YESAYA 31 - Susula Malalaok Hehelu Palak Ma Hehelu Beuk

Neukose Manetualain nasulu-nahapa Yerusalem

¹ Soe ba'eneu hataholi fo, neu noke tutulu-fafalik neme Masir mai. Dalen-nala lamatua neu Masir solda'dun-nala be'i-balakain, no solda'du manasa'e ndalan-nala, ma ndalan-nala balakaik mesa-mesan, boema kaleta makadoton-nala. Tehu ala ta lamahele Amak, fo Israel Manetualain malalao-malalafun-na fa, de ta loke tutulu-fafalin fa.

² Manetualain manatee-tenok, ma Ana bubuluk hata fo, Ana taon. Ana fe soe-a ana mai, ma Ana tao natetu nasanene'da mahelen-na, soaneu Ana huku hataholi mangalauk, ma hataholi manatulu-falis-sala.

³ Hataholi Masir-rala, ka'da hataholi daebafak mesan, te Manetualain ta nde sila fa. Sila ndalan-nala nde been-na, mahahaek biasa, fo tapandoes, te ta dula dalek fo nanuu koasa fa. Metema, Manetualain tao hata esa soona, leoina manatulu-fali ndia, neukose nakatunu, ma ana tulu-fali leoina ndia, ana tu'da. Soona neukose duas mate-mopo.

⁴ Manetualain nafa'da au nae, “Sama leo singa namanasa, soaneu nanea nana'an-na, ma ta hapu nakabibiik-kana nenik manafoo bubuak esa eekin ma nakadiin, fo ala mai la'ban-nana, leondiak boe Au, neukose Au atee-atati, fo Au anea Pupukuk Sion-na.

⁵ Sama leo manupui-a, nakapepela li'dan-na, nai ndunun lain, soaneu nasulu-nahapa anan-nala, leondiak boe Au, Manetualain Fo Manakoasa, neukose asulu-ahapa, ma asala'e, ma soi-tefa Yerusalem.”

⁶ Manetualain nafa'da nae, “Hai leoina Israel-la lemin, emi la'ban basa Au, mamasala-masingo neu Au so. Tehu besak ia, fali ma'im-ma, leo Au mai leona!

⁷ Neukose fain-na losa, soaneu emi tu'u-tapaheni, dodoki-dudula sosongo-tatangok fo nanataok neme lilofulak ma lilopilas, fo emi tao aom, fo henuk no sala-singok-ka.

⁸ Neukose Asyur nanatao namate-namopok nai natee-natatik dale, tehu ta nenik hataholi daebafak-ka be'i-balakain fa. Neukose hataholi Asyur-rala, lalai leme natee-natatik dale mai, ma sila hataholi muli-solun-nala, neukose nanataok da'di ata.

⁹ Sila manen-na, neukose nalai no bibii-namata'uk, ma basa malanga solda'du matuainan-nala, ala nggenge lanseli, nalosa ala la'oela dedeo musu-la.” Manetualain kokolak basa so, Manetualain fo nanasene-do'ok, ma nanafe ha'da-holomata nenik tutunu-hohotu nanatunuk nai Yerusalem.