YESAYA 33 - Susula Malalaok Hehelu Palak Ma Hehelu Beuk

Hule-haladoi fo moke tutulu-fafalik

¹ Soe ba'eneu ita musun-nala! Ala lamanako, leomae nako ta namanako sila fa, ma lalelesi, leomae hataholi ta nalelesi sila fa. Tehu lamanako ma lalelesi basa soona, neukose nakodaa namanakos, ma malelesik-ka, nalelesis.

² Ou Manetualain, sue-lai ami. O nde, ami mamahenak-ka. Masulu-mahapa ami, neme faik leo faik neu, ma soi-tefa-mala ami, nai lelek, ami nai makase'ek-ka dalek.

³ Metema O fo'a, fo O kalua O hala manggunggulum-ma soona, neukose leoinak-kala lalai, fo ala tapasasala.

⁴ Hataholi manasapuk, ma manamamanako sila hata-heton-nala, sama leo lama bubuak-ka.

⁵ Manetualain mademainan-nanseli; Ana koasa basa hata lala'en-na. Neukose, napadedeik natetu hoholo-lalanek, ma ndoos ma matetuk-ka, nai Yerusalem,

⁶ ma Ana fe anan-nala, latapo'i leme soe-a mai. Hata fo, manasoi-tefa-nala sila nde been-na, nde manatee-tenok-ka, ma malelak-ka, boema fe ha'da-holomata neu Manetualain.

⁷ Hataholi palani tatibatu-la, ala nggasi loke tutulu-fafalik; basa hataholi nadedenuk fo, manasanga enok mole-dame-a, ala kii no dale he'dik.

⁸ Okofoo-la, nanananea tak, nalosa nee-nee lino-lino; ta hapu hataholi, la'ok tunga lain fa. Hehelu-balataak, nananalelesik, ma sakasii-la, nanatipa henik. Ta hapu manataoafik fa.

⁹ Nusak-ka nanala'o elak, de ana da'di nusa nee-nee lino-linok. Libanon nulan-nala male-tale, ma bafak Saron fo, maoe-maisik-ka, ana da'di sama leo moo solokaek-ka. Akidook-kala, kono bepoko, nai Basan ma lete Karmel-la.

Manetualain fe musun-nala nasanene'dak

¹⁰ Manetualain nafa'da leoina ndia nae, “Besak ia, neukose Au fo'a, fo Au atu'du Au koasang-nga.

¹¹ Emi dale tutu'um-ma, manada'di tak, ma basa hata lala'en fo emi taon, sosoa-ndandaan ta. Emi nasa-melum, sama leo ha'i fo, ana tao namate-namopo seluk emi aoinam-ma.

¹² Emi sama leo batupiak fo nanahotuk, soaneu taon da'di ha'o; sama leo makatema dila-nggauk fo nanatati henik, ma nanahotu henik nai ha'i dale.

¹³ Nemen-na fo, hataholi manadekak-kala, do manai dook-kala, lamanene la'eneu Au tatao-nono'ing, fo ala manaku Au koasang-nga.”

¹⁴ Hataholi masala-masingok manai Sion-na, ala dele bengge'be no bibii-namatauk-ka. Lafa'da lae, “Manetualain nakeketun-na, sama leo ha'i pilak-ka, losa dodoon-na. Ade fafa'kama, hapu hataholi nakatatakak nai ha'i fo, manatao namate-namopok ndia dalek do ta?”

¹⁵ Emi hapu makatatakak, metema emi kokolak, ma tao-no'i hata fo ndoos-sa. Boso sanga nanalak nenik lulumu-eese hataholi nuu taa-hata taak-ka, ma boso sipo doi sosolo dalek. Boso tunga mo hataholi fo, ana tutu'u kanisak, do tatao-nono'i mangalauk fe'ek.

¹⁶ Soona neukose, emi nananasulu-nahapak, ma matapo'i neme soe-a mai, nono'kabai, nai kota musu matea-mahelek dale. Neukose, nana'ak ma nininuk, nanasadiak ba'eneu emi.

Maso'da manamaik fo, nanuu ua-nale malole

¹⁷ Neukose fain-na losa, emi mita manek fo, ana paleta nusan fo, natabaa leo basa mamanak lala'en-na, no namahokok.

¹⁸ Emi bibii-namata'u maneuk-kala, neu manasusu bea, manaho'u paleta, ma manamanea nusa dea-la, ela ka'da na'den-nala so.

¹⁹ Neukose, emi ta mita seluk hataholi nusa dea malela ha'da tak, fo ala kokolak nai dede'ak fo, emi ta malelak-kana fa.

²⁰ Makanae kota Sion, mamanak fo ita tao feta agama. Makanae Yerusalem leona! Mamanak ndia nee-nee lino-linok nanseli, soaneu leo nai ndia, sama leo lalaa temak fo, beita nanalali heok nita fa, ai papakun-na beita nanafe'ak henik nita fa, ma talin-na, beita ketu nita fan.

²¹ Neukose, Manetualain natu'du matua-mademan neu ita. Neukose, ita taso'da nai lee maloa su'un-na fo, ofa musu-a ta tunga ndia fa.

^22-23 Nana Manetualain nde been-na, ita Manakee-manafulan, Manetualain nde been-na, manafe ita hoholo-lalanek-ka; Manetualain nde been-na, ita Manen, Neukose Ana soi-tefa-na ita. Emi talim-mala, lakama'a so, de ta hapu pa'a nahele dii laa, nai mamanan-na fa, boema, ta hapu lofa laa neu fa. Nai lelek ndia, neukose hataholi baba'e bua-lo'a nanaloso-nak makadotok, ma hataholi lu'ueik-kala, neukose ala kalo bua-lo'a kakalok.

²⁴ Nai ita nusan-na, ta hapu hataholi esa boen neukose nahoo, hu kande namahe'di, ma basa sala-singok-kala, neukose hapu do'o do ampon.