YESAYA 46 - Susula Malalaok Hehelu Palak Ma Hehelu Beuk

¹ Babel lamatua daebafan-nala, babasan-na nde ia; makahulun-na, dodoki-dudulak Bel ma Nebo, nanasene-do'ok, tehu besak ia, nanafuak nai bana-manu lain, de ala da'di lelepa mabela, soaneu bana-manu manasota-manguk-ka.

² Dodoki-dudulak sila-la, ta tulu-fali labe'i manandolok-kala fa, sila nanafoo nenik, da'di leo hataholi nanafook. Sila babasan-na nde ndia.

³ Mamanene Au, hai Yakob tititi-nonosin-nala, emi basa-basam fo Au anang bei elak-kala lemin. Au akaboboi emi neme lelek bongi emi mai so.

⁴ Emi Manetualaim Au nahele, losa emi mamalasi; ma Au anea ahele emi losa emi langam-ma mofa. Au akadada'dik emi, de Au akaboboi ahele emi, neukose Au tulu-fali ma soi-tefa emi.

⁵ Emi nau makasasamak Au o see? Ade hapu hata fo, sama no Au do?

⁶ Hataholi-a ana buka tas doin-na, fo ana poli lilopilan-na, boema ana tai lilofulan-na, nenik tatais. Ana se'ba-bae tuka lilopilas-sa, fo ana tao dodoki-dudula sosongo-tatangok, boema, ana sene-do'ok neu, ana taon-na dodoki-dudulak-ka.

⁷ Dodoki-dudulak ndia, nanapakuk, ma nanape'dak nai mamanan-na, ana napadeik nai ndia, ma ta hapu laliheok-kana fa Metema, hataholi hule-haladoi neun soona, ana ta nataa fa, ma ana ta soi-tefa-nala fan, neme toto'a-tataan-na mai fa.

⁸ Mafandendelek, ma tai-dodoo leona, hai hataholi malelesik-kala lemin!

⁹ Mafandendelek, manada'dik manai tepo lelek makahulun eli; manaku leon, mae Au Manetualain, de ta hapu fe'ek fa, Au Manetualain, de ta hapu hata esa boen, sama leo Au fa.

¹⁰ Neme makasososan-na, Au tui-benga dede'a makabuik-kala, neme makahulun-na, Au afa'da ela, hata fo, neukose ana da'di. Au afa'da ae, Au nakeketung-nga, nanatao natetuk, tao leo bee-o, Au tao tunga, Au dale hihiing-nga!

¹¹ Au aloo manakoasa esa, neme dulu mai ana mai sama leo manupui makaa-makisuk esa fo nakalala'ok Au nakeketung-nga. Hata fo Au afa'dan soona, neukose Au tao-no'in, hata fo, Au tutu'un soona, tao leo bee-o, neukose Au taon.

¹² Hai hataholi manakoao-ndaeaok-kala lemin, emi fo manadodoo mae sesengik-ka, bei nai dook-ka.

¹³ Neukose Au fe fai soi-po'ik-ka, ana deka, so'da-molek fo Au fe-ka, ta nakano'dok fain-na so'on. Neukose Au soi-tefa Yerusalem, ma Au fe ha'da-holomata neu Israel.”