YESAYA 4 - Susula Malalaok Hehelu Palak Ma Hehelu Beuk

¹ Nai lelek ndia, neukose inak hitu, ala ho'u touk esa, fo lafa'da lae, “Fe ami loak, fo ami manaku mae ami saotoum o, fo ela ami boso lu'a-lepa mamaek, nanahu ami beita ka'bing fa. Ami tunga-sanga aom, ami nana'a-nininum, ma ami papake-ngganggaom.”

Neukose Yerusalem nanatao nasafalik

² Neukose losa fain-na te, Manetualain tao basa bubu'u-palusa, ma ai-la moli fo lamatua, fo nusak ia mana'ahiik. Nai faik ndia, neukose hataholi Israel fo maso'dak-kala, neukose lamahoko-setelee ma dalen-nala lamatua, nanahu dae-oen buna-boan-nala.

³ Bei ela hataholi manai Yerusalem-mala, hataholi fo Manetualain heles soaneu nanasoi-tefak-kala, neukose lokes lae, malalao-malalafuk.

⁴ No Manetualain koasan-na, neukose naketu-nala'di ma Ana tao nalalao anan-nala. Neukose Ana tao nalalao Yerusalem neme hataholi nanataonisak manai kota ndia, daan-na.

⁵ Boema nai pupuku Sion-na, ma basa hataholi fo lakabubua nai ndia, Manetualain nakadada'dik ko'as-sa nai fai lele'don-na, boema ha'imasuk ma ha'ipila mangale'dok-ka, nai fai le'odaen-na. Manetualain no koasan-na mesak-kana, neukose Ana da'di leleo fo nasulu-nahapa kota ndia lala'en-na.

⁶ Neukose nasulu-nahapan neme le'do mahaak-ka, nai fai lele'don-na, ma Ana taon da'di mamana susuluk neme u'daina ma ani-sangu mai.