YESAYA 40 - Susula Malalaok Hehelu Palak Ma Hehelu Beuk

Dede'a-kokola namahenak

¹ O Manetualaim-ma, nafa'da nae leo ia, “Kokoe-nanasi, kokoe-nanasi, au leoinang-nga leona!

² Matetesa-matatama, hataholi Yerusalem-mala dalen-nala, mafa'das leon, mae ala ta da'di ata so'on. Sila salan-nala hapu do'o do ampon so. Au huku basa sila sala-singon, didikuk la'i dua so.”

³ Hapu halak fo, naloo bou-bou nae, “Sadia enok nai moo solokaek-kala, ba'eneu Manetualain. Taom-matetu okofoo manai moo maloa, ba'eneu ita Manetualain-na!

⁴ Muse po'a ketu basa bafak-kala, tao natetu letek ma pupukuk-kala. Dae mapupukuk-ka, neukose ana da'di matetuk, ma manapeko-pakik-ka, neukose ana da'di ndoos.

⁵ Boema Manetualain matua-mademan, neukose nananatu'duk; basa hataholi daebafak lala'en-na, neukose lita matan. Tete'ek-ka, Manetualain mesak-kana, helu basan so!”

⁶ Hapu halak nafa'da nae, “Tui-benga leona!” Au atane ae, “Au muse tui-benga beek?” “Tui-benga leona, mae hataholi daebafak-ka, sama leo na'u-a, sama leo bunga, fo lole-napun ka'da hatematak esa mesak-kana.

⁷ Na'u-a namatuu, ma bunga ana male, metema Manetualain fuu ani mato'bik-ka neun. Tete'ek-ka, leoina ndia, sama leo na'u-a.

⁸ Na'u-a namatuu, ma bunga ana male, tehu ita Manetualain dede'a-kokolan nakatatakak losa dodoon-na.”

⁹ Kae leo lete madema lain meu, fo po'a-benga hala malole-a neu Yerusalem! Maloo bou-bou mapane'e, fo po'a-benga hala malole-a neu Sion! Mafa'da kota-kota manai Yehuda-la, mae sila Manetualain-na, neukose Ana mai!

¹⁰ Mitak, Manetualain Ana mai no koasa soaneu Ana tao no makadelek. Hataholi fo, Ana soi-po'i basak-kala tunga loon.

¹¹ Sama leo manafoo esa, Ana nakaboboi bana-manun; Ndia mesak-kana, nde tao nakabubuas-sala. Ana ko'o bi'ilopo ana-la, Ana nakalala'ok inan-nala, no dale mangana'uk.

Ta hapu hata esa boen, sama leo Israel Manetualain-na fa

¹² See kande, ana diku liman-na fo ana uku tasi oe-a, do ana uku lalai-a, nenik ana tenga nenik lima ku'un-na? See kande, ana uku dae manai daebafak-ka, nenik tatais do ana tai letek ma pupukuk-kala, nenik tatais?

¹³ See kande, nauli-nalanga Manetualain, do nanolin, da'di leo manamanolin-mafa'dan-na?

¹⁴ Manetualain natane neu see fo ela Ana hapu malelak? See kande fen natutu'duk, fo Ana tao no malelak?

¹⁵ Ba'eneu Manetualain soona, leoinak-kala, sama leo oe titik esa nai haik dale, sama leo afu faa anak nai tatais lain; nusak-kala, da'uanak sama no afu sopuk-ka.

¹⁶ Basa bana manai Libanon nulan dale, ta dai soaneu taos da'di tutunu-hohotu nanatunuk fa; ain-nala lumanak nanseli soaneu taos da'di ai ha'i

¹⁷ Basa leoinak-kala, sosoa-ndandaan ta, ba'eneun, nono'kabai, hata ta nai matan-na fa.

¹⁸ Da'di, o sanga makasasamak Manetualain no see? See kande, o mafa'da mae, mata-aon sama no Manetualain?

¹⁹ Ndia ta sama leo, tuka-la tao dodoki-dudulak-ka fa, dodoki-dudulak fo, nananakadidita lilopilas, ma buin-na lilofulak.

²⁰ Hataholi fo, ta nabe'i asa lilopilas do lilofulak fa, hele ai fo, ta naalutun lai-lai fa. Ana sanga tuka malela ina fo ana tao dodoki-dudulak fo, ta nalengo fa.

²¹ Masa bole, o ta bubuluk, ma ta mamanene, ma o ta hapu halak neme makahulun-na mai fa? Masa bole, o ta bubuluk neme makasososan mai, daebafak-ka dada'din makasososan-na leo beek fa?

²² Fo mana makadada'dik-kana, nangatuuk nai daebafa bobongok lain, mete laun-na soona, anak-ka sama leo lamak-ka Ana nakapepela lalai-a, sama leo temak-ka, ma Ana taon, sama leo lalaa temak-ka, fo hataholi hapu leo nai dalek.

²³ Ana taon-na basa manakoasa-la, mopo be'i-balakain, ma hataholi matua-madema-la, mopo koasan-nala.

²⁴ Hataholi sila, sama leo bubu'u-palusa beuana, fo okan-na, besak-ka ana mulai mai. Metema Manetualain fuu anin-na mai soona, lamatuu, de anin-na fuu nenis, sama leo ha'deaik-ka.

²⁵ See kande, o mafa'da mae, mata-aon sama no Manetualain Fo Malalao-malalafuk-ka? O sanga makasasamak-kana no see ka?

²⁶ Manganalo leo lalai mu, fo taoafik leona! See kande, nakadada'dik nduuk-kala? Ndia nde ito-atos sama leo solda'du-la. Ana bubuluk, basa-basas dede'un-nala, ma naloo esa-esak, nenik na'den-na. Ta mopo esa boen, nanahu Manetualain koasan-na, ba'un-na seli!

²⁷ Da'di Israel, tao le'e de o hoo-nggu'um, nono'kabai, o Amam Manetualain, ta bubuluk o toto'a-tataan fa? Nono'kabai, Ana ta taoafik neu o so'dam-ma fa, ma Ana ta taoafik neu o hak-ka fa?

²⁸ Masa bole, o ta bubuluk, ma ta mamanene fa? Amak-ka nde, Manetualain fo, manaketu-basa taak-ka, fo mana makadada'dik daebafak-ka lala'en-na. Ana ta sota-mangu nita fa; hataholi daebafak, ta hapu neuk nala dudu'a-aafin fa.

²⁹ Ana fe hataholi manasota-manguk-kala be'i-balakaik, Ana fe manggatek neu, manandole-ndakuk-kala.

³⁰ Hataholi muli-soluk-kala sota-mangu ni'iana manasolumaik-kala lakatunu, de ala tu'u leu.

³¹ Tehu hataholi fo, namahena neu Manetualain-na, neukose ana hapu be'i-balakai beuk. Sila sama leo manupui kaka'ka fo ana laa dema-na seli, nenik li'da mabe'i-balakain-na. Ala lalaik, te ala ta sota-mangu fa, ala la'o, te ala ta sota-mangu fa.