YESAYA 34 - Susula Malalaok Hehelu Palak Ma Hehelu Beuk

Neukose Manetualain huku musun-nala

¹ Hai leoinak-kala lemin, mai fo takabubua, ma mamanene leon-na. Nemen-na fo, basa daebafak-ka lala'en-na, ma basa hata maso'dak nai dalek-ka, ala mai fo lamanene.

² Manetualain namanasa basa leoinak-kala, ma basa solda'dun-nala lala'en-na. Neukose Ana huku, ma Ana tao namate-namopos.

³ Neukose popolan-nala, ta nananatoi-natonok fa, tehu ka'da nanapo'ilotak, fo ela pulus fo laboo. Letek-kala neukose pilas, nanahu sila daan-na, ana faa la'es.

⁴ Le'do-a, bulak-ka, ma nduuk-kala, neukose lakalulutuk. Neukose nduuk-kala tu'da, sama leo akidook-kala tu'da bepoko leme ai lain mai.

⁵ Manetualain sadia basa tafainan-na, nai nusa so'dak-ka so, de besak ia, neukose tafaina ndia na'a leoina Edom fo, huhukun-na nananaketu basak so, de neukose nanatao namate-namopok.

⁶ Neukose Manetualain tafainan-na, nadiu daak, ma pete-pete no sila minan-na, sama leo pete-pete no bana tutunu-hohotuk-ka daan-na, ma minan-na. Nana Manetualain sadia tutunu-hohotuk nai Bozra, ma Ana taok-kanisa matuaina-la nai dae Edom-ma.

⁷ Neukose hataholi-la mate, sama leo sapi fuik-ka, ma sapi tenak-ka. Sila nusan-na, neukose pilas nanahu daak-ka, ma henuk no bana-la minan-na.

⁸ Fain-na nde ndia, fo Manetualain nasala'e Sion, ma Ana balas nape'da dalen-na neu musun-nala.

⁹ Edom leen-nala, neukose lasafali da'di ter, ma daen-na da'di belerang. Mate'en-na, nusak-ka lala'en-na, ana pila sama leo ter-ra.

¹⁰ Lele'do le'odaen, manapilak ndia, ta mate fan, ma ha'imasuk-ka masu-masu neme ha'i pilak ndia dalek mai, losa dodoon-na. Neukose dae ndia nanala'o elak, fo louk, ma ana da'di dae tuuk neme bobongik leo bobongik neu, ma neukose ta hapu hataholi esa boen, la'ok tunga ndia fa.

¹¹ Neukose manupui nggonggolo suluk-ka ma bana bulu tii nggouk-ka, ala leon, ma ko'donaok-ka ma manupui kaa, neukose ala leo lai naa. Manetualain tao dae ndia da'di nanasese'do-babalik ma louk, sama leo beita nakadada'dik-kana fa.

¹² Ta hapu manek paleta nusak ndia fa, ma basa mauli-malangan-nala, mopok-kasa so.

¹³ Uma sosongon-nala ma kota-kotan fo lanuu kota musu, neukose makatema dila nggauk, ma na'u-la, moli lai dalek, ma busa fuik, manupui onta-la, ala leo lai dalek.

¹⁴ Neukose bana makaak-kala henu dalek; ko'donaok-kala esa koko'do esa, ma ko'donao le'odaek-ka lai dalek ana sanga mamana hahaeaok.

¹⁵ Neukose menge malasok-ka natolo fo ana lu'u, ma nakaboboi anan-nala nai mamanak ndia. Manupui balupua boeo, esa-esak nok ndia pasan, de lakabubua lai ndia.

¹⁶ Sangan fo lees-sana, nai Manetualain Susula Malalaon dalen-nae, Ta hapu bana sila-la esa boen, neukose mopon do pasan ta. Nana Manetualain paletan-na leondiak, de Ndia nde tao nakabubuas-sala.

¹⁷ Manetualain nde ba'e nusak ndia neu sila, de esa-esak sipo-na baba'en-na. Neukose ala leo lai ndia, losa dodoon-na, ma dae ndia da'di sila pusakan neme bobongik leo bobongik neu.