YESAYA 30 - Susula Malalaok Hehelu Palak Ma Hehelu Beuk

Hehelu-balataak no Masir-ra sosoa-ndandaan ta

¹ Manetualain nafa'da nae, “Soe ba'eneu mauli-malangan Yehuda-la, nanahu ala la'ban Au. Ala tunga dale tutu'uk fo, ta neme Au dale tutu'ung-nga mai fa. Ala lima-lee, hehelu-balataak fo, nasei-kosalak no Au dale hihiing-nga. Hu ndia de, sala-singon-nala ladodou.

² Ala leu leo Masir leu, tehu ta loke nakeketuk neme Au mai fa. Ala lasulu-lahapa leu Masir, ma lamahena mane Masir-ra, tutulu-fafalin.

³ Tehu neukose, manek ndia taon-na dalen-nala ba'ihana, ma ala lamahena hapu nasulu-nahapak neme Masir mai, ta da'di fa.

⁴ Leomae Yehuda hataholi nadedenun-nala, ala losa kota Zoan, ma kota Hanes fo nai Masir so,

⁵ neukose basa hataholi-lala'en-na, ala mae, nanahu lamatutua dalen-nala neu leoina fo, sosoa-ndandaan ta, ba'eneu sila. Fo ala hapuk-ka, ta nde nanalak do tutulu-fafalik fa, tehu ka'da nakamumulu-nakamamaek-ka.”

⁶ Manetualain hala hehelun-na leo iak, la'eneu basa bana fo manaleo dae kona, “Basa hataholi nadedenuk-kala fua sila keledein ma ontan-nala nenik bua palsen, boema ala la'ok tunga mamanak fo henuk no soe, ma singa, menge malasok, ma buta mali'dak-ka mamana leleon-na. Ala tunu-hotu bua palsen sila-la, neu leoina esa, fo ana ta hapu tulu-fali sila fa.

⁷ Masir tutulu-fafalin, palsuma la'iesak-kana. Hu ndia de Au foi Masir na'de, ‘Buta fo ta neni soe fa’.”

Leoina fo ta tunga Manetualain fa

⁸ Manetualain nadenu au sulak, anan-nala tatao-nono'i mangalaun-nala, nai susulak esa dalek, fo da'di leo nasanene'dak losa dodoon-na.

⁹ Nana, sila nde been-na, leoina esa, fo ala hii ka'da la'ban Au, ala hii ka'da lasapepeko-lasandandali, ma ala ta nau lamanene Manetualain nanolin-na fa.

¹⁰ Ala lafa'da basa nabi-la lae, “Boso mahahala! Boso mafa'da ami, hata fo ndoos-sa, te mafa'da ami, hata fo ami hii mamanenen. Nemen-na fo, ami dodoo dede'a me'i-afek mahele.

¹¹ Heok leona, fo tunga eno fe'ek. Boso mapangge ami mo Israel Manetualain malalao-malalafun-na.”

¹² Hu ndia de, Israel Manetualain malalao-malafun-na, nafa'da nae leo ia, “Emi ta sipok Au dede'a-kokolang fa, de emi masalai emi deam-ma neu tuni-ndenik-ka, ma tipu-daik-ka.

¹³ Hu ndia de, emi masala. Emi sama leo papala nanadama mademaina, fo natandala neme lain leo dae neu; neukose no kaiboboianak, emi bala meu.

¹⁴ Neukose emi sopu-sopu, sama leo uledae fo ba'en, de ana da'di bibia-bibiak-kala, nalosa ta hapu bibian sila-la esa boen, hapu due nenik ha'ikaak neme la'o dale mai, do ndui nenik oe neme bak dale mai fa.”

¹⁵ Manetualain Fo Mademaina, Israel Manetualain malalao-malalafun-na, nafa'da anan-nala nae, “Tukatei-saledale, ma pe'daom mahele leona, soona neukose Au soi-tefa-ala emi. Mamahele neu Au no dale mananee-nee lino-linok, soona neukose Au atetea-ahehele emi.” Tehu emi ta nau fa!

¹⁶ Nakalenak emi sanga enok fo malai meme musu-a, nenik emi sa'e ndala, fo malai no lai-laik. Malole so! Memak, mahani te, emi muse malai! Emi maedaenga, emi ndalam ndia, nalain-na seli, te se'kona, manausik-kala, nalain-nala lai-laik lena nanseli.

¹⁷ Metema musu-a hataholin esa, ana fe nasanene'da mahelek soona, neukose hataholi lifun esa lalai, ma metema hataholi lima fe nasanene'da mahelek soona, neukose emi basa-basam-mala malai. Neme emi solda'dum-mala mai, ela ka'da dii dedeo esa nai pupukuk lain.

¹⁸ Leomae leondiak boe, Manetualain nahani talu-talu no fain-na, soaneu natu'du susue-lalain neu emi. Ana naheheleaon, soaneu sue-lai emi. Nana, Manetualain nde been-na, Manetualain fo manatao hata fo, nandaa. Maua-manalek ba'eneu hataholi fo, namahena neun.

Neukose Manetualain ba'e-pala anan-nala

¹⁹ Hai emi fo, manaleo manai Yerusalem-mala lemin, neukose emi ta kii makandoo fa. Manetualain madale susue-lalaik, de no lai-laik nataa emi, metema emi maloo bou-bou moke tutulu-fafalik neun.

²⁰ Manetualain fe emi fai soso'ba-susu'dik mabela, soaneu nanoli emi. Tehu besak ia, Ndia mesak-kana sama-sama no emi, nalosa emi mame'da mita mamain-na.

²¹ Metema, emi singo heni enok-ka soona, neukose emi mamanene halan-na, neme emi deam-ma mai, nae, “Enok-ka nde ia; tunga enok ia leona.”

²² Emi dodoki-dudula sosongo-tatangom fo, nananakadiditak nenik lilofulak ma lilopilas-sa, neukose emi tapahenis, sama leo manggenggeok-ka, boema emi mafa'da mae, “La'oela au leona!”

²³ Metema, emi sele-nggali bini-ngges soona, neukose Manetualain fe u'dan, fo ela bini-ngges sila-la, ala moli, fo ala fe buna-boak fo, ana sasi kao-kao. Neukose Ana sadia fe emi bana-manum, moo mana'uk maloaina.

²⁴ Sapi mane ma keledei fo manafoi-fala emi tinam-ma, neukose la'a nana'a bana neulauk, fo nanasadia hehelik soaneus

²⁵ Nai faik fo, emi musum-ma kota musun-nala nananakahapik, ma hataholin-nala nanatao nisak-ka, lee anak-kala, neukose ala faa leme basa letek-kala ma pupukuk-kala mai.

²⁶ Neukose bulak-ka mangale'don-na, sama leo le'do-a mangale'don-na, ma le'do-a namaneu la'i hitu neme biasan-na mai, ma le'do mangale'don-na, sama leo mangale'dok faik hitu dalen-na. Basa sila-la, neukose ala da'di nai lelek Manetualain popoti-papalu, ma nakahahaik anan-nala bisun fo, lakahinak-kala so.

Neukose Manetualain huku Asyur

²⁷ Manetualain koasan-na, ma matua-mademan, neukose nananitak neme dook-ka mai. Ha'i-a, ma ha'imasuk-ka, natu'du nasa-melun. Ana kokolak nos, de hala-kokolan nana'a sama leo ha'i-a.

²⁸ Ana nadenu anin-na mai nakahuluk-kana, sama leo faa losa botoliik, de neni basa hata lala'en-na. Ana tao namate-namopo leoinak-kala, ma Ana taon-na hataholi mangalauk-ka, dale tutu'un-na ta da'di fa.

²⁹ Tehu emi, fo Manetualain anan-nala, neukose mamahoko-setelee ma makamee, sama leo feta agama, nai fai le'odaen-na. Neukose emi mamahoko, sama leo hataholi fo ana la'ok, de manafuu kinuk-kala, tunga dea, fo leu leo Manetualain Uman, fo manamasala'e Israel-la.

³⁰ Neukose Manetualain fe hataholi namanene hala matua-mademan, ma basa hataholi-la, neukose lame'da lita koasa matuainan-na. Neukose nasa-melun neni ha'i mana'a naputuk-ka, u'da matuaina, u'da batu, ma ani-sangu.

³¹ Hataholi Asyur-rala, neukose lakalupu, metema lamanene Manetualain halan-na, ma lame'da lita, huhuku mabelainan-na.

³² Lelek ala bei lame'da lita fefepan-nala, te Manetualain anan-nala lamahoko-setelee lenik sasanu gendang ma kecapi Neukose Manetualain mesak-kana, nde natee-natati la'ban hataholi Asyur-rala.

³³ Ana sadia basa mamanak soaneu hotu mane Asyur-ra, neme makahulun eli mai so. Mamanak ndia, madema ma maloa, ma henuk no ai ha'i. Neukose Manetualain tao napila ha'i-a, nenik Ana fuu ani hahaen-na neu, sama leo lee belerang-nga.