YESAYA 23 - Susula Malalaok Hehelu Palak Ma Hehelu Beuk

Hala nafa'da elak la'eneu Tirus ma Sidon

¹ Hala heheluk la'eneu Tirus nde ia. Hai, Spanyol hataholi tasin-nala fo manai tasi maloaina lain-nala lemin, kii-makaleleu leona! Lelek emi fali meme Siprus mai-a, hataholi nafa'da emi nae kota Tirus-sa, nakalulutuk so. O ofa see-seem-ma, ma o umam-mala da'di ai-batu madodouk so.

^2-3 Mahoo leon, hai Sion laun, fo manai tasi su'uk-kala, ma manadangan-nala lemin! Nana emi biasa madenu hataholi-la, leu leo tasi selik leu, soaneu ala lase'o-banasa gandum Masir, ma soaneu ala dangan lo basa leoinak-kala.

⁴ Hai, kota Sidon-na nei, o na'de matua-mademam-ma, mopon so! Tasi mademaina, ta manaku o so'on, de nae, “Au beita bongi ita, au beita akaboboi ita ni'iana touanak, ma inaanak fa.”

⁵ Nakalenak, hataholi Masir-rala boe, neukose ala nggenge ma lakalupu, metema lamanene lae Tirus nanatao nakalulutuk so.

⁶ Hai, laun manai solokae su'uk-kala lemin, kii-makaleleu, ma meu leo Spanyol meu.

⁷ Mete emi kotam Tirus fo kota ndia neme makahulun eli mai so. Kota ia nde, biasa namahoko-setelee do? Kota ia nde haitua hataholi-la leo tasi selik leu, fo laleu-lalaak lai naa do?

⁸ Ade hataholi manadangan-nala, ta nde teidale manefetoana fo, nanafe ha'da-holomata nanseli nai daebafak-ka do? See kande ho'i nakeketuk, soaneu tao natu'da Tirus, kota fo manakoasan-nanseli ia?

⁹ Manetualain Fo Manakoasa, Ndia nde ho'i nakeketuk ndia. Ana ho'i nakeketuk, soaneu tao nate'e laun-na koao-ndaeao neu, ala hapu basa buna-boak lala'en-na, ma nakadadaek hataholi fo nanafe ha'da-holomata nai daebafak-ka.

¹⁰ Hai laun Spanyol-la lemin, meu foi-fala emi tinam-ma leona, nana emi ofa see-seem-ma, tak-kana so.

¹¹ Manetualain nakapepela liman-na neu tasi lain, de ana loliheni nusa-nusak-kala. Ana fe paleta, fo ela tao nakalulutuk Fenisia kota musun-nala.

¹² Manetualain nafa'da nae, “Hai kota Sion-na nei, neukose o ta mamahoko-setelee so'on. O laum-mala, nanatuni-ndenik. Leomae lalai leo Siprus leu boe, ala ta hapu nee-nee mino-linok fa.” (

¹³ Leoina Babel-la, nde po'ilotak bana makaak-kala koasa kota Tirus-sa, te ta leoina Asyur-ra fa. Sila boeo, nde lapadedeik uma puni madema natee-natatik-ka, tao latu'u kota musun-nala, de ala tao kota ndia da'di ai-batu madodouk.)

¹⁴ Hai hataholi tasi-la lemin, kii-makaleleu leon-na! Kota fo, emi masalai emi deam-ma neun-na, nakalulutuk so.

¹⁵ Neukose fain-na losa, Tirus nananafandele henik teuk hituhulu dalen-na, sama no manek esa teun-na, Metema tepo-lelek ndia seli soona, neukose Tirus sama leo ina manasosoa-piaok-ka, nai nakameek ia dalek:

¹⁶ Ho'i-ma kacapi fo la'ok okofeo kota leona, hai manasosoa-piaok fo nananafandele henik-konei! Makaminak kecapi, makamee seluk, fo ela hataholi nafandele o.

¹⁷ Basa teuk-ka hituhuluk ndia soona, neukose Manetualain nafandele Tirus, fo Ana fen loak, soaneu ana tao-no'i, ndia tatao-nono'in makahulun-na. Neukose ana dangan no basa nusak manai daebafak-ka poin-na.

¹⁸ Ana hapu nanalak ma ngga'di-a, neukose ana ta pe'da fan, tehu neukose ana tunu-hotu fen neu Manetualain. Hataholi fo manasene-do'ok neu Manetualain-na, neukose ala pake doik sila-la, soaneu ala asa nana'a-nininuk ma bua-lo'as fo sila paluu-ka.