YESAYA 27 - Susula Malalaok Hehelu Palak Ma Hehelu Beuk

¹ Nai lelek ndia, neukose Manetualain pake tafaina matea ma matanen-na, fo Ana huku Lewiatan, menge fo manaule-po'de ma ana leleke ndia, ma soaneu taonisa buta tasi-a.

² Nai lelek ndia, neukose Manetualain nafa'da nae, “Makamee leon, la'eneu Au osi angol mana'ahiing-nga.

³ Au, fo Manetualain nde manamanean-na; tunga faik, Au tee-tee-totolin, Au anean lele'do le'odaen, fo ela boso hapu hataholi neu adu-dodokin.

⁴ Au ta amanasa so'on. Metema, hapu na'u do makatema dila-nggauk soona, neukose Au taoisan, ma Au hotuheni la'iesak-kasa.

⁵ Tehu metema, Au anang-ngala musun-nala sanga nasulu-nahapak neme Au mai soona, nemen-na fo, ala mole-dame lo Au, hei, ala mole-dame lo Au.”

⁶ Nai tepo-lelek manamaik-ka, leoina Israel-la, neukose sama leo ai maoka-ka, ma nakapepela boema ana taon-na daebafak-ka, henun nenik boan-nala.

Manetualain huku leoinan

⁷ Manetualain huku anan-nala, ta bela-ba'u Ana huku leoina fo, manamusu loos-sala fa. Ana ta taonisa anan-nala fa, sama leo Ana taonisa musun-na fa.

⁸ Manetualain huku anan-nala nenik Ana tapas leo nusa dea leu. Ana usihenis nenik ani mangalauk-ka, neme dulu mai.

⁹ Tehu, Israel sala-singon-nala, ka'da hapu do'o do ampon neun, mete ala loli lakalulutuk lamatua daebafak-kala, sama leo ha'o-a. Basa boomenik, ma lamatua daebafa Inak Asyera dulan-na, muse nanatao nakalulutuk boe.

¹⁰ Kota makota musu ndia, ana da'di nee-nee lino-linok so, ma nanala'o elak, sama leo moo maloa louk-ka. Bana-manu bubuak-kala, la'a na'u ma ala hahae lai ndia, boema la'aheni la'iesak ai ndanak-kala doon-nala.

¹¹ Metema ndanan-nala lamatuu, fo la'dis soona, inak-kala ala mai ko'o lenis fo ala taos da'di ai ha'i. Leoina ndia, ta nalelak hata-hata fa, de sila Manetualain fo, mana makadada'dik-kana, neukose ta sue-lai fas.

Manetualain tao nabebeu leoinan

¹² Nai lelek ndia, neukose Manetualain tao nakabubua leoinan, esa basa soona esa, neme Lee Efrat-ta, losa Masir dae toon-na. Neukose Ana ta'da fe'es, sama leo hataholi-a ta'da fe'e gandum-ma isin-na, neme loun-na mai.

¹³ Nai lelek ndia, neukose pupuuk matua nanapuuk, fo naloo falik basa hataholi Israel fo, nanatapahenik manai Asyur ma Masir-ra. Neukose ala mai leo Yerusalem mai, fo ala sene-do'ok neu Manetualain nai pupuku malalao-malalafun-na.