YESAYA 3 - Susula Malalaok Hehelu Palak Ma Hehelu Beuk

Tasi'bu-a nai Yerusalem

¹ Te'e-te'e Manetualain Fo Manakoasa, neukose Ana ho'i-na basa nana'a-nininuk nanasadiak manai Yerusalem ma Yehuda lala'en-na. Boeo sila lamahena neu basa hataholi-la fo nde:

² basa palani ta'ti batu-la, solda'du-la, manakee-manafula, nabi, manasiula-tongonok, ma manamanoli-mafa'dak,

³ malanga solda'du manai lain-na, hataholi nananita-nalelak ma hataholi fo nalelak nusaina ketukee-makabi'an, manasuangi, ma manamete ua-nalek.

⁴ Neukose Manetualain so'u hataholi muli-soluk-kala da'di laun-na mauli-malangan, de neukose ala paleta tunga ka'da sila dale hihiin-na.

⁵ Neukose hataholi-la, esa tuni-ndeni esa. Hataholi muli-soluk-kala ta nau lamanene lasik-kala, ma ni'iana-la ta nau lamanene hataholi matua-la fa.

⁶ Nai lelek ndia, hataholi-a neukose natu'du tolanoo ka'a-fa'din esa, fo nafa'dan nae, “Ka'da o mesam-ma nde manuu papake-ngganggaok fo nandaa; hu ndia de, nai tepo-lelek fo henuk no toto'a-tataak ia, o da'di ami mauli-malangam.”

⁷ Tehu neukose nataa nae, “Hataholi malelak ta au fa! Au nana'a-nininung ma au bua papakeng boeo ta. De boso madenu au da'di leoina mauli-malangan!”

⁸ Te'e-te'e, Yerusalem tu'da so! Yehuda nakalulutuk so! Nana sila dede'a-kokolan, ma tatao-nono'in lala'en-na la'ban Manetualain ma ala ta sipok koasan-na fa.

⁹ Sila heo-hilun fo manakoao-ndaeaon-na, natu'du sila tatao-nono'i mangalaun-na. Sila tao sala-singok no le'do-le'dok, sama leo makahulun-na hataholi Sodom-mala. Soe ba'eneu sila! Sila leni soe fe sila aoinan-nala.

¹⁰ Manetualain nafa'da nae, “Mafa'da hataholi manatunga Au-a, mae neukose sila laua-lanale ma laso'da. Neukose sila hapu la'a-pake lita, sila sosota-mamangun buna-boan.

¹¹ Tehu soe ba'eneu hataholi mangalauk-ka! Neukose hataholi tao sila sama leo sila tao hataholi fe'ek-kala so.

¹² Neukose hataholi fo lakabubunak doin-nala, ala tuni-ndeni Au anang-ngala, ma hataholi manada'di kelumatuk-kala, lakatutu'dak-kasa. Neukose Au anang-ngala mauli-malangan, ala tao-la Au anang-ngala latofa-latalak, nalosa ala ta bubuluk, ala muse la'ok tunga enok beek-ka so'on.”

Manetualain naketu-nala'di anan-nala

¹³ Manetualain naheheleaon basa, soaneu Ana kalaak ma naketu-nala'di anan-nala.

¹⁴ Manetualain ho'i nakeketuk da'di leo manakee-manafula soaneu basa manamauli-malanga anan-nala. Manetualain kalaan soaneu sila nde ia: “Emi nde mamanako osi angol-la buna-boan-nala; emi umam-ma henuk no bua-lo'as fo emi kalo menis neme hataholi nuu-taa hata-taak-kala mai.

¹⁵ Tao le'e de, emi tuni-ndeni Au anang-ngala, ma emi lumu-ese hataholi nuu-taa hata-taak-ka? Au, Manetualain Fo Mademaina, ma Manakoasa, nde manakokolak-ka.”

Nasanene'dak neu ina-inak Yerusalem-mala

¹⁶ Manetualain nafa'da nae, “Ina-inak Yerusalem-mala, koao-ndaeao lanseli! Ala hii lalelengoao, ala hii lakahehe'de mata, ma ala la'ok lalelengo ao, ala nggani ein-nala no koao-ndaeaok, fo ela suek manai ein-nala lalii bedolo.

¹⁷ Tehu neukose Au hukus; neukose langan-nala henuk no kosulouk, ma langan-nala nananggeu dilak.”

¹⁸ Neukose losa fain-na te, Manetualain ho'i-na basa ina-inak Yerusalem-mala bua-lo'a lilopila-lilofulan fo ala koao-ndaeao lenik-kasa sila, fo nde: papa'a langak, suek manai ein-nala, lilo-henun,

¹⁹ suek manai liman-nala, tema lalaa langan-nala,

²⁰ tu'dun-nala, mo'do-akidook manai alun-nala, ma manai tala'dan-nala,

²¹ ndelin-nala, ma lolo'ek manai panan-nala,

²² bua-lo'a feta-dote mana'ahiin-nala, ba'du u'dan-nala, tas doin-nala,

²³ ba'du tema ni'ianan-nala, bua papake abalutun-nala, fefeo botoliin-nala ma tema manalu popoti langan-nala.

²⁴ Besak ia, ala pake kaboomenik, tehu mahani te, neukose laboopulu. Neukose ala nggati kalikee abalutun-na, nenik tali. Neukose langadoo mana'ahiin-nala, nananggute dilak. Sila bua papake mana'ahiin-nala, neukose nananggatik nenik bua papake si'da-saik. Besak ia, sila mata makeek; tehu mahani te, nalutu mata-panan nanahu ala de'dek mata-panan-nala.

²⁵ Touk mabe'i-balakaik-kala boeo, neukose mates lai natee-natatik dale.

²⁶ Neukose hataholi-la manato'a-taak, ala kii-makaleleu nai kota lelesuinan-nala, ma neukose kota ndia mesak-kana sama leo ina nanao'du nakaholak-ka de nangatuuk nai dae lain.