YESAYA 26 - Susula Malalaok Hehelu Palak Ma Hehelu Beuk

Neukose Manetualain fe anan-nala sengi

¹ Nai lelek ndia, neukose hataholi nakamee nakameek ia, nai dae Yehuda: “Ita kotan-na, balakain-na seli; Manetualain mesak-kana nafofo'a kota musun-na, Ita taso'da nai ndia.

² Soiheni lelesuina-la leona, fo ela leoina manalilinekak-kala masok, leoina fo, tao tunga ndia Manetualain-na hihii-nanaun.

³ Manetualain, O fe mole-dame, ma tetu-temak neu hataholi fo dalen-na, natea-nahele, nana namahele neu O.

⁴ Mamahele neu Manetualain tataas esa leon, nana Manetualain nasulu-nahapa ita tataas esa.

⁵ Manetualain nakadadaek hataholi manakoao-ndaeaok-ka; Ana tao nakalulutuk sila kota musun-na ma Ana taon-nan, nakatetepak no dae bafan-na.

⁶ Hataholi nuu taa-hata taak-ka, ma hataholi mana doidosok-ka, neukose ala heheta-aa'in.”

⁷ Hataholi manatao ndoos-sa, neukose ana la'ok nai eno ndoos-sa, nana O, Manetualain, oti enok ba'eneun.

⁸ Ami tunga O nakeketum-ma, ou Manetualain, ma ami mahani mahele O; O nde kokoa-kikiok, ma ami hii matongo mo o, tataas esa.

⁹ Au samaneng-nga, nahiik natongo O tataas esa, nai fai le'odaen, ma no dalek-katema tuak, au sanga O nai fai fafain-na. Mahani te, metema O maketu-mala'di daebafak-ka soona, neukose laun manai daebafak-ka, ala bubuluk hata fo ndoos-sa.

¹⁰ Leomae tao hataholi mangalauk-ka no malole boe, ana ta nau nanoli hata fo ndoos-sa boen. Neukose ana ta tao tunga ndoos ma matetuk-ka, nai nusaina fo hoholo-lalanek-ka nai ndia, ma ana ta nau manaku Manetualain koasan-na fa.

¹¹ Manetualain, O maheheleaom, fo huku O musum-ma, tehu ala ta bubuluk fa. Nemen-na fo, ala hapu mamaek nai lelek lita O susue-lalaim ba'eneu O anam-mala. Nemen-na fo mate-mopo la'iesak-kasa, hu kande hoholo-lalanek fo O sadian ba'eneus.

¹² Manetualain, neukose O taom-ma ami, tetu-temak; basa hata lala'en fo ami tao-no'in, O nde tao-no'in ba'eneu ami.

¹³ Tuan fe'ek-kala, koasa hai ami so, tehu ami manaku ka'da O mesam-ma, ou ami Manetualain!

¹⁴ Mates so, de neukose ala ta laso'da so'on, neukose samanen-nala ta fo'a falik fa. Nana O tao mamate-mamopo la'iesak-kasa so ma O ta mafandeles so'on.

¹⁵ Ou Manetualain, O ta mamade'u ami, fo O anam-mala so, ma O tao mamaloa ami nusam-ma, hu ndia de, O nananamatutua-namadedemak.

¹⁶ O huku basa ami so, nai ami makase'em-ma dalek, ami fali leo O mai, ma hule-haladoi neu O, Manetualain.

¹⁷ Sama leo inak fo ana sanga bongi, de naule-napo'de ma nahoo he'dis, leondiak boe, ami nai O matam, Manetualain.

¹⁸ Ami mailu, de ami ulepo'de ma mahoo he'dis, tehu ami ta bongi-ma hata esa boen; ami ta fe so'da-molek neu daebafak-ka fa, boeo, ami ta tama laun-na fa.

¹⁹ O anam fo manamate basak-kala, neukose ta laso'da falik fa, neukose popolan-nala fo'a falik seluk. Hataholi fo nananatoi basak nai dae dale-a, neukose ana fo'a falik, fo ana eeki-natadale. Sama leo dinis fo, manatao makasufu daebafak-ka, O tao maso'da O anam fo, mates dook-ka so.

Manetualain naketu-nala'di ma tao nabebeu

²⁰ Hai Au leoinang-ngala lemin, masok leo emi umam dale meu leona, fo kena lelesu-a neu. Ke'ke lalai muu ndia, losa Manetualain nasa-melun tenak.

²¹ Neukose Manetualain kona neme mamana leleon-na, nai nusa so'dak-ka, fo Ana huku laun manai daebafak-ka, nanahu sila sala-singon-nala. Kanisak fo, ala taon no nafufunik-ka, neukose nanabubuluk. Dae-a ta poti ketu hataholi nanatao nisak-ka so'on.