YESAYA 53 - Susula Malalaok Hehelu Palak Ma Hehelu Beuk

¹ Leoina ndia nataa nae, “Neukose see, namahele hata fo, ami mamanene basan so? Nafa'da basa Manetualain koasan-na, neu see so?

² Manetualain nau, atan ndia sama leo nupuk-ka, fo ana moli nai dae tokotik. Ta hapu mana'ahiik, nai aopaan-na, fo ita meten fa; ta hapu hata esa fo nandaa, soaneu ita tahiik-kana fa.

³ Ita takadadaek-kana, ma ta deka to fan, hataholi fo henuk no doidosok-ka, ma biasa ana lu'a-lepa he'di-laus. Hataholi esa boen, ta nau mete fan, ma ita boeo, ta nau taoafik neu fan.

⁴ Tunga ndoon-na, ana lu'a-lepak ndia, nde ita he'di-laun-na, ma doi-doson ndia, nde ita doi-doson-na, te se'kona, ita taedaeng-nga, doi-doson ndia, Manetualain hukun nde ndia.

⁵ Tehu nakahina, hu kande ita sala-singon, ma nanafepak nenik ue hu kande ita tatao-nono'i mangalaun-na. Nanahukuk, fo ela ita nanasoi-tefak, nanahu ue-a leen-nala, de ita nantao nalea-nahaik.

⁶ Ita basa-basa-tala, tatofa-tatalak, sama leo bi'ilopo-a, fo esa-esak sangak enon. Manetualain nadodou basa ita sala-singon neun so.

⁷ Nanafepa-li'uk, no ta pake ha'da hataholik fa, tehu, ana lu'a-lepan no, hahae manalu. Ana ta buka bafan-na, sama leo leni bi'ilopoana leo mamana dodo'dok-ka neu, do nggute bi'ilopoina bulun-na.

⁸ Nanahukuk, ma nananaketu-nala'dik, boema nanalele'a-lolosok, ma nanahuku nisak. Ta hapu esa boen, fo ana taoafik neu ua-nalen fa; ana mate, hu kande ita leoinan, sala-singon.

⁹ Nanatoi-natonok sama-sama no hataholi mangalauk-kala; loo-laten nai hataholi kamasu'ik-kala tala'da heon, leomae, ana beita tao nita, tatao-nono'i mangalauk la'iesa boen, ma ana beita tipu-dai nita la'iesa boen.”

¹⁰ Manetualain nde nahiik, nae ana doi-doso-a, ma ana fe aoinan-na neu, fo da'di leo tutunu-hohotuk fo, sala singok hapu do'o do ampon. Boema, neukose teun-na namanalu, fo nita tititi-nonosin, Neukose Manetualain hihii-nanaun nanatao natetuk, tunga ndia.

¹¹ Hu ndia de, Manetualain nafa'da nae, “Name'da basa doidosok-ka soona, neukose naua-nanale, ma dalen-na, name'da namahokok. Au atang ndia, nde nandaa no Au daleng-nga, ana lu'a-lepa basa, hataholi makadotok huhukun-na so; hu no hataholi ndia de, neukose Au fe do'o do ampon neus.

¹² Ana fe heni so'dan-na, no dale hihii-nanau mesan-na, de nanalekek nai hataholi mangalauk-kala, dede'un-na dalek. Ana nasaa, hataholi makadotok sala-singon, ma ana hule-haladoi, fo ela hataholi sila, hapu do'o do ampon. Boema Au fen hataholi makadotok, da'di leo bua palsen, ma ana hapu baba'ek sama-sama no hataholi ndoos-sala.”