YESAYA 22 - Susula Malalaok Hehelu Palak Ma Hehelu Beuk

Hala nafa'da elak la'eneu Yerusalem

¹ Hala heheluk la'eneu Bafak Ninitak-ka nde ia: Hai, laun Yerusalem-mala lemin, tao le'e de, emi basa-basam-mala kae leo uma punin-na meu?

² Ta nandaa, kota-kota lala'en-na feta-dote ma eeki-latadale fa. Nana emi palani tatibatum, fo mates lai natee-natatik ia dalek, ta mates hu kande natee-natatik-ka fa.

³ Basa o malanga solda'du matuainam-mala lalai, de ala da'di hataholi nanafook, te ala beita kou heni kokou isin-nala fa. Basa o hataholi mabe'i-balakaim-mala, ala da'di hataholi nana fook boe, leomae lala'i losa dook-ka so.

⁴ Boso taoafik neu au; nemen-na fo au kii-makaleleu, au leoinang manamate basak-kala so. Boso so'ba kokoe-nanasi au.

⁵ Memak, Manetualain Fo Mademaina, ma Manakoasa, naketu basa faik ia, da'di leo fai sese'do-babalik, fai nakalupuk, ma fai tasi'bu nai Bafak Ninitak-ka. Kota papala nanadaman-nala, nanatao natu'uk so. Ngganggasik fo manoke tutulu-fafalik-ka, nadodolo nai pupukuk-kala lain.

⁶ Hataholi Siria-la, ala mai loo ndala ma kaleta musu, hataholi Elam-ma, ala ho'u kokouk ma kokouisik, hataholi Kir-rala, sadia babaa fanan-nala.

⁷ Yehuda bafa maisi-maminan-nala, henuk no kaleta musu. Solda'du manasa'e ndala-la, lahehele aon lai Yerusalem lelesuinan-nala.

⁸ Ndefa heni Yehuda kota musun-nala. Nai lelek ndia, emi palisak emi hata-heto natee-natatim-mala, nai uma pepe'da tafa-sisilo dale.

^9-10 Emi hapu matandalak makadotok nanseli lai papala nanadamak Yerusalem-ma, fo paluu nanatao nahiik. Emi palisak basa uma manai Yerusalem-mala, boema emi ofeheni de'ubee, fo emi pake batun-nala soaneu tao mahii, kota papala nanadaman-na. Soaneu oe-a,

¹¹ emi kali lifu nai kota dale, fo lifu palaak-ka oen-na, ana faa leo dalek neu. Tehu emi ta taoafik neu Manetualain, fo Ana tutu'u basa sila-la dook-ka so, ma Ndia nde taon-na basa sila-la, ala da'di.

¹² Nai lelek ndia, Manetualain Fo Mademaina, ma Manakoasa, nadenu emi kii ma makaleleu, nggeuheni emi langam-mala, ma pake si'di lafa lapik.

¹³ Tehu nasafalin-na, emi mamahoko-setelee ma feta-dote. Emi do'do sapi ma bi'ilopo fo emi mi'a paa ma minu angol, boema emi maloo bou-bou mae, “Mai fo ata ta'a ma tinu, nana balahaa te ita mate so!”

¹⁴ Manetualain Fo Mademaina, ma Manakoasa, natu'du aoinan-na neu au, de nafa'da nae, “Te'e-te'e, neukose Au ta fe do'o do ampon neu sila sala-singon-nala fa, losa ala mate. Au, fo Manetualain nde manakokolak-ka.”

Nasanene'dak soaneu Sebna

¹⁵ Manetualain Fo Mademaina, ma Manakoasa, nadenu au u atongo o Sebna, fo uma manek-ka malanga uma loon-na, soaneu au anduku-alosak Manetualain hala hehelun-na nde ia neun.

¹⁶ “O maedaenga, see o ia? O manuu haak hata, nalosa o kali o bolo mamatem-ma, nai pupuku batu lain?

^17-18 Masanene'dak te, neukose Au tu'u-tapa heni o leo dook-ka muu. Neukose Au ki'du-ala o, fo Au didiku o, boema Au lololi o sama leo bola, leo nusa matuaina muu. Neukose mate o nai ndia, fo nai o kaleta mandela-masa'am-mala boboan-na. Neukose o tao manggenggeo o tuam-ma, teidalen-nala na'den-na.

¹⁹ Hu ndia de, neukose Au kaluaheni o neme o kandela nangatutuum-ma mai, ma Au akonaheni o, neme o pangkat mademaina-ma mai.

²⁰ Nai lelek ndia, neukose Au aloo Au atang Elyakim, fo Hilkia anan-na.

²¹ Neukose Au ho'i-a, o bua papake matua-mademam, ma o kalikeem-ma, fo Au paken neu Au atang Elyakim. Neukose Au fe o koasam lala'en-na, leo ndia neu. Neukose ana da'di amak neu laun Yerusalem ma Yehuda-la.

²² Neukose Au pe'da Dauk uman-na, nggoen-na neu alun lain: Fo metema ana soin soona, ta hapu manakena fa; ma metema ana kenan soona, ta hapu manasoi fa.

²³ Neukose Au fen nangatutuu matea-mahelek, sama leo ai papakuk-ka, nanapaku nahelek nai papala nanadamak-ka. Boema neukose, ana da'di kandela mandela-masa'ak ba'eneu teidalen-nala.

²⁴ Tehu neukose, ana lu'a-lepa-na, basa teidalen-nala paluun-na. Neukose ala lamahena neun, sama leo uledae-a, doko-doko nai ai papakuk-ka.

²⁵ Metema dede'ak ndia ana da'di, soona ai papakuk fo nanapaku nahelek ndia, neukose natalesu fo tu'dahenin. Fo ndia nde da'di teidalek-kala maso'da mate'en-na, ma boeo basa hataholi fo namahena neun-na. Au, fo Manetualain nde manakokolak-ka.”