YESAYA 29 - Susula Malalaok Hehelu Palak Ma Hehelu Beuk

Yerusalem ua-nalen

¹ Soe ba'eneu Yerusalem, fo loken lae Manetualain mei tunu-hotun! Soe ba'eneu Dauk mamana ofun-na! Nemen-na, fo teuk-kala langganggatiaok no fai malolen-nala.

² Tehu neukose, Manetualain fe soe-a mai, neu kota ndia, nalosa hataholi-a nakadii-nakau ma nahoo. Basa kota lala'en-na, nalupa leo mei tunu-hotuk fo, nadiu daak.

³ Neukose Manetualain, sapu-na kota ndia, ma nakahapi nan neme bu'uk lala'en-na mai.

⁴ Yerusalem sama leo ko'donaok-ka, fo ana sanga enok soaneu ana koko'do neme dae dale mai, halak fo noi-noi neme afu dale mai.

⁵ Tehu basa hataholi nusa dea fo, ha'da hataholi tak sila-la, neukose mopos, sama leo anin-na fuu neni afu, do ha'deuk-ka. No kaiboik ma ta bubuluk fa.

⁶ Manetualain Fo Manakoasa, neukose soi-po'i kota ndia nenik ani matuaina ma daebafak-ka nanggengo matuainan-nanseli. Neukose Ana fe sangu, ma ha'i-a mai, fo na'a-henin.

⁷ Boema basa solda'du nusa dea, fo manasapu-la Yerusalem, kota fo Manetualain mei tunu-hotun-na, basa mana-makahapik-kala, ma mana-sapu-la kota ndia, fo tao lakalulutuk-kana, neukose mopos sama leo me'i-afek-ka, nai fai le'odaen-na.

⁸ Leoina fo, lakabubua soaneu sapu-la Yerusalem-ma, neukose sama leo hataholi kamala'ak fo, ana nalame'i na'a, boema ana fo'a no tei louk, do sama leo hataholi manamaa ma'dak-ka, fo nalame'i ninu, boema ana fo'a no botolii koko'don-na tuuk.

Nabi-a, nanoli-nafa'dan-nala, ta nanataoafik fa

⁹ Dodoo doak ma nggenge makandoo leona, ma masusungu mata, sama leo hataholi pokek-ka! Da'di manamafuk leona, tehu, ta hu kande minu angol fa. La'ok maleu-lilok leona, tehu, ta hu kande minu ala fa.

¹⁰ Manetualain taon-na emi matam-ma nduak, fo sungu mamanee. Ana poti ketu basa nabi-la matan-nala, ma Ana babaa ketu basa mananitak-kala mata-panan.

¹¹ Ninitak-kala esa-esak sosoa-ndandaan, neukose nananafunik ba'eneu emi, sama leo susulak fo nanatatana nisak. Metema neni susulak ndia, leo hataholi manalees malelak esa neu, fo ela ana lees fe o soona, neukose nafa'da, nae ndia ta bisa fa, nanahu susulak ndia, nanatatana nisak.

¹² Metema, nenin leo hataholi manalees malela tak-ka neu soona, neukose nataa, nae ndia ta lees nalelak fa.

¹³ Manetualain nafa'da nae, “Hataholi sila-la, sene-do'ok neu Au, ka'da nenik hala-kokolak, tehu dalen-nala dook-ka neme Au mai. Sila agaman-na, ka'da nakanenetek hataholi daebafak, fo nanalees ta pake mete susulak fa.

¹⁴ Hu ndia de, neukose Au tao anggengek-kasa, nenik fefepak fo hahaek ta. Hataholi fo manatee-tenok-ka, neukose ana da'di nggoak, ma basa sila malelan-nala, neukose sosoa-ndandaan ta.”

Namahehenak ba'eneu maso'dak manamaik-ka

¹⁵ Soe ba'eneu hataholi fo, ana sanga enok, nafuni dale tutu'un-na neme Manetualain mai! Ala tao no denge-dengek, ma laedaenga hataholi esa boen, ta nita do bubuluk hata fo, sila taon fa

¹⁶ Ala puta-balek basa hata lala'en-na. Beek kande paluu nanseli, manatao ulek-ka, do dae ulek-ka? Bole da'di, nanataok-ka nafa'da neu manataon-nana nae, “Ade, o ta nde tao au fa hetu”? Do, buas ndia, hapu nafa'da neun nae, “O ta bisa hata esa boen do”?

¹⁷ Hapu dede'a bini nae leo ia, “Ta dook-ka so'on te, lasi-a ana da'di dae bubu'u-palusa, ma dae bubu'u-palusa, nasafali da'di lasi.”

¹⁸ Nai lelek ndia, neukose hataholi pakek-ka hapu namanene susulak nanalees esa, isi-liin, ma hataholi pokek fo, naka'sa so'dan-na nai makahatuk dale-a, neukose ana hapu nita.

¹⁹ Hataholi nuu taa-hata taak-kala, ma matasi'da-matasaek-kala, neukose ala hapu falik tetu-temak fo, Israel Manetualain malalao-malalafun-na, fek-ka.

²⁰ Ndia nde mate'ek neme hataholi-hataholi fo, manatuni-ndeni hataholi fe'ek, ma lakamumulu-lakamamaek Manetualain-na. Neukose Manetualain tao namate-namopo basa hataholi nasala-nasingok-kala,

²¹ hataholi fo, ana hii tao nanggenggeo hataholi fe'ek na'den-na, hataholi fo, ana sanga enok soaneu napanggengge, fo ela boso huku hataholi mangalauk-ka, ma hataholi fo, ana tui-benga tutui pepekok, fo ela hataholi manatao ndoos-sa, boso hapu ndoos ma matetuk-ka.

²² Hu ndia de, Amak fo Israel Manetualain, fo manasoi-po'i Abraham-ma, nafa'da nae, “Neme besak ia, Au leoinang neukose ta hapu nakamumulu-nakamamaek so'on, ma matan-na ta fula-fula so'on, nanahu mamaek-ka.

²³ Nana, metema emi mete Au fe emi ni'iana-la, soona neukose emi manaku, mae Au nde Israel Manetualain fo malalao-malalafun-na. Neukose emi fe ha'da-holomata neu Au, ma emi bii-mamata'u neu Au.

²⁴ Hataholi nggoak-ka, neukose nanoli fo nalelak, ma hataholi fo mumu-mumu tataas esa, neukose namahoko sipo nanolik.”