YESAYA 19 - Susula Malalaok Hehelu Palak Ma Hehelu Beuk

Neukose Manetualain huku Masir

¹ Hala heheluk la'eneu Masir nde ia. Manetualain sa'e ko'as manalai-laik-ka, de neu leo Masir neu. Masir sosongo-tatangon-nala dele lai matan-na, ma hataholi Masir-rala dalen-nala ba'ihana.

² Manetualain nafa'da nae, “Neukose Au afofo'a natee-natati tolanok-ka nai Masir: fo tolanok la'ban tolanok, titia-tataik la'ban titia-tataik, kota la'ban kota, nusak la'ban nusak.

³ Neukose Au tao-a Masir dale tutu'un-na buna-boan ta, ma Au fes pela-bale. Neukose loke tutulu-fafalik neme sosongo-tatangok-kala mai, ma loke nanoli-nafa'dak ma natutu'duk neme duladalek-kala mai.

⁴ Neukose Au fe Masir leo mane ha'da hataholi tak esa liman neu, fo ana paletas no ta pake ha'da hataholik fa. Au, Manetualain Fo Manakoasa nde manakokolak-ka.”

⁵ Lee Nil-la oen-na, neukose ana le'e, fo mate'en-na ma'dan.

⁶ Neukose oelolon-nala naboo pulu, nai lelek boetai basa oen-na. Neukose fii ma na'u-a male.

⁷ Basa mamana natanuu ha'de manai Lee Nil-la su'un-na, neukose lamatuu, boema anin-na fuu nenin.

⁸ Basa hataholi manadolu-dala, fo biasa ala ho'u i'ak nai lee ndia, neukose lahoo ma ala kii-makaleleu, nanahu sila dolu-dalan sosoa-ndandaan ta so. Basa manatenuk-kala, neukose ketu namahehenan-nala;

^9-10 sila ma hataholi mana'a ngga'din nala, neukose dalen-nala he'dis-sa ma ala pela-bale.

¹¹ Mauli-malangan kota Zoan-nala, te'e-te'e nggoak-kala! Hataholi Masir fo, manatee-tenok lanseli-la, ala fe nanoli-nafa'da nggoak! Lapalani lanseli, lafa'da manek-ka, lae hataholi manatee-tenok ma mane-manek manai tepo-lelek makahulun eli-la, tititi-nonosin sila.

¹² Wahai, mane Masir-ra nei, ama manek manamanolin-mafa'dan fo, malelak sila-la lai bee? Fafa'kama ala bubuluk hata fo Manetualain Fo Manakoasa, dale tutu'un soaneu Masir.

¹³ Basa mauli-malanga Zoan, ma Memfis-sala nde been-na, hataholi nggoak-kala. Ala ta hela-nole fa te, nakalenak ala tao latofa-latalak leoinan-nala.

¹⁴ Manetualain nde taon-nalas, ala fe nanoli-nafa'dak fo ta matetuk ndia fa. Neninin-na, Masir sala-sala mesan, ma naleu-lilok sama leo hataholi manamafuk fo, ana kosik de ana tu'u neu mutan lain.

¹⁵ Ta hapu hataholi fo, bei ndole-ndaku nai Masir fa, nau manakoasa do laun, nau hataholi nananita-nalelak do hataholi biasa boe.

Neukose Masir sene-do'ok neu Manetualain

¹⁶ Neukose fain-na losa, leoina Masir-ra, ana da'di sama leo ina manabii-mamata'uk. Ala dele ma nggenge, metema lita Manetualain Fo Manakoasa, Ana so'uk liman-na, fo hukus.

¹⁷ Dae Yehuda, neukose da'di nakalupuk ba'eneu hataholi Masir-ra, nai lelek hataholi fes nasanene'dak neu Manetualain Fo Manakoasa, nakeketun la'eneus-sala.

¹⁸ Nai lelek ndia, kota lima lai Masir, ala pake dede'a Ibrani. Hataholi manai naa-la, ala soo-supa lenik Manetualain Fo Manakoasan-na'den-na. Kota esa neme kota ka limak sila-la, neukose nanafoik na'de “Kota Le'do”.

¹⁹ Nai lelek ndia, nai nusa Masir-ra usen-na, neukose hapu mei tunu-hotuk esa soaneu Manetualain, ma nai dae toon-na, hapu dii batu esa, fo nanahele hehelik soaneu Manetualain.

²⁰ Mei tutunu-hohotuk ma dii batu ndia, nalupa dulak neme Manetualain Fo Manakoasa, mamain-na nai Masir. Metema leoina ndia nanatuni-ndenik, fo naloo bou-bou noke tutulu-fafalik neu Manetualain soona, neukose nadenu hataholi esa neu fo ana tulu-falis.

²¹ Neukose Manetualain natu'du aoinan-na neu leoina Masir-ra, fo neukose lalelak-kana, fo ala sene-do'ok neun, boema leni fen tutunu-hohotuk ma tunu-hotuk. Neukose ala tao hehelu-balataak loon, nenik sosoo-susupak, soaneu ala tao latetun.

²² Neukose Manetualain nanoli leoina Masir-ra nenik fefepa-lili'uk, tehu basa soona, neukose Ana tao nalea-nahais. Neukose ala fali ma'is leo Manetualain mai, ma neukose Ana namanene huhule-haladoin-nala, boema Ana fes lelea-hahaik.

²³ Nai lelek ndia, neukose hapu okofoo nai Masir ma Asyur tala'da. Fo nusa ka duak-sila laun-nala, neukose leu-mai tunga enok ndia, fo ala sene-do'ok sama-sama.

²⁴ Nai lelek ndia, neukose Israel nangatutuun-na, sama no Masir ma Asyur nangatutuun-na, ma neukose leoinak-ka teluk sila, ala da'di baba'e-papalak ba'eneu daebafak-ka lala'en-na.

²⁵ Manetualain Fo Manakoasa, neukose ba'e-palas, ma nafa'da nae, “Au ba'e-pala emi, hai Masir fo, Au anang-nga, Asyur fo, Au lima tataang-nga, ma Israel, Au anang fo Au helek-ka.”