YESAYA 35 - Susula Malalaok Hehelu Palak Ma Hehelu Beuk

Enok manaleo so'da-molek-ka neu

¹ Moo solokaek-ka, ma dae tuuk-ka, neukose lamahoko-setelee, bunga-la lakapela lai moo maloa.

² Moo solokaek-ka, nakapela de bunan-na lakaseti, ma nakamee lelengoaon nenik nakamee namahoko-seteleek. Lole-napun, sama leo letek Libanon-na, be'i-balakain sama leo Bafak Karmel ma Saron. Boema basa hataholi-la neukose lita Manetualain koasan-na, ma ita Manetualain-na, matua-mademan.

³ Matetea-mahehele lima tapandoes-sa, Taom-matea lungulanga manadelek-ka.

⁴ Mafa'da hataholi fo, dale ba'ihanak-ka mae, “Matetea-mahehele o dalem-ma, ma boso bii, te O Manetualaim-ma mai soaneu huku musu-la, Ana mai soi-tefa-nala emi.”

⁵ Nai lelek ndia, hataholi pokek-ka, neukose nita, ma hataholi pakek-ka, neukose namanene.

⁶ Hataholi lu'uk-ka, neukose nakaboboku sama leo nusa, hataholi hala tak-ka, eeki-natadale no namahoko-seteleek. Nana oemata, ana faa nai moo solokaek-ka, lee faa nai moo maloa,

⁷ Solokae mato'bik-ka, neukose ana da'di lifu, dae tuuk-ka, ana da'di oemata. Mamanak fo makahulun-na, busa fuik-ka leok-ka, neukose fii ma henak-ka, moli lan.

⁸ Neukose, hapu okofoo nai naa, na'de, “enok manaleo so'da-molek-ka neu.” Neukose hataholi masala-masingok-ka, ta tunga enok ndia fa, hataholi nggoak-ka, neukose ana ta taon-na hataholi manatunga enok ndia, sala enok ndia fa.

⁹ Neukose ta hapu singa nai mamanak ndia fa, do bana makaa fe'ek fa. Hataholi fo, Manetualain soi-tefak-kala, neukose ana la'ok nai naa.

¹⁰ Hataholi fo, Manetualain soi-po'ik-kala, neukose ala fali; ala masok kota Yerusalem-ma, nenik eeki-natadalek, mata-panan-nala lapena, nanahu namahoko-setelee manaketu-basa taak-ka. Neukose lamahoko-setelee, ma hika-latadale; toto'a-tataak ma hoo-nggu'uk, mopok-kana so.