boso bii, te neukose o ta nananakamumulu-nakamamaek fa; neukose ta nananakadadaek ma o na'dem-ma, ta nanggenggeo fa. Neukose o mafandele heni o manalilinekam-ma, nai lelek o bei muli-solum-ma; o mafandele heni, o nee-nee lino-linom, fo nai lelek o inafalu-a.

⁵ O saotoum-ma nde, Manamakadada'dik o-a. Israel Manetualain malalao-malalafun-na nde bee-na, o Manasoi-manatefam. Na'den-na nde, Manetualain Fo Manakoasa, Ndia nde Manetualain fo, manakoasa daebafak-ka lala'en-na.

⁶ Israel, o sama leo saoina muli-soluk esa, fo o dalem-ma he'dis-sa, nanahu o saotoum-ma, la'o ela o. Tehu, Manetualain naloo falik o, de nafa'da nae,

⁷ “Au la'oela o, dodoon-na, ka'da hatematak esa; Au ho'i falik o, no susue-lalaik matuaina.

⁸ Au heok asadea o, ka'da ba'ihanak mesan, nanahu Au nasa-melung lua ponu-ponu. Tehu Au sue-lai o, nenik susue-lalai manaketu basa taak-ka.” Manetualain, fo o Manasoi-manatefam-ma, nafa'da nae leondia.

⁹ “Au aheluk, sama leo nai Noh tepo lelen-na, ae faa tuak-ka, neukose ana ta luu-na daebafak-ka so'on, leondiak boe, besak ia, Au aheluk ae neukose, Au ta amanasa, do Au fe nasanene'da mahelek neu emi so'on.

¹⁰ Leomae letek-kala, ma pupukuk-kala langgengo, tehu neukose Au ta hahae sue-lai o fa. Neukose Au ho'u ahele, Au hehelu-balataa mole-dameng-nga,” Manetualain fo, manasue-lai o-a, nafa'da nae leondia.

Yerusalem beuk-ka

¹¹ Manetualain nafa'da nae, “Hai Yerusalem, kota fo ua-nale ta malole fa, o be'i-balakaim ta, ma o manakokoe-nanasim ta. Neukose Au pe'da falik o batu netem-mala, nenik batu kabelik-kala.

¹² Au afofo'a kota musun-nala neme batu dalima mai, o lelesuinam-mala, neme batu poemata mai, o papala nanadamam-mala neme batu poemata kunik, fo sama no batu poemata.

¹³ Basa o laum-mala, ala da'di Au ana sakolang, neukose ala hapu tetu-temak ma so'da-molek.

¹⁴ O nananafofo'ak nenik netes ndoos ma matetuk, o dook-ka neme bibii-namata'u matuaina, ma tuni-ndenik-ka mai.

¹⁵ Metema o nanasapu-nak soona, Au ta nde adenu-a fa, su'di see fo, ana sapu-na o soona, neukose ana tu'da.

¹⁶ Au nde akadada'dik tuka besi, fo ana nggengge'u ha'i-a, soaneu tutu tafa-sisilo. Au boeo, nde manamakadada'dik solda'du, fo manapake tafa-sisilo soaneu nanisa.

¹⁷ Tehu basa tafa-sisilo fo, nanatutuk soaneu la'ban Au-a, neukose buna-boan ta. Ma basa kalaak manai uma manakee-manafula dalek-ka, neukose o fe sala butin-na. Neukose, Au fe sesengik neu Au atang-ngala, da'di leo bua palsen.” Manetualain nafa'da nae leondia.