YESAYA 2 - Susula Malalaok Hehelu Palak Ma Hehelu Beuk

Mole-dame manaketu basa taak-ka

¹ Manetualain hala hehelun-na nde ia, la'eneu Yehuda ma Yerusalem, fo Amos anan Yesaya nde sipon-nana:

² Nai fai-fai manamaik-ka pupukuk fo Manetualain Uma mamanan-na tapasosola namadema ma napadeik natetu nai letek-kala ma pupukuk-kala lain. Leoina lala'en-na, beenongo leo naa leu,

³ basa-basas lafa'da lae, “Mai fo, ata kae leo Manetualain Pupukun lain teu, leo Israel Manetualain Uman-na teu. Neukose nanoli ita hata fo ita muse taon. Neukose ita tunga enon-na, nana Manetualain nanolin-na, ana mai neme Yerusalem mai, Ana kokolak neme Sion mai.”

⁴ Neukose naketu-nala'di nai leoina-la tala'da, ma naketu dede'ak nai leo-leo ma leoina-la tala'da. Neukose tafaina nanatutuk da'di tata'tis, ma tee-a taon da'di dope keke'di na'u. Leoina-la, esa ta sapu-na esa so'on, boeo ta laheheleao sanga latee-lata'ti fa.

⁵ Hai, Yakob tititi-nonosin-nala lemin, mai fo ata la'ok nai Manetualain mangale'don dalek!

Hataholi manakoao-ndaeaok-ka neukose nanatao namopo-namatek

⁶ Ou Manetualain, O la'oela O anam fo, Yakob tititi-nonosin-nala so! Nana nai mamanak lala'en-na, hataholi manai nusak ia, ala pake bale mata neme dulu, ma neme Filistin mai, ala na'da hataholi nusa dea-la ha'dan-na.

⁷ Nusan-na henuk no lilofulak ma lilopilas, ma ta hapu leke-nala hata-heton-nala fa. Ndalan-nala makadotok nanseli ma ta hapu leke-nala kaletan-nala dede'un-na fa.

⁸ Nai mamanak lala'en-na, hapu sosongo-tatangok, ma ala doki-dulak aon dodoki-dudulak, fo ala sene-do'ok neun.

⁹ Neukose basa hataholi-la nananakamumulu-nakamamaek ma nananakadadaek. Boso fes do'o do ampon, ou Manetualain!

¹⁰ Neukose ala masok leo lea-luak manai pupukuk mabatu piak-kala dalek leu, do ala kali bolok nai dae dale, fo ela ala boso hapu Manetualain nasa-melun, ma neme koasa mandela-masa'an-na mai.

¹¹ Hataholi manakoao-ndaeaok-ka, neukose nananakadadaek, ma hataholi fo namatutua-namadedema aon-na, neukose ne'e nakatelen. Ka'da Manetualain mesak-kana, nde nananamatutua-namadedemak-ka.

¹² Nai faik ndia, Manetualain Fo Manakoasa, neukose nakadadaek basa hataholi fo namatutua-namadedema aoinan-na, ma Ana huku basa hataholi manakoao-ndaeaok-ka, ma mananamatutua-namadedema aok-ka.

¹³ Ai kaiou mademaina manai Libanon-nala, ma basa ai matuaina manai Basan-nala, neukose nanatao namopo-namatek.

¹⁴ Letek-kala, ma pupukuk fo malole-manapuk-kala, neukose ala da'di dae matetuk.

¹⁵ Uma puni mademaina-la, ma kota musu-la papala nanadaman-nala, neukose nanatao nakalulutuk.

¹⁶ Ofaha'ik matuaina ma mana'ahiik-kala, neukose ala bolo.

¹⁷ Hataholi manakoao-ndaeaok-ka, neukose nananakadadaek, ma hataholi fo namatutua-namadedema aon-na, neukose nanane'e nakatelek. Ka'da Manetualain mesak-kana, nde nananamatutua-namadedemak-ka.

¹⁸ Neukose mopo makandondook sosongo-tatangok-kala.

^19-21 Nai hatematak fo Manetualain fo'a, fo nanggenggengok daebafak-ka soona, neukose hataholi-la masok leo lea-luak manai pupuku mabatu piak-kala dalek leu, do ala kali bolok nai dae dale, fo ela ala boso hapu Manetualain nasa-melun, ma neme koasan fo mandela-masa'an-na mai. Metema faik ndia losa soona, ala tao-la sosongo-tatango lilofulak ma lilopilas fo ala sene-do'ok-ka, neukose nanala'oelak leondiak mesak-kana, soaneu fo lafo-la lo bauk-kala soan.

²² Da'di, boso mamahena neu hataholi daebafak fo, manasapu-manalalok-ka, nana ndia belin ta.