YESAYA 42 - Susula Malalaok Hehelu Palak Ma Hehelu Beuk

Manetualain atan-na

¹ Manetualain nafa'da nae, “Au atang fo, Au tia-to'ban-na, nde ia, Au hataholi heheleng fo nandaa no Au daleng-nga. Au fe basa Au koasang-nga neun so, soaneu neni ndoos ma matetuk-ka, ba'eneu leoinak-kala esa-esak.

² Neukose ana ta eeki, do naloo bou-bou napane'e fa, neukose ta mamanene halan-na, nai enok lain fa.

³ Oo manamalek-ka, neukose ta nanatao nala'dik fa, banuk manapila ma'u-ma'uk-ka, neukose ta nanafuu nisak fa. Neukose nafa'da ndoos-sa no lilinekak,

⁴ dalen-na ta naba'e, do ketu namahehenan-na fa, losa ndoos ma matetuk-ka, napadeik natetu nai daebafak-ka. Nusa dook-kala, lahiik nanolin-na.”

⁵ Amak Manetualain nakadada'dik, ma nakapepela lalai-a; Ana nakadada'dik daebafak-ka, ma basa manamolik manai lain lala'en-na. Ana fe hataholi daebafak-ka, ani hahae maso'dak ma samanek. Ana nanduku-nalosak hala heheluk ia, neu atan-na.

⁶ “Au, Manetualain, fo naloo ma fe o bela-ba'uk soaneu makalala'ok ndoos ma matetuk-ka. Au hela-nole, ma Au akaboboi o, fo o da'di hehelu-balataak, ba'eneu hataholi daebafak-ka, ma mangale'dok ba'eneu basa leoinak-kala.

⁷ Soaneu fe hataholi pokek-ka nita, ma soi-po'i hataholi manai bui makahatuk-ka dalek.

⁸ Au nde Manetualain, fo Au na'deng-nga nde ndia; Au ta fe Au matua-mademang, neu su'di see boen; Au ta fe Au na'de nananita-nalelang-nga, neu dodoki-dudulak fa.

⁹ Besak ia, Au afa'da elak-ka, ana da'di so; Au nau afa'da dede'a beuk-kala; basa sila-la beita da'di fa te, Au afa'dan neu o so.”

Nakamee kokoa-kikiok

¹⁰ Makamee nakamee beuk, ba'eneu Manetualain, hai basa daebafak-ka lala'en-na lemin, koa-kion leona! Hai tasi, mangguu leon ma basa oe-isin, nusak manai dook-kala, ma basa laun-nala!

¹¹ Ela leo been-na, moo solokaek-ka, ma kotan-nala koa-kio Manetualain, malole lenak, Kedar laun-nala koa-kion leona! Ela leo been-na, kota Sela, laun-nala eeki-latadale ma laloo bou-bou leme letek-ka poin-na mai!

¹² Malole lenak, ala lamatutua-lamadedema Manetualain, ma taom-ma na'den-na nananita-nalelak, nai nusa dook-kala.

¹³ Manetualain tutulumatak, de natee-natati sama leo palani tatibatu esa, sama leo solda'du esa, manggate nanseli natee-natatik-ka. Ana so'uk eeki natee-natatik-ka, ma natu'du balakain-na neu musu non-na.

Manetualain naheluk, soaneu tulu-fali anan-nala

¹⁴ Manetualain nafa'da nae, “Au ta ahala dook-ka so; Au denge-denge, ma Au akatatakak au aoinang-nga. Besak ia, fain-na losa, soaneu Au tao hata esa, Au nau akadii-akau sama leo ina manabongik-ka.

¹⁵ Neukose Au tao-a letek ma pupukuk-kala, na'u ta moli fas, Au tao-a basa bubu'u-palusan ala male. Au tao asafali lee-a bafan-nala da'di moo solokaek, Au tao-a basa dano-la, ma'das.

¹⁶ Neukose Au hela-nole Au leoinang pokek-kala tunga enok fo, ala ta bubuluk-kana fa; Neukose Au hela-noles lai enok fo, ta lalelak-kana fa. Au tao-a makahatuk-ka, da'di mangale'dok ba'eneus, ma Au tao atetu eno manapeko-pakik-kala. Ndia nde, neukose Au taon ba'eneus, de tao leo bee-o, neukose Au tao atetun.

¹⁷ Hataholi fo, namahele neu dodoki-dudulak sosongo-tatangok-ka, ma ana manakun da'di leo lamatua daebafak soona, neukose nananakadadaek, ma nananakamumulu-nakamamaek.”

Israel ta nau nanoli fan

¹⁸ Manetualain nafa'da nae, “Hai, hataholi pakek-kala lemin, mamanene leon! Hai, hataholi pokek-kala lemin, mita leona!

¹⁹ See kande, poken-na lena, neme Au atang Israel mai? See kande, paken-na lena, neme Au hataholi nadedenung-ngala mai?

²⁰ Israel, o mita makadotok, tehu o ta taoafik neu fan, o madi'idook, tehu o ta mamanene fa.”

²¹ Manetualain nau soi-tefa; Ana hii fe ha'da-holomata, ma mamatutua-mamadedema hoholo-lalanen.

²² Tehu nako, namanako basa leoina ndia so; sila nanahukuk lai kama-kama manai dae buin-na, ma nanataok leo bui-la dalek leu. Ala da'di nakodaa paa nana'an, tehu ta hapu manatulu-fali fa.

²³ See nai emi dalek, nau namanene dede'ak ia, ma ana taoafik neun, soaneu fai manamaik-ka?

²⁴ See kande nadenu, fo kalo Israel? Ade, ta nde Manetualain fa hetu? Ita tasala-tasingo neu Ndia, ita ta taso'da tunga paletan-na fa, ma ta tunga nanolin-na fa.

²⁵ Boema Ana taon-na ita, tame'da tita nasa-melu matuainan-na, ma doi-doso, nanahu natee-natati matuaina. Nasan-na, namahana nai Israel, sama leo ha'i-a, tehu ita ta tame'da fan, ma ita ta tanoli neme hata fo, ita la'ola'di fan.