YESAYA 48 - Susula Malalaok Hehelu Palak Ma Hehelu Beuk

Manetualain koasa maso'da fai manamaik-ka

¹ Mamanene leon, hai Yakob tititi-nonosin, Yehuda tititi-nonosin fo, manapake Israel na'den-na, o mafa'da mae, o manaku Israel Manetualain-na, ma o soo menik Manetualain na'den-na. Tehu, o hala-kokolam sila-la, ta neme o dale ndoom-ma mai fa.

² Leomae leondiak boe, o manaku no dalen-namatuak, mae kota malalao-malalafuk-ka, laun o; ma o masala'da neu Israel Manetualain fo loken lae Manetualain Fo Manakoasa

³ Manetualain nafa'da nae, “Mamanene leon, hai Israel! Hata fo, makahulun-na ana da'di, Au tui-bengan dook-ka so; hata fo Au afa'dan, no kaiboik, Au akalala'ok-kana ma Au taon da'di nananitak.

⁴ Au bubuluk, ae o dalem-ma natea, ta tunga paleta, ma langa batuk.

⁵ Hu ndia de, neme makahulun-na mai, Au neuk basan so; ana beita da'di fa te, Au tui-bengan so, fo ela o boso mafa'da mae o dodoki-dudula sosongo-tatangom, tatao-nono'in ndia.

⁶ Basa Au dede'a nafa'da elang, fo o mamanenek-kala, ala da'di so; o muse manaku, mae Au hala-kokolang sila-la, la'en. Besak ia, Au tui-benga dede'a beuk-kala, nanabibila-babaak-kala, fo o beita bubuluk-kana fa.

⁷ Besak ia, besak-ka Au akadada'dik-kana, te ta ndek makahulun-na fa; Beita la'iesa fo, o mamanene la'eneu dede'ak ndia, fo ela o boso mafa'da mae o bubuluk basa hata lala'en-na.

⁸ Au bubuluk, o ta mamahele fa, neme makahulun-na mai, o nananita-nalelak da'di leo manamalelesik. Hu ndia de, o ta bubuluk-kana fa, o ta mamanene dede'ak de'ek esa boen.

⁹ Au akatatakak Au nasa-melung, fo ela Au na'deng-nga nanakoa-kiok. Au akatatakak-kana, ba'eneu o, fo ela, o ta nanatao namate-namopok fa.

¹⁰ Au fola o nai ha'i doidosok dale, sama leo lilofulak-ka, nanafolak nai dapu ha'i dale.

¹¹ Au tao ndia, hu kande Au aoinang-nga mesak-kana, nana Au ta po'ilotak, Au na'deng-nga, nanatao nanggenggeok fa; Au ta aba'e Au ndela-sa'ang, no su'di see boen.”

Kores, mauli-malangan fo, Manetualain helek-ka

¹² Manetualain nafa'da nae, “Mamanene leon Israel, fo Au alook-ka, O Manetualaim Au nahele. Au nde makasososak, ma Au nde mate'ek-ka boe.

¹³ Au limang-nga nde pe'da daebafak-ka buin-na ma nakapepela lalai-a. Metema, Au aloo na'den-na soona, ala mai no lai-laik.

¹⁴ Emi basa-basam-mala makabubua, fo mamanene leona! Nai lamatua daebafak-kala tala'da, ta hapu mananeuk-nala, nae Au hataholi heheleng-nga, neukose ana sapu-la Babel; neukose ana tao hata fo, Au ahiik-kana.

¹⁵ Au nde mana mafa'dan-nana, ma Au nde manamaloo ndia, fo manahela-nole ndia, nalosa ana hapu buna-boan.

¹⁶ Mai deka mo Au, fo mamanene leon, neme makahulun-na mai, Au kokolak no le'do-le'dok; ma Au tao Au hala-kokolang, da'di nananitak tataas esa.” Besak ia Manetualain nadenu au, de Ana fe koasan-na neu au.

Manetualain dale tutu'un soaneu anan-nala

¹⁷ Israel Manetualain malalao-malalafun-na, ma o Manasoi-tefam-ma, nafa'da nae, “Au nde o Amam Manetualaim, fo namanenenanoli o, hata fo masosoa-ndandaak ba'eneu o, ma Ana hela-nole o, nai enok fo, o tungak-ka.

¹⁸ Leouni'ka, o taoafik neu Au paletang-ngala, soona o ua-nalem sama leo lee manama'da tak-ka, ma o ua-nale malolem-ma, sama leo lii nai tasi lai, fo ana ta hahae nita fa.

¹⁹ Neukose o tititi-nonosim, de'u solokaek manai tasi su'uk-ka; Au apalani afa'da nana, tao leo bee-o, ta mate-mopo fas.”

²⁰ La'o leona, fo malai meme Babel mai, tui-benga halak ia, leo basa mamanak lala'en-na neu. Tui-benga no namahoko-seteleek mae: “Manetualain soi-tefa basa Israel, fo atan-na so!

²¹ Lelek Au hela-noles tunga moo na'u tak-ka, ala ta doi-doso, hu kande maa ma'dak-ka fa. Manetualain fa'a ba'e lete batu-a, fo oe faa mai, Ana fe oe-a faa neme batu dale mai, fo ala linu.

²² Ba'eneu hataholi mangalauk-ka, ana ta hapu so'da-molek fa,” Manetualain nafa'da nae leondia.