YESAYA 50 - Susula Malalaok Hehelu Palak Ma Hehelu Beuk

¹ Manetualain nafa'da Israel nae, “Hai Au anang-ngo nei, o maedaenga, Au usiheni o sama leo saotouk esa, usiheni saoinan-na do? Metema leondiak soona, susulan-naelak-ka, nai bee? O maedaenga, Au ase'oheni o, sama leo amak esa, nase'o anan-na, leo manala'ok hutak-ka neu do? Ta! O nanafook, ma nanatu'u-tapak, hu kande o sala-singom, ma o tatao-nono'i mangalaum-ma!

² Tao le'e de, neme Au anang-ngala mai, hataholi esa boen, ta hapu nataa, nai lelek, Au mai aloos? Ade, ka'da ala bedenge, nanahu laedaenga. Au ta soi-po'i, ma soi-tefa abe'i fas do? Te'e-te'e, no Au paletang-nga, de tasi ma'dan, Au tao lee-la, da'di moo solokaek, nalosa i'ak-kala mates, de laboo mami.

³ Au tao-a lalai-a, da'di nggeo makahatuk, Au babaa ketun, nenik tema susa.”

Manetualain atan fo manatunga paleta

⁴ Manetualain Fo Mademaina, nanoli au kokolak, fo ela au hala-kokolang natetea-nahehele hataholi manasota-manguk-ka. Tunga-tunga fafain-na, Ana fafae nafo'a au dale hihiing-nga soaneu au amanene, nanolin ba'eneu au-a.

⁵ Manetualain fe au malelak; au ta la'ban, do lepos la'oela fan.

⁶ Au fe au muliha'ing-nga, neu hataholi manafepa au-a; ma au nasebu'ung-nga neu, hataholi manafe'a au nggolomeing-nga. Au ta afuni au mata-panang nai lelek au nananakadadaek, ma nanamu'di ape.

⁷ Nana Manetualain tulu-fali au, de au ta nananakamamaek fa. Au tao akatetesak au daleng-nga fo ela nahele; Au bubuluk mae au ta nakamamaek fa.

⁸ Nana Manetualain deka, Ana nafa'da nae, au salang ta. See nau nale'a no au? Mai fo, ata tutulumatak sama-sama. See kande la'ban au? Madenun fo, ana mai deka no au.

⁹ Tete'ek-ka, Manetualain Fo Mademaina, nasala'e au, see napalani nafa'da nae, au asala? Basa manakalaak au-a, neukose mopok-kasa sama leo andae-a, na'a tema po'ok-ka.

¹⁰ Hai emi fo, manafe ha'da-holomata neu Manetualain, manamamanene atan-na, hala-kokolan-na, enok fo emi tungak-ka, fafa'kama makahatuk, de ta hapu mangale'dok, nasalaa ba'eneu emi fa; tehu, mamahele neu Manetualain leona; masala'da o deam-ma, neu o Manetualaim.

¹¹ Hai emi fo, nau tao soe hataholi fe'ek, neukose emi nanatao namate-namopok, hu kande emi dale tutu'u mesam-ma. Manetualain nde tao manada'dik ndia, neukose emi nanafepa-li'uk nenik fefepa-lili'u mabela.